ନୂଆଦିଲ୍ଲୀ: ଶୁକ୍ରବାର ହେବ ଦ୍ରବ୍ୟ ଓ ସେବା କର (ଜିଏସଟି) ପରିଷଦର 40 ତମ ବୈଠକ । ଏହି ବୈଠକରେ କୋଭିଡ-19ରେ ପ୍ରଭାବିତ ରାଜସ୍ବର ନେଇ ବିଚାର ବିମର୍ଶ କରାଯିବ । ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଭିଡିଓ କନଫରେନ୍ସିଂ ଜରିଆରେ ଏହି ବୈଠକ ବସିବ । ଏଥିରେ ରାଜ୍ୟର ଅର୍ଥମନ୍ତ୍ରୀ ଓ ପ୍ରତିନିଧି ସାମିଲ ହେବେ ।
ରାଜସ୍ବ ସମୀକ୍ଷ ବ୍ୟତିତ ଏହି ବୈଠକରେ 2017 ଅଗଷ୍ଟରୁ ଜାନୁଆରୀ 2020 ମଧ୍ୟରେ ଜିଏସଟି ରିଟର୍ଣ୍ଣ ଦାଖଲ କରିନଥିବା ନେଇ ବିଳମ୍ବ ଶୁଳ୍କକୁ ଛାଡ କରାଯିବ କି ନୁହେଁ, ସେ ନେଇ ବିଚାର କରାଯିବ ।
ଏହି ବୈଠକରେ କର ଦରରେ ପରିବର୍ତ୍ତନ ନେଇ କୌଣସି ବିଚାର ହେବ ନାହିଁ । ହେଲେ ଜିଏସଟି ଲାଗୁ ଯୋଗୁଁ ରାଜ୍ୟକୁ ହେଉଥିବା ରାଜସ୍ବ ହ୍ରାସର କ୍ଷତି ପୂରଣ ପାଇଁ ପାଣ୍ଠି ସଂଗ୍ରହର ଉପାୟ ବିଷୟରେ ଆଲୋଚନା ହେବ ।
ଟିକସ ସଂଗ୍ରହ ହ୍ରାସ ଏବଂ ଜିଏସଟି ରିଟର୍ଣ୍ଣ ଦାଖଲ ସମୟସୀମା ବୃଦ୍ଧି ଯୋଗୁଁ ସରକାର ଏପ୍ରିଲ ଏବଂ ମେ ମାସ ପାଇଁ ଜିଏସଟି ସଂଗ୍ରହ ରିପୋର୍ଟ ପ୍ରକାଶ କରିନାହାଁନ୍ତି।
