ନୂଆଦିଲ୍ଲୀ: ଇରାନ-ଆମେରିକା ଉତ୍ତେଜନା ଥମିଲା ପରେ ଝୁମିଲା ବିଶ୍ବ ବଜାର । ଡଲାର ତୁଳନାରେ ଟଙ୍କାର ବିନିମୟ ମୁଲ୍ୟ ମଜବୁତ ଓ ସେୟାର ବଜାରରେ ସେନସେକ୍ସ ଉପରମୁହାଁ ସହ କମିଲା ସୁନା ଦାମ । କେବଳ ସୁନା ନୁହେଁ ରୂପା ଦାମ ମଧ୍ୟ ହ୍ରାସ ପାଇଛି ।
ଶୁକ୍ରବାର 10 ଗ୍ରାମ ସୁନା ଦାମ 39,680 ଟଙ୍କା ରହିଛି । ସେହିପରି ରୂପା କିଲୋ 46,419 ଟଙ୍କାକୁ ଖସିଛି । ଇରାନକୁ ନେଇ ଟ୍ରମ୍ପଙ୍କ ବୟାନ ପରେ ଅନ୍ତର୍ଜାତୀୟ ବଜାରରେ ମଧ୍ୟ ସୁନା ଦାମ କମ ହୋଇଛି ।
ଆମେରିକାର ଏୟାରଷ୍ଟ୍ରାଇକ ପରଠୁ ବିଶ୍ବ ବଜାର ଅସ୍ଥିର ହୋଇପଡିଥିଲା । ଆଶା-ଆଶଙ୍କାରେ ନିବେଶକ ଘରୋଇ ସେୟାର ବଜାରରୁ ପୁଞ୍ଜି ଫେରସ୍ତ ନେଇ ସୁନା ଉପରେ ନିବେଶ କରିଥିଲେ । ଫଳରେ ମାତ୍ର କେଇ ଦିନରେ ସୁନା ଦାମ 10 ଗ୍ରାସ ପିଛା 42 ହଜାର ଟପିଥିଲା ବେଳେ ରୂପା 48 ହଜାର 875 ଟଙ୍କାରେ ପହଞ୍ଚିଥିଲା। ତେବେ ଏବେ ସ୍ଥିତି ଥମିବା ସହ ଦାମ ହ୍ରାସ ପାଇଛି । ଆଗକୁ ବିବାହ ସିଜନ ରହିଥିବାରୁ ସୁନା ଦାମ ହ୍ରାସ ମଧ୍ୟବିତ୍ତଙ୍କୁ ସାମାନ୍ୟ ଆଶ୍ବସ୍ତ କରିଛି ।
