ନୂଆଦିଲ୍ଲୀ: ଦେଶର ଅଭିବୃଦ୍ଧି ଦରକୁ ନେଇ ପୁଣି ମୁଣ୍ଡ ଟେକିଛି ବିବାଦ । 2011-12 ଓ 2016-17 ମଧ୍ୟରେ ଦେଶର ମୋଟ ଘରୋଇ ଉତ୍ପାଦ(ଜିଡିପି)କୁ ବଢାଇ ଚଢାଇ ଉପସ୍ଥାପନ କରାଯାଇଛି । ଏହି 6 ବର୍ଷ ବିକାଶ ଦର 7 ନୁହେଁ ବରଂ 4.5 ପ୍ରତିଶତ ରହିଥିଲା । ଏଭଳି ଅଭିଯୋଗ କରିଛନ୍ତି ପୂର୍ବତନ ମୁଖ୍ୟ ଆର୍ଥିକ ପରାମର୍ଶ ଦାତା ଅରବିନ୍ଦ ସୁବ୍ରମଣ୍ୟମ ।
ସୁବ୍ରମଣ୍ୟଙ୍କ ମୁତାବକ, 2011 ଓ 2016 ମଧ୍ୟରେ ଜିଡିପି ବାସ୍ତବରେ 6.9 ନୁହେଁ ବରଂ 3.5 ଓ 5.5 ପ୍ରତିଶତ ଭିତରେ ରହିଥିଲା । 2011 ପରଠାରୁ ଭାରତର ବିକାଶ ଦର ପ୍ରତି ବର୍ଷ 2.5 ପ୍ରତିଶତ ହାରରେ ବୃଦ୍ଧି କରି ଦେଖାଯାଇଛି । ଆଉ ଏଥିପାଇଁ ଯଥେଷ୍ଟ ପ୍ରମାଣ ମଧ୍ୟ ରହିଛି ।
କେନ୍ଦ୍ରୀୟ ପରିସଂଖ୍ୟାନ କାର୍ଯ୍ୟାଳୟ(ସିଏସଓ) ରିପୋର୍ଟରୁ ଜଣାପଡିଛି ଯେ, 2028-19ର ଚତୁର୍ଥ ତ୍ରୟମାସରେ ଆର୍ଥିକ ବିକାଶ ଦର 5.8 ପ୍ରତିଶତ ରହିଛି । ଯାହାକି ବିଗତ 5 ବର୍ଷରେ ସର୍ବନିମ୍ନ । କୃଷି ଓ ନିର୍ମାଣ କ୍ଷେତ୍ରରେ ଦୁର୍ବଳ ପ୍ରଦର୍ଶନ ଯୋଗୁଁ ଅଭିବୃଦ୍ଧି ପ୍ରଭାବିତ ହୋଇଛି ।
ଏଥିସହ ଦେଶର ଆର୍ଥିକ ବିକାଶ ପାଇଁ ଗଠିତ ହୋଇଥିବା ନିୟମ ଉପରେ ପ୍ରଶ୍ନ ଉଠାଇଛନ୍ତି ସୁବ୍ରମଣ୍ୟମ । ଏଣୁ ଜିଡିପି ଆକଳନ ଲାଗି ଏକ ସ୍ବତନ୍ତ୍ର କାର୍ଯ୍ୟାବଳୀ ଜରିଆରେ ସଂଶୋଧନ କରିବା ଦରକାର । ଯେଉଁଥିରେ ନ୍ୟାସନାଲ ଓ ଇଣ୍ଟରନ୍ୟାସନାଲ ଏକ୍ସପୋର୍ଟ, ପରିସଂଖ୍ୟାନବିତ, ମାଇକ୍ରୋ ଅର୍ଥନୀତିଜ୍ଞ ଓ ନିତି ଉପଯୋଗକର୍ତ୍ତାଙ୍କୁ ସାମିଲ କରିବାକୁ ସେ ପରାମର୍ଶ ଦେଇଛନ୍ତି ।
ପୂର୍ବରୁ ମଧ୍ୟ ଜିଡିପି ରିପୋର୍ଟ ଖୁଲାସା ପରେ ସରକାର ଓ ବିରୋଧୀ ମୁହାଁମୁହିଁ ହୋଇଥିଲେ । କଂଗ୍ରେସ ତାର ସଫେଇରେ ପ୍ରତିକ୍ରିୟା ରଖିଥିବା ବେଳେ ସରକାରଙ୍କ ପକ୍ଷରୁ ନିତି ଆୟୋଗ ଉପାଧ୍ୟକ୍ଷ ରାଜୀବ କୁମାର ମତ ରଖିଛନ୍ତି ।
