ନୂଆଦିଲ୍ଲୀ: କୋରୋନାର ଦ୍ବିତୀୟ ଲହର ସଙ୍କଟ ମଧ୍ୟରେ ପିଏଫ ଆକାଉଣ୍ଟଧାରୀଙ୍କୁ ରିଲିଫ ଦେଲେ ସରକାର । ଆକାଉଣ୍ଟଧାରୀ ଯଦି ଆର୍ଥିକ ସଙ୍କଟ ଦେଇ ଗତି କରୁଛନ୍ତି, ତେବେ କର୍ମଚାରୀ ଭବିଷ୍ୟନିଧି ପାଣ୍ଠି(ଇପିଏଫ)ରୁ ଉଠାଇପାରିବେ ଟଙ୍କା । ଏ ନେଇ ସୋମବାର ଘୋଷଣା କରାଯାଇଛି ।
ଅବସର ପାଣ୍ଠିର ପରିଚାଳନା କରୁଥିବା ସଂସ୍ଥା ଇପିଏଫ ସମଗ୍ର ଦେଶରେ କୋରୋନାର ଭୟାବହତାକୁ ଦୃଷ୍ଟିରେ ରଖି ଦ୍ବିତୀୟ ଥର ପାଇଁ PF ଆକାଉଣ୍ଟରୁ ଟଙ୍କା ପ୍ରତ୍ୟାହାର କରିବାକୁ ଅନୁମତି ଦେଇଛି । ଏହା ଫଳରେ 5 କୋଟିରୁ ଊର୍ଦ୍ଧ୍ବ ଇପିଏଫ ଖାତାଧାରୀ ଉପକୃତ ହେବେ ।
ଗତ ବର୍ଷ ଆରମ୍ଭରେ ମହାମାରୀ ଯୋଗୁଁ ଇପିଏଫ ଏହାର ସଦସ୍ୟ ଆକସ୍ମିକ ଆବଶ୍ୟକତାକୁ ପୂରଣ କରିବା ଉଦ୍ଦେଶ୍ୟରେ ଟଙ୍କା ଉଠାଣ ପାଇଁ ଅନୁମତି ଦେଇଥିଲା । ଏହା ଅଧିନରେ ସଦସ୍ୟଙ୍କୁ 3 ମାସର ମୋଟ ଦରମା ( ମୂଳ ଦରମା + ମହଙ୍ଗା ଭତ୍ତା) ବା ସେମାନଙ୍କ ଭବିଷ୍ୟ ନିଧି ବା ପିଏଫ ଖାତାରେ ଜମା ରାଶିର 75 ପ୍ରତିଶତ ପର୍ଯ୍ୟନ୍ତ ଉଠାଇବାକୁ ଅନୁମତି ମିଳିଥିଲା ।
ଶ୍ରମ ମନ୍ତ୍ରାଳୟର ଏକ ବିବୃତ୍ତିରେ କହିଛି କି, ‘‘ କୋଭିଡ-19 ମହାମାରୀ ଦ୍ବିତୀୟ ଲହର ସମୟରେ ଏହାର ଅଂଶୀଦାରଙ୍କ ସହଯୋଗ କରିବା ପାଇଁ ଇପିଏଫଓ ଦ୍ବିତୀୟ ଥର ଅଗ୍ରିମ ଟଙ୍କା ଉଠାଣ କରିବାକୁ ଅନୁମତି ଦେଇଛି ।
ମହାମାରୀ ସମୟରେ ସଦସ୍ୟମାନଙ୍କର ଆର୍ଥିକ ଆବଶ୍ୟକତା ପୂରଣ ପାଇଁ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା (PMGKY) ଅଧୀନରେ ସ୍ବତନ୍ତ୍ର ପ୍ରତ୍ୟାହାରର ବ୍ୟବସ୍ଥା ମାର୍ଚ୍ଚ 2020ରେ କରାଯାଇଥିଲା ।
