ନୂଆଦିଲ୍ଲୀ: ଶିଳ୍ପପତି ଅନୀଲ ଅମ୍ବାନୀଙ୍କ ବିରୋଧରେ ଷ୍ଟେଟ ବ୍ୟାଙ୍କ ଦାଏର କରିଥିବା ଦେବାଳିଆ ମାମଲାକୁ ଆଗକୁ ବଢାଇବାକୁ ଅନୁମତି ଦେଇଛି ଜାତୀୟ କମ୍ପାନୀ ଲ ଟ୍ରିବ୍ୟୁନାଲ୍ (ଏନସିଏଲଟି)ର ମୁମ୍ବାଇ ଖଣ୍ଡପୀଠ । 1200 କୋଟି ଟଙ୍କା ଆଦାୟ ପାଇଁ ବ୍ୟକ୍ତିଗତ ଗ୍ୟାରେଣ୍ଟି ଧାରା ଅଧିନରେ ଅନୀଲଙ୍କ ନାଁରେ ଦେବାଳିଆ ପ୍ରକ୍ରିୟା ଆରମ୍ଭ ପାଇଁ ଏନସିଏଲଟି ନିର୍ଦ୍ଦେଶ ଦେଇଛି ।
ପ୍ରକାଶ ଯେ, 2016 ରେ ଭାରତୀୟ ଷ୍ଟେଟ ବ୍ୟାଙ୍କ ରିଲାଏନ୍ସ କମ୍ୟୁନିକେସନ୍ସ ଓ ରିଲାଏନ୍ସ ଇନ୍ଫ୍ରାଟେଲକୁ ଦେଇଥିବା ଋଣ ପାଇଁ ଅନୀଲ ଅମ୍ବାନୀ ବ୍ୟକ୍ତିଗତ ଗ୍ୟାରେଣ୍ଟି ଦେଇଥିଲେ । ଆଉ ଏହି ଟଙ୍କା ଏବେ ସୁଦ୍ଧା ପରିଶୋଧ ହୋଇନଥିବାରୁ ଅନୀଲଙ୍କ ବିରୋଧରେ ଏସବିଆଇ ମାମଲା ରୁଜୁ କରିଥିଲା । ଏଥିପାଇଁ ଟ୍ରିବ୍ୟୁନାଲ ପକ୍ଷରୁ ଦେବାଳିଆ (bankruptcy) ପ୍ରଶାସକଙ୍କୁ ଏହାର ଯାଞ୍ଚ ପାଇଁ ନିଯୁକ୍ତ କରାଯାଇଛି ।
ଏଥିମଧ୍ୟରେ ଅନୀଲ ଅମ୍ବାନୀଙ୍କ ମୁଖପାତ୍ର ଏ ସମ୍ବନ୍ଧରେ କହିଛନ୍ତି କି, ଅମ୍ବାନୀ ଏବେ ଅଗଷ୍ଟ 20ରେ ଏନସିଏଲଟିର ମୁମ୍ବାଇ ପୀଠର ଦେଇଥିବା ଆଦେଶର ସମୀକ୍ଷା କରୁଛନ୍ତି । ସେ ସମାଧାନ ପ୍ରଫେସନାଲ ଭାବରେ ନିଯୁକ୍ତ କରାଯିବା ଆଦେଶ ବିରୋଧରେ ଏନସିଏଲଟି ପାଖରେ ଯାଚିକା ଦାଖଲ ପାଇଁ ପରାମର୍ଶ ନେଉଛନ୍ତି।
ତଥ୍ୟ ଅନୁସାରେ ଏନସିଏଲଟିର ମୁମ୍ବାଇ ଖଣ୍ଡପୀଠ ଅଗଷ୍ଟ 20କୁ ଦେଇଥିବା ଆଦେଶରେ କହିଛି କି, ରିଲାଏନ୍ସ କମ୍ୟୁନିକେସନ୍ସ ଓ ରିଲାଏନ୍ସ ଇନଫ୍ରାଟେଲ ଉଭୟ 2017 ଜାନୁଆରୀ ସୁଦ୍ଧା ଋଣ କିସ୍ତି ପରିଶୋଧରେ ଅସଫଳ ରହିଛନ୍ତି । ଉଭୟ ଋଣ ଖାତାକୁ ପୁରୁଣା ତାରିଖ 2016 ଅଗଷ୍ଟରୁ ଲାଗୁ ଭାବେ ଏନପିଏ ଭାବେ ଶ୍ରେଣୀଭୂକ୍ତ କରିଦିଆଯାଇଛି ।
