କୋଲକାତା: ନିର୍ବାଚନୀ ପ୍ରଚାର ବନ୍ଦ ନେଇ ଇସିଙ୍କ ନିଷ୍ପତ୍ତି ପରେ ବିଜେପିକୁ ସିଧାସଳଖ ଟାର୍ଗେଟ କରିଛନ୍ତି ମମତା । ଆଜି ଏକ ନିର୍ବାଚନ ରାଲିରେ ମୋଦିଙ୍କୁ ଆଟାକ କରି ଗର୍ଜିଛନ୍ତି ଦିଦି । ଆଉ ପରୋକ୍ଷ ଭାବେ ଚୌକିଦାର ଚୋର ହେ କମେଣ୍ଟକୁ ସମର୍ଥନ ଦେଇଛନ୍ତି ।
ପୁଣିଥରେ ଶୁଭିଲା ଚୌକିଦାର ଚୋର ହେ କମେଣ୍ଟ । ଏଥର କଂଗ୍ରେସ ନୁହେଁ, ନାରା ଦେଲେ ପଶ୍ଚିମବଙ୍ଗର ଟିଏମସି କର୍ମୀ । ଡାଇମଣ୍ଡ ହର୍ବରରେ ସାଧାରଣ ଜନତାଙ୍କୁ ସମ୍ବୋଧନ କରିବା ସମୟରେ ମମତା ନିଜେ ନକହି ଲୋକଙ୍କୁ କୁହାଇଲେ ଚୌକିଦାର ଚୋର ହେ । ନିଜେ କେବଳ ଚୌକିଦାର କହି ବାକି ନାରା ଲୋକଙ୍କୁ ଦେବା ପାଇଁ ସେ କହିଥିଲେ ।
ସିଧାସଳଖ ମୋଦିଙ୍କୁ ଟାର୍ଗେଟ କରି ମମତା କହିଛନ୍ତି ଯେ 5 ବର୍ଷ ଶାସନରେ ମୋଦି ରାମ ମନ୍ଦିର ନିର୍ମାଣ କରିପାରିଲେନି । ହେଲେ ବିଦ୍ୟାସାଗର ଷ୍ଟାଚ୍ୟୁ ନିର୍ମାଣ କରିବାକୁ ସ୍ବପ୍ନ ଦେଖୁଛନ୍ତି । ବିଜେପିର ଗୁଣ୍ଡା ନେତା ବେଙ୍ଗଲକୁ ଆସି ଆମକୁ କାଙ୍ଗାଳ କହୁଛନ୍ତି । ହେଲେ ଆମେ କାହାରି ପାଖରେ ହାତ ପତାଇବୁ ନାହିଁ କି କାହାର ଦୟାର ପାତ୍ର ନୁହେଁ । ଆମେ କଙ୍ଗାଳ ନୁହେଁ ବୋଲି ମମତା କହିଥିଲେ ।
ଏହାସହ ସେ ନିଜେ ଚୌକିଦାର ନାରା ଦେଇଥିଲେ ଏବଂ ଲୋକଙ୍କୁ ପରବର୍ତ୍ତୀ ନାରା କହିବାକୁ ଅନୁରୋଧ କରିଥିଲେ । ଏହାପରେ ସବୁଆଡେ ଶୁଭିଥିଲା ଚୌକିଦାର ଚୋର ହେ । ଏପରିକି ଲୋକେ ଧିରେ ଧିରେ କହୁଥିବାବେଳେ ସେ ଜୋର କରି ଚିଲ୍ଲାଇବାକୁ ଉପସ୍ଥିତ ଜନତାଙ୍କୁ କହିଥିଲେ ।
ତେବେ ପୂର୍ବରୁ ରାହୁଲ ଗାନ୍ଧୀ ଚୌକିଦାର ଚୋର ଦେ ନାରା ଦେଇଥିବାରୁ ତାଙ୍କୁ ଇସିର ନୋଟିସ ଜାରି ହୋଇଥିଲା । ଏଥିପାଇଁ ରାହୁଲ କ୍ଷମା ପ୍ରାର୍ଥନା ମଧ୍ୟ କରିଥିଲେ । ଏବେ ପୁଣି ପଶ୍ଚିମବଙ୍ଗରେ ଏହାର ପୁନରାବୃତ୍ତି ହେବା ଦେଖିବାକୁ ମିଳିଛି । ଏହା ଉପରେ ଇସି କିଛି କାର୍ଯ୍ୟାନୁଷ୍ଠାନ ନେଉଛନ୍ତି କି ନାହିଁ ଦେଖିବାକୁ ବାକି ରହିଲା ।
