ବରଗଡ: ବରଗଡ ଟାଉନ ଥାନାରେ ସଡକ ଦୁର୍ଘଟଣା । ଏଥିରେ ଜଣଙ୍କ ମୃତ୍ୟୁ ହୋଇଥିବା ବେଳେ 2ଜଣ ଗୁରୁତର ହୋଇଛନ୍ତି । ମୃତକ ହେଲେ ବରଗଡ଼ ୧ ନମ୍ବର ୱାର୍ଡର ୨୬ ବର୍ଷୀୟ ନରସିଂହ ନାଗ । ସେହିପରି ଗୁରୁତର 2 ଡଣ ହେଉଛନ୍ତି ୮ ନମ୍ବର ୱାର୍ଡ ଖଜୁରଟିକିରା ପଡ଼ାର ନରେଶ ନାଗ ଓ ୯ ନମ୍ବର ୱାର୍ଡ ଡେମ କଲୋନୀ ପଡ଼ାର ରୂପେଶ ବେହେରା ।
ସୂଚନାନୁସାରେ, ସୋମବାର ରାତି 11ଟାରେ 3 ଜଣ ଯୁବକ ଏଫ2 ୟାମାହା (OD17-f-6301) ବାଇକରେ ବରଗଡ଼ ଭଟଲି ଛକରୁ ଗାନ୍ଧିଛକକୁ ଆସୁଥିଲେ । ଏହି ସମୟରେ ସାମନାରୁ ଆସୁଥିବା ଏକ ଡମ୍ଫର ସହିତ ବାଇକଟି ଧକ୍କା ହୋଇ ଡମ୍ଫର ତଳେ ପଶିଯାଇଥିଲା । ଫଳରେ 3ଜଣ ବାଇକ ଆରୋହୀ ଗାଡ଼ି ତଳେ ଚାପି ହୋଇଯାଇଥିବା ବେଳେ ଘଟଣା ସ୍ଥଳରେ ନରସିଂହଙ୍କ ମୃତ୍ୟୁ ହୋଇଥିଲା । ପରେ ଗୁରୁତର 2 ଜଣଙ୍କୁ ବହୁ କଷ୍ଟରେ ଡମ୍ଫର ଭିତରୁ ଉଦ୍ଧାର କରାଯାଇଥିଲା । ଦୀର୍ଘ ଏକ ଘଣ୍ଟା ପରିଶ୍ରମ ପରେ ଏକ ଜେସିବି ମେସିନ ସାହାଯ୍ୟରେ ଡମ୍ଫରକୁ ଟେକାଯାଇ ପ୍ରଥମେ ଜୀବିତ ଥିବା ୨ ଜଣଙ୍କୁ ଉଦ୍ଧାର କରାଯାଇଥିଲା । ଚିକିତ୍ସା ପାଇଁ ସେମାନଙ୍କୁ ବୁର୍ଲା ବଡ଼ମେଡିକାଲକୁ ପଠାଯାଇଥିଲା । ମୃତ ନରସିଂହ ଭଟଲି ଛକସ୍ଥିତ ଟୁଲି ପେଟ୍ରୋଲ ପମ୍ପରେ କାମ କରୁଥିଲେ । ସେ କାମ ସାରି ସାଙ୍ଗମାନଙ୍କ ସହ ବାଇକରେ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିଲା ।
ଘଟଣାକୁ ନେଇ ଦୁର୍ଘଟଣାସ୍ଥଳରେ ସ୍ଥାନୀୟ ଲୋକେ ରାସ୍ତା ଅବରୋଧ କରି ମୃତକଙ୍କ ପରିବାର ବର୍ଗଙ୍କୁ କ୍ଷତିପୂରଣ ଦାବିରେ ଆନ୍ଦୋଳନକୁ ଓହ୍ଲାଇଥିଲେ । ପୋଲିସ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ଲୋକେମାନେ ଶାନ୍ତ ହୋଇଥିଲେ । ମୃତକଙ୍କ ପରିବାକୁ ସହାୟତା ଯୋଗାଇ ଦେବା ପାଇଁ ଜିଲ୍ଲା ପ୍ରଶାସନର ପ୍ରତିଶ୍ରୁତି ପରେ ଆନ୍ଦୋଳନ ହଟିଥିଲା । ତେବେ ଦୁର୍ଘଟଣା ଘଟିଥିବା ବାଇକ ଓ ଡମ୍ଫରକୁ ପୋଲିସ ଜବତ କରିବା ସହିତ ନରସଂହଙ୍କ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ବରଗଡ଼ ଡାକ୍ତରଖାନାକୁ ପଠାଯାଇଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
