ଝାରସୁଗୁଡା: ୧୧ ଦଫା ଦାବିରେ ଓଡିଶା କୋଲଫିଲ୍ଡ ୱାର୍କର ସଂଘ ପକ୍ଷରୁ ସୋମବାର ଠାରୁ ଅନିର୍ଦ୍ଦିଷ୍ଟ କାଳ ପାଇଁ କାର୍ଯ୍ୟବନ୍ଦ ଆନ୍ଦୋଳନ ଆରମ୍ଭ ହୋଇଛି । ଏହି ଆନ୍ଦୋଳନ ଯୋଗୁଁ ଲଖନପୁର କୋଇଲା ଖଣି କ୍ଷେତ୍ରର ଏମ୍ସିଏଲ୍ରେ ଥିବା ଭିଏଫପିଏଲ, ଜେଜେ, ଜେସି ଏବଂ ଅନ୍ୟାନ୍ୟ କମ୍ପାନୀର କୋଇଲା ଉତ୍ପାଦନ ଓ ପରିବହନ ସଂପୂର୍ଣ୍ଣ ଠପ୍ ହୋଇଯାଇଛି।
ମହାନଦୀ କୋଇଲା ଖଣି ଠିକା ଶ୍ରମିକ ସଂଘର ସଦସ୍ୟ ମାନେ ଲଖନପୁର ଖଣି କ୍ଷେତ୍ରର ପର୍ସନାଲ ଅଫିସରଙ୍କ କାର୍ଯ୍ୟାଳୟ ସମ୍ମୁଖରେ ଏକତ୍ରିତ ହୋଇଥିଲେ । ତେବେ ଖଣି କର୍ତ୍ତୃପକ୍ଷ ଲିଖିତ ପ୍ରତିଶ୍ରୁତି ଦେବା ପରେ ଠିକା ଶ୍ରମିକ ସଂଘ ଆନ୍ଦୋଳନରୁ ଓହରିବାକୁ ନେଇ ନିଷ୍ପତ୍ତି ନେଇଛନ୍ତି । ଏହି କ୍ରମରେ ଆଜି ମଧ୍ୟ ସଂଘ ପକ୍ଷରୁ ଆନ୍ଦୋଳନ ଜାରି ରହିବ ।
ସୂଚନାନୁସାରେ, ଠିକା ଶ୍ରମିକଙ୍କୁ ସର୍ବନିମ୍ନ ମଜୁରୀ ପ୍ରଦାନ, ବାୟୋମେଟ୍ରିକ୍ ପଦ୍ଧତିରେ ଉପସ୍ଥାନ, ବୋନସ , ପେ-ସ୍ଲିପ ଓ ଛୁଟି ବ୍ୟବସ୍ଥା , ସୁରକ୍ଷା ଉପକରଣ ସହ 39 ଛଟେଇ ଠିକା ଶ୍ରମିକଙ୍କୁ ପୁନଃ ନିଯୁକ୍ତି ଆଦି ବିଭିନ୍ନ ଦାବି ନେଇ ସଂଘ ପକ୍ଷରୁ ଆନ୍ଦୋଳନ କରାଯାଇଛି ।
ଅପରପକ୍ଷେ ଠିକା ସଂସ୍ଥାର ପରିଚାଳକଙ୍କ କହିବାନୁଯାୟୀ, ସଂଘ ପକ୍ଷରୁ କରାଯାଇଥିବା ଦାବି ଏବଂ ଆନ୍ଦୋଳନ ସମ୍ପର୍କରେ ପୂର୍ବରୁ ତାଙ୍କ ପାଖରେ କୌଣସି ସୂଚନା ନଥିଲା । ଏହାସହିତ ଏନେଇ କଣ ପଦକ୍ଷେପ ନିଆଯିବ ତାହାର ଜବାବ ମଧ୍ୟ ଏମସିଏଲ ପକ୍ଷରୁ ମିଳିଥିବା ଚିଠିରେ ଦେଇସାରିଛି । ସେପଟେ ଘଟଣାକୁ ନେଇ ବର୍ତ୍ତମାନ ସୁଦ୍ଧା ଏମସିଏଲ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
