ଭୁବନେଶ୍ବର: 1999 ମହାବାତ୍ୟାର ଦ୍ବିତୀୟ ରୂପ 'ଫନି' । ଓଡିଶା ପାଇଁ ଥିଲା ଆଉ ଏକ କଳା ଦିବସ । ଆଖି ଆଗରେ ପୁଣି ଥରେ ଘଟିଲା ପୁନରାବୃତ୍ତି । ଆଜି ବି ସେ ଦିନକୁ ଭୁଲିନଥିବା ଓଡିଶାବାସୀଙ୍କ ପାଇଁ ପୁଣି ଫନି କରାଳ ରୂପ ଦେଖାଇଛି ।
ଖରାଦିନେ ଏଭଳି ପ୍ରଳୟଙ୍କର ବାତ୍ୟାର ଗତ 43 ବର୍ଷର ପ୍ରଥମ ବିପର୍ଯ୍ୟୟ ଏବଂ ଗତ 150 ବର୍ଷରେ ତୃତୀୟ ପ୍ରଳୟଙ୍କରୀ ବାତ୍ୟା । ବାତ୍ୟା ପରେ ଆଜି ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀଙ୍କ ସହ କ୍ଷୟକ୍ଷତି ସମ୍ପର୍କରେ ଆଲୋଚନା କରିଛନ୍ତି ।
ଏଭଳି ବାତ୍ୟାକୁ ଟ୍ରାକିଂ କରିବା ବେଶ କଷ୍ଟକର ଥିଲା । ବିଭିନ୍ନ ସଂସ୍ଥା ଦ୍ୱାରା ହେଉଥିବା ପୂର୍ବାନୁମାନ ମଧ୍ୟରେ ଏହା ଲ୍ୟାଣ୍ଡଫଲ କରିବା ପରେ ଏହାର ଗତିପଥ ସ୍ପଷ୍ଟ ନଥିଲା । ତେବେ ରାଜ୍ୟ ସରକାର ସବୁ ପ୍ରକାର ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ହେବାକୁ ନିଷ୍ପତ୍ତି ନେଇଥିବାବେଳେ ଆଜି ବିଭାଗୀୟ ଅଧିକାରୀଙ୍କ ସହ ପରିସ୍ଥିତିର ସମୀକ୍ଷା କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ।
ଫନି ଦାଉରୁ ଲୋକଙ୍କୁ ବଞ୍ଚାଇବା ପାଇଁ ଗତ 24 ଘଣ୍ଟା ମଧ୍ୟରେ ଦେଶର ସର୍ବବୃହତ ସ୍ଥାନାନ୍ତରଣ କରାଯାଇଛି । 24 ଘଣ୍ଟାରେ 12 ଲକ୍ଷରୁ ଅଧିକ ଲୋକଙ୍କ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଛି । ଗଞ୍ଜାମରେ ସର୍ବାଧିକ 3ଲକ୍ଷ 20 ହଜାର ଓ ପୁରୀରେ 1 ଲକ୍ଷ 20 ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି । ରାତି ମଧ୍ୟରେ ୯୦୦୦ ଆଶ୍ରୟସ୍ଥଳୀରେ ମାଗଣାରେ ୭୦୦୦ ରୋଷଇ ଘରେ ଖାଦ୍ୟ ଯୋଗାଇ ଦିଆଯାଉଛି । ଏଥିରେ ୪୫ ହଜାର ସ୍ବେଚ୍ଛାସେବୀ, 2000 ଆପଦକାଳୀନ କର୍ମୀ, ଓଡ୍ରାଫ, ଏନଡିଆରଏଫ ଓ 1 ଲକ୍ଷ ସରକାରୀ କର୍ମଚାରୀ 24 ଘଣ୍ଟା କାମ କରୁଥିବା ମୁଖ୍ୟମନ୍ତ୍ରୀ କହିଛନ୍ତି ।
ଶୁକ୍ରବାର 'ଫନି' ସ୍ଥଳଭାଗ ଛୁଇଁବା ସମୟରେ ପବନର ବେଗ ୨୦୦ ରୁ ୨୪୦ କିଲୋମିଟର ଥିଲା । ଏହାର ପ୍ରଭାବରେ ଭିତ୍ତିଭୂମି, ବିଦ୍ୟୁତ, ଟେଲିକମ ଓ ଜଳ ଯୋଗାଣ ସେବା ସମ୍ପୂର୍ଣ ବିପନ୍ନ ହୋଇଛି । ଲକ୍ଷ ଲକ୍ଷ ଗଛ ଉପୁଡି ରାସ୍ତା ଅବରୋଧ କରିବା ସହ ଅନେକ ଲୋକଙ୍କ ଘର ଭାଙ୍ଗିଯାଇଛି । ପୁରୀ ଓ ଖୋର୍ଦ୍ଧାରେ ଅର୍ଦ୍ଧାଧିକ ଅଞ୍ଚଳରେ ବିଦ୍ୟୁତ ସେବା ସମ୍ପୂର୍ଣ୍ଣ ନଷ୍ଟ ହୋଇଥିବାବେଳେ ଏହାର ପୁନରୁଦ୍ଧାର କଷ୍ଟକର ବୋଲି ସେ କହିଛନ୍ତି ।
ଏତଦବ୍ୟତୀତ କଟକ, ଜଗତସିଂହପୁର, ବାଲେଶ୍ଵର, ଭଦ୍ରକ, ଯାଜପୁର ଆଦି ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଛି । ପ୍ରାଥମିକ ତଥ୍ୟ ଅନୁଯାୟୀ ପୁରୀ ଓ ଖୋର୍ଦ୍ଧାରେ ସମସ୍ତ କଚ୍ଚା ଘର ସମ୍ପୂର୍ଣ୍ଣ ଭାଙ୍ଗି ଯାଇଥିବାବେଳେ ରାଜ୍ୟ ସରକାର ପ୍ରତ୍ୟେକ ଲୋକଙ୍କ ଜୀବନ ରକ୍ଷା ପାଇଁ କାମ କରୁଛନ୍ତି ।
ଅପରପକ୍ଷେ ମୁଖ୍ୟମନ୍ତ୍ରୀ କହିଛନ୍ତି ଯେ, ଯେତେବେଳେ ସାରା ବିଶ୍ୱ ମୃତ୍ୟୁ ସଂଖ୍ୟା ପଚାରୁଛନ୍ତି, ସେତେବେଳେ କ୍ଷତିଗ୍ରସ୍ତ ଲୋକ ପାଣି, ବିଜୁଳି ଓ ଭିତ୍ତିଭୂମି କଥା ପଚାରୁଛନ୍ତି । କାରଣ ସେମାନେ ଜାଣିଛନ୍ତି ସରକାର ସେମାନଙ୍କ ସହ ଅଛନ୍ତି ।
ମହାବାତ୍ୟା ପରି ଏତେ ବଡ଼ ବାତ୍ୟା ପରେ ବି ଜନସାଧରଣଙ୍କ ସହଯୋଗରେ ଆମ ଲୋକ ନିରାପଦରେ ଅଛନ୍ତି । ଏହା ହିଁ ପରିବର୍ତ୍ତନ, ଆମ ବ୍ୟବସ୍ଥାରେ ଓ ପ୍ରସ୍ତୁତିରେ ବୋଲି କହିଛନ୍ତି ମୁଖ୍ୟମନ୍ତ୍ରୀ ।
ଭୁବନେଶ୍ବରରୁ ଅଜିତ୍ ଦାଶ ଏବଂ ତପନ ଦାସ, ଇଟିଭି ଭାରତ
