କେନ୍ଦ୍ରାପଡା: ରାଜ୍ୟରେ ମାତିଛନ୍ତି ଲୁଟେରା । କେଉଁଠି ବାଇକ ଲୁଟ ତ କେଉଁଠି ଗହଣା ଲୁଟ ନେଇ ଅନେକ ଖବର ସାମ୍ନାକୁ ଆସୁଛି । ପୁଣି କେଉଁଠି ଘରେ ପସି କଳା କନା ବୁଲାଉଛନ୍ତି ଲୁଟେରା । ଆଉ ପୋଲିସ ମଧ୍ୟ ଲୁଟେରାଙ୍କୁ କାବୁ କରିବାକୁ ଚଳାଇଛି ଯୋଜନାବଦ୍ଧ ଅଭିଯାନ । ଏମିତି ଏକ ଲୁଟେରା ଗ୍ୟାଙ୍ଗକୁ କାବୁ କରିବାକୁ ସକ୍ଷମ ହୋଇଛି କେନ୍ଦ୍ରାପଡା ପୋଲିସ ।
ଗତ 26 ତାରିଖରେ ଏକ ହିରୋହଣ୍ଡା ବାଇକ ଚୋରିକୁ ନେଇ ପଟ୍ଟାମୁଣ୍ଡାଇ ଥାନାରେ ଅଭିଯୋଗ ହେବାପରେ ପୋଲିସ ମାମଲା ରୁଜୁ କରି ଘଟଣାର ତଦନ୍ତ କରୁଥିଲା । ଆଉ ଆଳୁ ଖୋଳୁଖୋଳୁ ମହାଦେବ ବାହାରିଲା ପରି ଏହି ଘଟଣାରେ ପୋଲିସ ଏକ ବଡ ଗ୍ୟାଙ୍ଗକୁ ଧରିବାରେ ସଫଳ ହୋଇଛି । ପଟ୍ଟାମୁଣ୍ଡାଇ ପୋଲିସ କେସନଂ 224/19 ଆଧାରରେ ପଟ୍ଟାମୁଣ୍ଡାଇ ଅଞ୍ଚଳର ୮ ଜଣଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଭିନ୍ନଭିନ୍ନ କମ୍ପାନୀର ୨୩ଟି ଚୋରା ବାଇକ ଜବତ କରିଛି ।
ଏହି ବାଇକ ଗୁଡିକ ଆଳି, କେନ୍ଦ୍ରାପଡ଼ା, ରାଜନଗର, ପଟ୍ଟାମୁଣ୍ଡାଇ, ଭଦ୍ରକ ଏବଂ ଭୁବନେଶ୍ୱର ଅଞ୍ଚଳରୁ ଚୋରି ହୋଇଥିବା ଏସପି ନୀତିଶେଖର ସୂଚନା ଦେଇଛନ୍ତି । ଏହି ରାକେଟରେ ଆହୁରି ଅନେକ ବ୍ୟକ୍ତି ସମ୍ପୃକ୍ତ ଥିବା ନେଇ ପୋଲିସ ସନ୍ଦେହ କରୁଥିବା ବେଳେ ଏନେଇ ଅଧିକ ତଦନ୍ତ ଜାରି ରହିଥିବା ଶନିବାର ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି କେନ୍ଦ୍ରାପଡା ଏସପି ନୀତି ଶେଖର ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
