କେନ୍ଦୁଝର: ପ୍ରଚଣ୍ଡ ଖରାରେ ସିଝୁଛି ସାରା ରାଜ୍ୟ । ପ୍ରବଳ ଗରମ ସାଙ୍ଗକୁ ଗୁଳିଗୁଳିରେ ଅସ୍ତବ୍ୟସ୍ତ ହେଉଛନ୍ତି କେନ୍ଦୁଝରବାସୀ । ଅହେତୁକ ଗରମ ସାଙ୍ଗକୁ ଘନ ଘନ ବିଦ୍ୟୁତ୍ କାଟ । ଗାଁ ଗଣ୍ଡାରୁ ଆରମ୍ଭ କରି ସହର ପର୍ଯ୍ୟନ୍ତ ସବୁଠି ବିଦ୍ୟୁତ କାଟର ସମ୍ମୁଖୀନ ହେଉଛନ୍ତି ସାଧାରଣଲୋକେ । ଏଭଳି ଅଘୋଷିତ ବିଜୁଳି କାଟକୁ ନେଇ ନେସ୍କୋ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି ସହରର ଶତାଧିକ ଯୁବକ ।
ତାପମାତ୍ରା ଦିନକୁ ଦିନ ବୃଦ୍ଧି ପାଉଥିବାବେଳେ ଲୋକଙ୍କ ଦୁଃଖ ବଢାଇଛି ବିଦ୍ୟୁତ କାଟ୍ । ବାରମ୍ବାର ଅଭିଯୋଗ ପରେ ବି କର୍ଣ୍ଣପାତ କରୁନାହିଁ ବିଦ୍ୟୁତ୍ ବିଭାଗ । କୌଣସି ନା କୌଣସି ବାହାନା ଦେଖାଇ ଖସିଯିବାକୁ ଉଦ୍ୟମ କରୁଛନ୍ତି ବିଭାଗର କର୍ମଚାରୀ । ଫଳରେ ବାଧ୍ୟ ହୋଇ ସହରର ଶତାଧିକ ଯୁବକ କେନ୍ଦୁଝର ନେସ୍କୋ କାର୍ଯ୍ୟାଳୟ ସମ୍ମୁଖରେ ଧାରଣା ଦେବା ସହ ଫାଟକ ବନ୍ଦ କରିଛନ୍ତି ।
ଯେପର୍ଯ୍ୟନ୍ତ ଏହି ଅଘୋଷିତ ବିଜୁଳି କାଟର ସମାଧାନ ନ ହୋଇଛି, ସେ ପର୍ଯ୍ୟନ୍ତ ଫାଟକ ନ ଖୋଲିବାକୁ ଧମକ ଦେଇଥିଲେ । ଘଟଣାର ଖବର ପାଇବା ପରେ ସ୍ଥାନୀୟ ଟାଉନ ପୋଲିସ ପହଞ୍ଚି ଯୁବକଙ୍କୁ ବୁଝାସୁଝା କରିବାକୁ ଚେଷ୍ଟା କରିଥିବାବେଳେ ନେସ୍କୋ ଏସଡିଓ ସେଠାରେ ପହଞ୍ଚି ଏନେଇ ଅନୁଧ୍ୟାନ କରାଯିବ ବୋଲି କହିଥିଲେ । ନେସ୍କୋ କର୍ମଚାରୀଙ୍କ ଠାରୁ ଏଭଳି ପ୍ରତିଶୃତି ମିଳିବା ପରେ ଧାରଣାରୁ ହଟିଛନ୍ତି ଯୁବକ ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
