କେନ୍ଦୁଝର: ଦିନକୁ ଦିନ ରାଜ୍ୟରେ ବଢିଚାଲିଛି ସଡକ ଦୁର୍ଘଟଣା । ଫଳରେ ଅକାରଣରେ ଚାଲିଯାଉଛି ନିରୀହ ଲୋକଙ୍କ ଜୀବନ । ସବୁଠାରୁ ଚିନ୍ତାର ବିଷୟ ହେଉଛି କେନ୍ଦୁଝର ଜିଲ୍ଲାରେ ସଡକ ଦୁର୍ଘଟଣା ଏକ ନିତିଦିନିଆ ଘଟଣାରେ ପରିଣତ ହୋଗଲାଣି ।
ଗତକାଲି ପୁଣି ଏକ ଡିଜେ ଗାଡି ଦୁର୍ଘଟଣାଗ୍ରସ୍ତ ହୋଇଛି । ଫଳରେ ଜଣଙ୍କର ମୃତ୍ୟୁ ହେବା ସହ 4ଜଣ ଗୁରୁତର ଆହତ ହୋଇଛନ୍ତି । ସୂଚନା ମୁତାବକ ଆନନ୍ଦପୁର ଥାନା ପଣସଗଡ଼ିଆ ଗ୍ରାମରୁ ଏକ ବିବାହ ଉତ୍ସବ ପାଇଁ ପାଟଣା ବ୍ଲକ ନୂଆଗାଁ ଗ୍ରାମକୁ ଉକ୍ତ ଡିଜେ ଗାଡିଟି ଆସିଥିଲା ।
ତେବେ ବିବାହ ସାରି ଫେରୁଥିବାବେଳେ ପାଟଣା ଥାନା ଭୀମକୁଣ୍ଡ ରାସ୍ତାର ଏରେଣ୍ଡେଇ ବାଙ୍କ ନିକଟରେ ଭାରସାମ୍ୟ ହରାଇ ଡିଜେ ଗାଡି ଦୁର୍ଘଟଣାଗ୍ରସ୍ତ ହୋଇଛି । ଫଳରେ ଗାଡିରେ ଚାପି ହୋଇ ଜଣେ ମୃତ୍ୟୁବରଣ କରିଛନ୍ତି । ମୃତକ ଜଣକ ହେଉଛନ୍ତି ଚକ୍ର ଶୁଣ୍ଢି । ଗୁରୁତର ଆହତ ହୋଇଥିବା ବ୍ୟକ୍ତିମାନେ ହେଉଛନ୍ତି ବୁଦ୍ଧିଆ ସାମାଡ଼, ସାମୁ ବାନ୍ଦ୍ରା, ଶିରିସ ଗାଗରାଇ, ରଘୁନାଥ ଲୋହାର । ସମସ୍ତ ଆହତ ପଣସଗଡ଼ିଆ ଗ୍ରାମର ବୋଲି ଜଣାପଡିଛି ।
ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଆହତଙ୍କୁ ଉଦ୍ଧାର କରି ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
