ବୌଦ୍ଧ: ନିର୍ବାଚନ ପୂର୍ବରୁ ବୌଦ୍ଧ ଜିଲ୍ଲାର କଣ୍ଟାମାଳ ନିର୍ବାଚନ ମଣ୍ଡଳୀରେ ହିଂସା । 2 ଗୋଷ୍ଠୀ ମଧ୍ୟରେ ଦେଖାଦେଇଛି ବିବାଦ । ବିଧାୟକ ପ୍ରାର୍ଥୀ ମହିଧର ରଣା ନିର୍ବାଚନ ପ୍ରଚାର କରୁଥିବାବେଳେ ତାଙ୍କ ଗାଡି ଉପରେ ହୋଇଛି ଆକ୍ରମଣ । ଅସନ୍ତୁଷ୍ଟ ଗୋଷ୍ଠୀ ତାଙ୍କ ଗାଡିକୁ ଭଙ୍ଗାରୁଜା କରିଛନ୍ତି । ପ୍ରାର୍ଥୀ ଓ ଆଶାୟୀ ପ୍ରାର୍ଥୀଙ୍କ ସମର୍ଥକଙ୍କ ମଧ୍ୟରେ ଦେଖାଦେଇଛି ଏହି ଉତ୍ତେଜନା ।
ସୂଚନା ମୁତାବକ, ବୌଦ୍ଧ ଜିଲ୍ଲାର କଣ୍ଟାମାଳ ନିର୍ବାଚନ ମଣ୍ଡଳୀ ପାଇଁ ବିଧାୟକ ପ୍ରାର୍ଥୀ ଭାବେ ବିଜେଡି ମହିଧର ରଣାଙ୍କୁ ଟିକେଟ୍ ଦେଇଛି । ତେବେ ଏହାକୁ ବିରୋଧ କରିଛନ୍ତି ବିଜେଡିର ବହୁ ନେତା । ମହିଧରଙ୍କୁ ବିରୋଧ କରିବା ସହ କଣ୍ଟାମାଳ ଅଞ୍ଚଳର ଜଣାଶୁଣା ପୁରୁଖା ନେତା ତଥା ସ୍ବାଧୀନ ପ୍ରାର୍ଥୀ ଭାବରେ ଲଢୁଥିବା ଶେଷଦେବ ମେହେରଙ୍କୁ ସମର୍ଥନ କରିଛନ୍ତି । ତେବେ ରବିବାର ଦିନ ମହିଧର ରଣା ଘିକୁଣ୍ଡି ପଞ୍ଚାୟତର ରତାଖଣ୍ଡି ଗ୍ରାମରେ ନିର୍ବାଚନ ପ୍ରଚାର କରୁଥିବାବେଳେ ଅସନ୍ତୁଷ୍ଠ ଗୋଷ୍ଠୀର ଲୋକ ତାଙ୍କୁ ବିରୋଧ କରିବା ସହ ମହିଧରଙ୍କ ପ୍ରଚାର ଗାଡିକୁ ଭଙ୍ଗାରୁଜା କରିଛନ୍ତି ।
ଏନେଇ ମନମୁଣ୍ଡା ଥାନାରେ ଏକ ମାମଲା ଦାୟର ହୋଇଥିବାବେଳେ ପୋଲିସ ତଦନ୍ତ ଆରମ୍ଭ କରିଛି । କଣ୍ଟାମାଳ ନିର୍ବାଚନ ମଣ୍ଡଳୀ ଏକ ଉତ୍ତେଜନା ପ୍ରବଣ ଆସନ ହୋଇଥିବା ବାରମ୍ବାର ଅଭିଯୋଗ ହୋଇଆସିଛି । ଏଣୁ ତୁରନ୍ତ ଏନେଇ ବିହିତ ପଦକ୍ଷେପ ଯଥା ସମୟରେ ନିଆନଗଲେ ଆଗକୁ ପରିସ୍ଥିତି ଆହୁରି ଗମ୍ଭୀର ହେବାର ଆଶଙ୍କା ରହିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
