ଖୋର୍ଦ୍ଧା: ବେଗୁନିଆ ନିର୍ବାଚନମଣ୍ଡଳୀର ଶେଷ ହୋଇଛି ଭୋଟ ଗଣତି । ବିଜୟୀ ପ୍ରାର୍ଥୀଙ୍କୁ ଛୁଟୁଛି ଶୁଭେଚ୍ଛାର ସୁଅ । କିଏ ଫୁଲତୋଡା ଦେଇ ଶୁଭେଚ୍ଛା ଜଣାଉଛି ତ ଆଉ କିଏ ଆଲିଙ୍ଗନ କରୁଛି । ଏଭଳି କିଛି ଦୃଶ୍ୟ ଦେଖିବାକୁ ମିଳିଥିଲା ବେଗୁନିଆ ନିର୍ବାଚନ ମଣ୍ଡଳୀରେ । ନବ ନିର୍ବାଚିତ ବିଜେଡି ପ୍ରାର୍ଥୀ ରାଜେନ୍ଦ୍ର କୁମାର ସାହୁଙ୍କ ବାସଭବନରେ ତାଙ୍କ ସମର୍ଥକଙ୍କ ଭିଡ ଦେଖିବାକୁ ମିଳିଛି ।
ଚଳିତ ସାଧାରଣ ନିର୍ବାଚନରେ ବେଗୁନିଆରେ ଦ୍ଵିମୁଖୀ ଲଢେଇ ହୋଇଥିଲା । ବିଜେଡି ପ୍ରାର୍ଥୀ ରାଜେନ୍ଦ୍ର କୁମାର ସାହୁ ନିଜ ନିକଟତମ ପ୍ରତିଦ୍ବନ୍ଦୀ କଂଗ୍ରେସ ପ୍ରାର୍ଥୀ ପ୍ରଦୀପ କୁମାର ସାହୁଙ୍କୁ 20,048 ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଛନ୍ତି । 73,178 ଖଣ୍ଡ ଭୋଟ ପାଇ ରାଜେନ୍ଦ୍ର ବିଜୟ ହାସଲ କରିଥିଲେ । ସେହିପରି କଂଗ୍ରେସ ପ୍ରାର୍ଥୀ ପ୍ରଦୀପ କୁମାର ସାହୁ 53,130 ଖଣ୍ଡ ଭୋଟ ପାଇ ଦ୍ଵିତୀୟ ଏବଂ ବିଜେପି ପ୍ରାର୍ଥୀ ରିଷଭ ନନ୍ଦ 26,321 ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଥିଲେ ।
ତେବେ ରାଜେନ୍ଦ୍ର ନିଜ ବିଜୟର ଶ୍ରେୟ ଦଳୀୟ ସୁପ୍ରିମୋ ନବୀନ ପଟ୍ଟନାୟକ ଓ ବେଗୁନିଆ ଏବଂ ବୋଲଗଡବାସୀଙ୍କୁ ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
