ଅନୁଗୋଳ: ଦୁସ୍ଥ ଅସହାୟ କଳାକାରଙ୍କ ପାଇଁ ରାଜ୍ୟ ସରକାରଙ୍କ 'କଳାକାର ଭତ୍ତା' ଯୋଜନା । ହେଲେ ଅନେକ କଳାକାର ଏହି ଯୋଜନାରୁ ବଞ୍ଚିତ । ଏଭଳି ଅଭିଯୋଗ କରିଛନ୍ତି ଅନୁଗୋଳ ଜିଲ୍ଲା ବଅଁରପାଳ ବ୍ଲକ ମହୀଧରପୁର ଗାଁର କଳାକାର । ଗାଁର ପ୍ରାୟ 20ରୁ ଊର୍ଦ୍ଧ୍ବ କଳାକାର ନିଜ ନିଜ କ୍ଷେତ୍ରରେ କଳା ସାଧନ କରି ସଂସ୍କୃତିକୁ ବଞ୍ଚାଇ ରଖିଛନ୍ତି । ହେଲେ ସରକାରଙ୍କ ଅବହେଳା କାରଣରୁ ଅସହାୟ ଜୀବନ ଅତିବାହିତ କରୁଥିବା ଅଭିଯୋଗ କରିଛନ୍ତି ।
କେବଳ ମହୀଧରପୁର ନୁହେଁ, ଜିଲ୍ଲାର ୮ଟି ବ୍ଲକରେ କଳାକାରଙ୍କ ସମାନ ସ୍ଥିତି । ଜିଲ୍ଲାର ମୋଟ ୭ ହଜାର ୩୮ ଜଣ ଭତ୍ତା ପାଇଁ ଆବେଦନ କରିଥିବା ବେଳେ ଜିଲ୍ଲା ବାହାରୁ ୨୩ ଶହ ୫୭ ଜଣ କଳାକାର ଭତ୍ତା ପାଇଁ ଆବେଦନ କରିଛନ୍ତି । କିନ୍ତୁ ସରକାର ମାତ୍ର ୧୩ ଶହ ୯୫ ଜଣ କଳାକାରଙ୍କୁ ଭତ୍ତା ଦେବାକୁ ଅନୁମତି ଦେଇଛନ୍ତି । ଫଳରେ ଅନ୍ୟ କଳାକାରମାନେ କଳା ସାଧନାରେ ନିଜ ସମୟ ବିତାଇ ଏବେ ଅସହାୟ ଜୀବନ ବିତାଉଛନ୍ତି । ଆଉ ନିଜ ପ୍ରାପ୍ୟ ପାଇବାକୁ ଅବେଦନ ପତ୍ର ଖଣ୍ଡେ ଧରି ବାରମ୍ବାର ସରକାରୀ କାର୍ଯ୍ୟାଳୟର ଦ୍ବାରସ୍ଥ ହେଉଛନ୍ତି । ତଥାପି ସେମାନଙ୍କୁ କଥାକୁ କେହି କର୍ଣ୍ଣପାତ କରୁନାହାନ୍ତି ।
ସାରା ଜୀବନ ଦେଶର କଳା ଓ ସଂସ୍କୃତି ବଞ୍ଚାଇ ରଖିବାରେ ଅତିବାହିତ କରିଥିବାବେଳେ ସରକାର କେବେ ସେମାନଙ୍କୁ ତାଙ୍କ ପ୍ରାପ୍ୟ ପ୍ରଦାନ କରିବେ ତାହା ସମୟ କହିବ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
