ବରଗଡ: ବରଗଡ ପୋଲିସକୁ ମିଳିଛି ବିରାଟ ବଡ ସଫଳତା । ପ୍ରଥମ ଥର ପାଇଁ ଏକ ଘଟଣାରେ ପୋଲିସ ତିନୋଟି ରାଜ୍ୟରୁ ଅପରାଧୀଙ୍କୁ ଗିରଫ କରିବାରେ ସଫଳ ହୋଇଛି । ଗତ ୧୦ ତାରିଖରେ ବରଗଡ ଟାଉନ ଥାନା ଅନ୍ତର୍ଗତ ଜମୁଡା ଗ୍ରାମରେ ହୋଇଥିବା ହତ୍ୟାକାଣ୍ଡ ଘଟଣାରେ ପୋଲିସ ମାତ୍ର ୧୯ ଦିନ ମଧ୍ୟରେ ୫ ଜଣ ଅପରାଧୀଙ୍କୁ ଭିନ୍ନ ଭିନ୍ନ ରାଜ୍ୟରୁ ଧରି ଏହି ହତ୍ୟାକାଣ୍ଡ ପର୍ଦାଫାସ କରିଛି ।
ଗତ 10 ତାରିଖରେ ଜମୁଡା ଗ୍ରାମର ହିରାଳାଳ ମହନ୍ତଙ୍କ ଘରକୁ ଲୁଟ କରିବା ଉଦ୍ଦେଶ୍ୟରେ ୫ ଜଣ ଡକାୟତ ଯାଇଥିବା ବେଳେ ଛାତ ଉପରେ ଶୋଇଥିବା ହିରାଳାଳଙ୍କ ସଳା ବସନ୍ତ ପ୍ରଧାନଙ୍କୁ ଡକାୟତ ଦଳ କାବୁ କରିବାକୁ ଚେଷ୍ଟା କରିଥିଲେ ହେଲେ ବସନ୍ତଙ୍କୁ କାବୁ କରିବାରେ ବିଫଳ ହେବାରୁ ବସନ୍ତଙ୍କୁ ଗୁଳିକରି ହତ୍ୟା କରିଥିଲେ ଅପରାଧି । ହତ୍ୟାକାଣ୍ଡ ଘଟାଇ ଅଭିଯୁକ୍ତ ମାନେ ସୋହେଲା ଥାନା ଅନ୍ତର୍ଗତ ତବଡାରେ ଥିବା ପ୍ରସିଦ୍ଧ ବାବା ସୁରେନ ମଲ୍ଲିକଙ୍କ ମଠରେ ଆତ୍ମଗୋପନ କରିଥିଲେ ।
ତେବେ ବାବା ପୋଲିସ ନଜରରେ ଥିବା ଜାଣିପାରି ବାବା ଫେରାର ହୋଇଯାଇଥିଲେ ଗୌହାଟିକୁ । କିନ୍ତୁ ଆକ୍ସନ ମୁଡରେ ଥିବା ବରଗଡ ପୋଲିସ ଗୌହାଟି ଯାଇ ବାବାଙ୍କୁ ଗିରଫ କରିଥିଲା । ପରେ ଘଟଣାର ଖୋଳତାଡ଼ କରି ଘଟଣାରେ ସଂପୃକ୍ତ ଥିବା ଉତ୍ତର ପ୍ରଦେଶର ଲାଲ ବିବେକ ସିଂହ , ବିହାରର ରାଜେଶ ସିଂହ ଓ ବଲାଙ୍ଗିର ଜିଲ୍ଲାର ମନୋଜ ବଢିଆଙ୍କୁ ବରଗଡ ପୋଲିସ ଝାଡଖଣ୍ଡରୁ ଗିରଫ କରିଛି ।
ସେହିପରି ବରପାଲି ଠାରେ ବନ୍ଧୁକ ଦେଖାଇ ଲୁଟ ଉଦ୍ୟମ କରୁଥିବା ବେଳେ ଲୋକଙ୍କ ହାତରେ ଧରାପଡିଥିବା ଟୁନୁ ମାଝୀ ମଧ୍ୟ ଏହି ହତ୍ୟାକାଣ୍ଡ ଘଟଣାରେ ସମ୍ପୃକ୍ତ ରହିଥିବା ବେଳେ ଅନ୍ୟ ଜଣେ ଅଭିଯୁକ୍ତ ଆମ୍ବାଭୋନାର ରାକେଶ ବେହେରା ନିଜ ମୁଣ୍ଡରେ ବନ୍ଧୁକ ଲଗାଇ ଆତ୍ମହତ୍ୟା କରିଥିବା ଜଣାପଡିଛି ।ହେଲେ ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଯେଉଁ ବନ୍ଧୁକରେ ବସନ୍ତ ପ୍ରଧାନଙ୍କୁ ହତ୍ୟା କରାଯାଇଥିଲା ସେହି ବନ୍ଧୁକରେ ଅପରାଧୀ ରାକେଶ ବେହେରା ନିଜେ ଆତ୍ମହତ୍ୟା କରିଥିଲା ଏବଂ ପରେ ସେହି ବନ୍ଧୁକ ଧରି ଟୁନୁ ମାଝି ନିଜେ ବରପାଲି ଠାରେ ଲୁଟ ଉଦ୍ୟମ କରୁଥିବା ସମୟରେ ଧରାପଡିଥିଲା ।
ଏହି ଘଟଣାରେ ପୋଲିସ ଅପରାଧୀଙ୍କ ଠାରୁ ତିନୋଟି ବନ୍ଧୁକ , ଜୀବନ୍ତ ଗୁଳି , ତିନୋଟି ବାଇକଓ ଗୋଟେ ହ୍ୟୁଣ୍ଡାଇ କାର ଜବତ କରିଛି । ଏହାସହ ସମସ୍ତ ଅଭିଯୁକ୍ତଙ୍କୁ ବରଗଡ ପୋଲିସ କୋର୍ଟ ଚାଲାଣ କରିଛି । ବହୁତ କମ ଦିନ ମଧ୍ୟରେ ବରଗଡ ପୋଲିସ ଏହି ହତ୍ୟାକାଣ୍ଡର ପର୍ଦାଫାସ କରିବା ସହ ସମସ୍ତଙ୍କୁ ଗିରଫ କରିଥିବାରୁ ଜିଲ୍ଲାବାସୀ ପୋଲିସକୁ ପ୍ରଶଂସା କରୁଛନ୍ତି ।
ବରଗଡରୁ ରାଜେଶ ସରାଫ, ଇଟିଭି ଭାରତ
