ଯାଜପୁର: ସାରା ଦେଶରେ ଏବେ ନିର୍ବାଚନୀ ମାହୋଲ । ନିର୍ବାଚନକୁ ମୁକ୍ତ, ଅବାଧ ଓ ଶାନ୍ତିଶୃଙ୍ଖଳା କରିବାକୁ ନିର୍ବାଚନ ଆୟୋଗ ପକ୍ଷରୁ ନିର୍ବାଚନୀ ଆଚରଣ ବିଧି ଲାଗୁ କରାଯାଇଥିଲା । ତେବେ ବିଭିନ୍ନ ରାଜ୍ୟରେ ପ୍ରଥମ ପର୍ଯ୍ୟାୟ ନିର୍ବାଚନ ଶେଷ ହେଇଥିବା ବେଳେ ଆଗକୁ 3ଟି ପର୍ଯ୍ୟାୟ ନିର୍ବାଚନ ବାକି ରହିଛି । ଏହି ପରିପ୍ରେକ୍ଷୀରେ ରାଜ୍ୟର ବିଭିନ୍ନ ସ୍ଥାନରେ ଫ୍ଲାଇଂ ସ୍କ୍ବାର୍ଡ ନିର୍ବାଚନ ପାଇଁ ବିଭିନ୍ନ ସ୍ଥାନରେ ଚଢାଉ କରି ଗାଡି ଗୁଡିକ ଯାଞ୍ଚ କରୁଛନ୍ତି । ଏହି ଯାଞ୍ଚ ବେଳେ ସୁକିନ୍ଦା ନିର୍ବାଚନମଣ୍ଡଳୀର ଗରାମିଆଁ ରେଙ୍ଗାଲି ବନ୍ଧରେ 14 ଲକ୍ଷ ଟଙ୍କା ଜବତ ହୋଇଛି ।
ସୂଚନାନୁସାରେ ଏନସିସି ଟ୍ରାନ୍ସପୋର୍ଟ କମ୍ପାନୀ ଏକ ବୋଲେରୋ ଗାଡିରେ ରେଙ୍ଗାଲି ବନ୍ଧ ଦେଇ ଏହି ଟଙ୍କା ନେଇ ଯାଉଥିଲା । ଏହି ସମୟରେ ସେହି ରାସ୍ତାରେ ଫ୍ଲାଇଂ ସ୍କ୍ବାର୍ଡ ଟିମ୍ ଓ କାଳିଆପାଣି ପୋଲିସ ଗାଡି ଗୁଡିକୁ ଯାଞ୍ଚ କରୁଥିଲେ । ମାତ୍ର ଉକ୍ତ ରାସ୍ତାରେ ଗାଡି ଯାଞ୍ଚ ହେଉଥିବା ଦେଖି ଅର୍ଦ୍ଧନିର୍ମିତ ରାସ୍ତା ଦେଇ ଖସି ପଳାଇବାକୁ ଚେଷ୍ଟା କରୁଥିଲା ଅଭିଯୁକ୍ତ । କିନ୍ତୁ ସ୍କ୍ବାର୍ଡ ଉକ୍ତ ଗାଡିକୁ ଗୋଡେଇ ଗୋଡେଇ ଧରିଥିଲେ ।
ତେବେ ଜବତ ନଗଦ ଟଙ୍କା ସମ୍ପର୍କରେ ଖୋଳତାଡ ଆରମ୍ଭ କରାଯାଇଥିବା ବେଳେ କୌଣସି ରାଜନୈତିକ ଦଳ ନିମନ୍ତେ ଟଙ୍କା ଗୁଡିକ ନିକଟସ୍ଥ ଗ୍ରାମକୁ ଯାଉଥିବା ପୋଲିସ ସନ୍ଦେହ କରୁଛି । ଉକ୍ତ ମାମଲାରେ ପୋଲିସ 3ଜଣଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
