ଦିସପୁର: ଆସାମର ପ୍ରମୁଖ ସହର ଗୌହାଟିରେ ଧୀରେ ଧୀରେ ବୃଦ୍ଧି ପାଇବାରେ ଲାଗିଛି ଅପରାଧିକ କାର୍ଯ୍ୟ । ଆପାର୍ଟମେଣ୍ଟ ମାଲିକଙ୍କ ପୁଅ ହତ୍ୟାକାଣ୍ଡ ଘଟାଇଥିବା ହୋଇଛି ଅଭିଯୋଗ । ଅଭିଯୁକ୍ତ ଜଣକ ନିଜ ବନ୍ଧୁକୁ ହତ୍ୟା କରିବା ପରେ ମୃତଦେହକୁ ସ୍କୁଟିରେ ବୋହି ଅନ୍ୟତ୍ର ଫିଙ୍ଗିଥିବା ପଡ଼ୋଶୀମାନେ ଅଭିଯୋଗ କରିଛନ୍ତି । ଏହି ଘଟଣା ସମ୍ପର୍କରେ ଖବର ପାଇବା ପରେ ପୋଲିସ ଅଭିଯୁକ୍ତ ଯୁବକକୁ ଗିରଫ କରିଛି ।
ମିଳିଥିବା ସୂଚନା ଅନୁସାରେ ଗୌହାଟି ନୁନମତି ଗଣେଶ ମନ୍ଦିର ରୋଡ ନିକଟରୁ ଏକ ମୃତଦେହକୁ ପୋଲିସ ଉଦ୍ଧାର କରିଛି । ଉକ୍ତ ମୃତକ ଜଣକ ବାମୁନିମୈଦାନ ରେଲୱେ କଲୋନି ଅଧିବାସୀ ରୋହିତ ଦର୍ଜି ବୋଲି ଜଣାପଡ଼ିଛି । ରୋହିତ ବିଜୟା ଜ୍ୟୋତି ଆପାର୍ଟମେଣ୍ଟର ରହୁଥିଲେ । ଶନିବାର ସନ୍ଧ୍ୟା 6ଟାରେ ଘଟିଛି ଏହି ହତ୍ୟାକାଣ୍ଡ । ରୋହିତଙ୍କୁ ପିଟି ପିଟି ହତ୍ୟା କରାଯାଇଥିବା ହୋଇଛି ଅଭିଯୋଗ । ମୃତକ ରୋହିତ ଅଧିକାଂଶ ସମୟ ଆପାର୍ଟମେଣ୍ଟ ମାଲିକଙ୍କ ପୁଅ ଶୁଭ୍ରଜିତ ବୋରା ସହିତ ରହୁଥିଲେ ।
ଏହା ବି ପଢନ୍ତୁ-ବନ୍ଧୁ ସାଜିଲା ବଇରି: ମୟୁରଭଞ୍ଜରେ ହତ୍ୟା କରି ରାଜଧାନୀରୁ ଗିରଫ ହତ୍ୟାକାରୀ
ଶୁଭ୍ରଜିତ ହିଁ ତାଙ୍କୁ ହତ୍ୟା କରିଛି ବୋଲି ଅଭିଯୋଗ ହୋଇଛି । ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ ଶୁଭ୍ରଜିତ ନିଜ ସ୍କୁଟିରେ ରୋହିତଙ୍କ ମୃତଦେହକୁ ରଖି ଯାଉଥିବା ସେମାନେ ଦେଖିଛନ୍ତି । ସ୍କୁଟିରେ ମୃତଦେହକୁ ବୋହି ନେବା ପରେ ସେ ଲେନ 4 ନିକଟରେ ଥିବା ଗଣେଶ ମନ୍ଦିର ରାସ୍ତାକଡ଼ରେ ଫିଙ୍ଗି ଦେଇଥିବା ଅନୁମାନ କରାଯାଉଛି । କାରଣ ସେହିଠାରୁ ହିଁ ମୃତଦେହକୁ ପୋଲିସ ଉଦ୍ଧାର କରିଛି । ଏନେଇ ରୋହିତଙ୍କ ପିତା ନୁନମତି ପୋଲିସ ଷ୍ଟେସନରେ ଅଭିଯୋଗ କରିଛନ୍ତି ।
ଏହା ବି ପଢନ୍ତୁ- ସାଙ୍ଗକୁ ମାରି ପୋତିଦେଇଥିଲା ଅଭିଯୁକ୍ତ, 20 ବର୍ଷ ପରେ କଙ୍କାଳ ଉଦ୍ଧାର !
ପୋଲିସ ଅଭିଯୋଗ ମୁତାବକ ତଦନ୍ତ ଆରମ୍ଭ କରିଛି । ଉକ୍ତ ଆପାର୍ଟେମଣ୍ଟର ସିସିଟିଭି ଫୁଟେଜ ମଧ୍ୟ ଯାଞ୍ଚ କରିଛି ପୋଲିସ । ଏଥିରେ ସ୍ପଷ୍ଟ ଭାବେ ଦେଖିବାକୁ ମିଳିଛି ଯେ ଶୁଭ୍ରଜିତ ରୋହିତଙ୍କ ମୃତଦେହକୁ ସ୍କୁଟିରେ ବୋହି କେଉଁ ଆଡେ ଚାଲିଯାଉଛି । ନିଶା ଖାଇବା ପରେ ଏହି ହତ୍ୟାକାଣ୍ଡ ଘଟିଥିବା ପୋଲିସ ସନ୍ଦେହ କରିଛି । ତେବେ ଅଭିଯୁକ୍ତ ଶୁଭ୍ରଜିତ ଫେରାର ଥିବା ବେଳେ ପୋଲିସ ବିଭିନ୍ନ ସ୍ଥାନରେ ଛାନଭିନ ଆରମ୍ଭ କରିଛି । ରୋହିତଙ୍କୁ ପିଟି ପିଟି ହତ୍ୟା କରାଯାଇଥିବା ପୋଲିସ କହିଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
