କାବୁଲ: ଏଣିକି ପୃଥକ ଭାବେ ବିଶ୍ବବିଦ୍ୟାଳୟରେ ପାଠ ପଢିବେ ଆଫଗାନିସ୍ତାନର ମହିଳା। ଏନେଇ ଆଜି (ରବିବାର)ନୂତନ ତାଲିବାନ ସରକାରର ଉଚ୍ଚଶିକ୍ଷା ମନ୍ତ୍ରୀ କହିଛନ୍ତି କି ଆଫଗାନିସ୍ତାନର ମହିଳାମାନେ ସ୍ନାତକୋତ୍ତର ପାଠ ବିଶ୍ବବିଦ୍ୟାଳୟରେ ଅଧ୍ୟୟନ କରିପାରିବେ କିନ୍ତୁ, ଶ୍ରେଣୀଗୃହ ଲିଙ୍ଗଗତ ଭାବେ ପୃଥକ ହେବ ଏବଂ ଇସଲାମିକ ପୋଷାକ ପରିଧାନ ବାଧ୍ୟତାମୂଳକ କରାଯିବ ।
ତେବେ ଆଫଗାନିସ୍ତାନର ନୂତନ ଶାସକମାନେ ଏକ ପୁରୁଷ ସରକାର ଗଠନ କରିବାର କିଛି ଦିନ ପରେ ଏକ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ଅବଦୁଲ ବାକୀ ହକ୍କାନି ଏହି ନୂତନ ନୀତି ପ୍ରଣୟନ କରିଛନ୍ତି । ଏନେଇ ଶନିବାର ତାଲିବାନ ପକ୍ଷରୁ ରାଷ୍ଟ୍ରପତି ଭବନରେ ପତାକା ଉତ୍ତୋଳନ କରି ନୂତନ ସରକାରଙ୍କ କାର୍ଯ୍ୟ ଆରମ୍ଭ ହେବାନେଇ ସଙ୍କେତ ଦେଇଛି ।
ସୂଚନାନୁସାରେ 1990 ଦଶକର ଶେଷ ଭାଗରେ ତାଲିବାନ କ୍ଷମତାରେ ଥିବା ପ୍ରଥମ ଥର ଠାରୁ କେତେ ପରିମାଣରେ ଭିନ୍ନ ଭାବରେ କାର୍ଯ୍ୟ କରିପାରିବ ତାହା ଦେଖିବା ପାଇଁ ବିଶ୍ବ ତୀକ୍ଷ୍ଣ ନଜର ରଖିଛି । ସେହି ସମୟରେ, ବାଳିକା ଏବଂ ମହିଳାମାନଙ୍କୁ ଶିକ୍ଷା ଦିଆଯାଉ ନଥିଲା ଏବଂ ସାଧାରଣ ଜୀବନ ଯାପନରୁ ବାଦ ଦିଆଯାଇଥିଲା ।
ସେପଟେ ତାଲିବାନ ପରାମର୍ଶ ଦେଇଛି କି ମହିଳାଙ୍କ ପ୍ରତି ସେମାନଙ୍କ ମନୋଭାବକୁ ମିଶାଇ ସେମାନେ ପରିବର୍ତ୍ତନ କରିଛନ୍ତି । ତେବେ ମହିଳାମାନଙ୍କୁ କ୍ରୀଡା ଉପରେ ବାରଣ କରାଯାଇଛି ଏବଂ ତାଲିବାନ ସମାନ ଅଧିକାର ଦାବି କରୁଥିବା ମହିଳା ବିରୋଧୀ ମାନଙ୍କ ପ୍ରତି ହିଂସା ପ୍ରଦର୍ଶନ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
