ମୁମ୍ବାଇ: ପଶୁପକ୍ଷୀଙ୍କ ପ୍ରତି ବର୍ବରତାର ସବୁ ସୀମା ଟପୁଛି ମଣିଷ । ନିଜର ସ୍ବାର୍ଥରେ ସାମାନ୍ୟ ହାନୀ ଘଟିଲେ ହରାଇ ବସୁଛି ମାନବିକତା । ଏପରି ଏକ ବର୍ବର ଘଟଣା ଦେଖିବାକୁ ମିଳିଛି ମହାରାଷ୍ଟ୍ର ପୁଣେରେ । ଝିଅକୁ କୁକୁର କାମୁଡିବାରୁ କଲୋନୀ ସାରା ବୁଲି ବୁଲି କୁକୁର ଛୁଆଙ୍କୁ ଖୋଜି ଖୋଜି ହତ୍ୟା କରିବାରେ ଲାଗିଛନ୍ତି ଜଣେ ମହିଳା । ଏପର୍ଯ୍ୟନ୍ତ ଦୁଇ ନିରୀହ କୁକୁର ଛୁଆ ମଧ୍ୟ ମହିଳାଙ୍କ ଦ୍ବାରା ହତ୍ୟାର ଶିିକାର ହୋଇସାରିଲାଣି ।
ହାତରେ ଏକ ବାଡି ଧରି ମହିଳାଜଣଙ୍କ କୁକୁର ଛୁଆଙ୍କୁ ହତ୍ୟା କରିବା ପାଇଁ ଖୋଜୁଥିବାର ଏକ ଭିଡିଓ ସୋସାଇଟିରେ ଲାଗିଥିବା କ୍ୟାମେରାରେ କଏଦ ମଧ୍ୟ ହୋଇଛି । ସିସିଟିଭିରୁ ଘଟଣା ସମ୍ପର୍କରେ ଜଣାପଡିବା ସୋସାଇଟିରେ ମହିଳାଙ୍କ ପଡୋଶୀ ମଧ୍ୟ ଏହାକୁ ନିନ୍ଦା କରିବା ସହ ଥାନାର ଦ୍ବାରସ୍ଥ ହୋଇଛନ୍ତି । ସମ୍ପୃକ୍ତ ମହିଳାଙ୍କ ନାମରେ ଏତଲା ଦାଏର ହେବା ସହ ତଦନ୍ତ ଆରମ୍ଭ ହୋଇଛି ।
ମିଳିଥିବା ସୂଚନା ଅନୁସାରେ ସମ୍ପୃକ୍ତ ମହିଳାଙ୍କ ନାମ ଅନୀତା ଦିଲ୍ଲୀପ ଖାତପେ । ଗତ କିଛି ଦିନ ତଳେ ଏକ କୁକୁର ଅନୀତାଙ୍କ ଝିଅକୁ କାମୁଡି ଦେଇଥିଲା । ଫଳରେ କ୍ରୋଧାନ୍ବିତ ହୋଇ ଅନୀତା କଲୋନୀରେ ଥିବା ସମସ୍ତ କୁକୁରଙ୍କୁ ହତ୍ୟା କରିବା ପାଇଁ ଚାହିଁଥିଲେ । ହାତରେ ଏକ ବାଡି ଧରି ସେ କୁକୁରଙ୍କୁ ଖୋଜୁଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ଦୁଇ କୁକୁର ଛୁଆଙ୍କୁ ପିଟିପିଟି ମାରି ମଧ୍ୟ ସାରିଲେଣି ।
ଘଟଣା ସମ୍ପର୍କରେ ଜଣାପଡିବା ପରେ ସେ ରହୁଥିବା କଲୋନୀରେ ମଧ୍ୟ ଏପରି ବର୍ବର କାଣ୍ଡକୁ ବିରୋଧ ଦେଖିବାକୁ ମିଳିଛି । ଲାଗିଥିବା ସିସିଟିଭିରେ ଅନୀତା ଏପରି କାଣ୍ଡ ଭିଆଉଥିବା ସ୍ପଷ୍ଟ ହେବା ପରେ କଲୋନୀରେ ରହୁଥିବା ଜଣେ ନୀତା ଆନନ୍ଦ ବିଦଲନ ନାମକ ଜଣେ ପଡୋଶୀ ମହିଳା ସ୍ଥାନୀୟ ହାଦପସର ପୋଲିସ ଷ୍ଟେସନରେ ଏତଲା ଦାଏର କରିଛନ୍ତି । ଏତଲା ଆଧାରରେ ପୋଲିସ ଘଟଣାକୁ ଗମ୍ଭୀରତାର ସହ ନେଇ ତଦନ୍ତ ଆରମ୍ଭ କରିଛି । ସିସିଟିଭିରେ କଏଦ ହୋଇଥିବା ଫୁଟେଜକୁ ଯାଞ୍ଚ କରାଯାଉଛି । ତଦନ୍ତର ଫଳାଫଳ ଆଧାରରେ କାର୍ଯ୍ୟାନୁଷ୍ଠାନ ନିଆଯିବା ନେଇ ସ୍ଥାନୀୟ ପୋଲିସ ପକ୍ଷରୁ ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
