ଥିରୁଅନନ୍ତପୁରମ: କେରଳ କସାରଗୋଡ଼ରେ ଥିବା ଅନନ୍ତପୁରମ ସ୍ବାମୀ ମନ୍ଦିର (Ananthapuram Ananthapadmanabha Swamy temple)ର ଈଶ୍ବର ଭକ୍ତ କୁମ୍ଭୀର । ନାଁ ହେଉଛି ବବିୟା (Babiya)। ଏହି କୁମ୍ଭୀରଟି ଏକ ଅସାଧାରଣ କୁମ୍ଭୀର । ଏହି କୁମ୍ଭୀରଟି କାହାରିକୁ କ୍ଷତି ପହଞ୍ଚାଏ ନାହିଁ । ଏପରିକି ପାଣି ମଧ୍ୟରେ ଥିବା ମାଛକୁ ମଧ୍ୟ ଭକ୍ଷଣ କରିନଥାଏ । ଏହାବ୍ୟତୀତ କୁମ୍ଭୀରଟି ଭଗବାନଙ୍କୁ ଆସି ଦର୍ଶନ ମଧ୍ୟ କରିଥାଏ । ତେବେ ଏହି କୁମ୍ଭୀରଟିର ଗତ ରବିବାର ଦିନ ୭୫ ବର୍ଷ ବୟସରେ ମୃତ୍ୟୁ ଘଟିଛି । ବବିୟା ଗତ ଦୁଇ ଦିନ ଧରି ନିଖୋଜ ଥିବା ନେଇ ଜଣାପଡ଼ିଥିଲା ।
ଏହି କୁମ୍ଭୀରଟି ମାଂସାଶୀ ନୁହେଁ, ବରଂ ମନ୍ଦିରରୁ ଦିଆଯାଉଥିବା ଭୋଗକୁ ସେ ଖାଦ୍ୟ ଭାବେ ଗ୍ରହଣ କରିଥାଏ । ବବିୟା କେବେ ବି ମାଛ ଖାଇନଥାଏ । କେହି କେବେ ବି ବବିୟାକୁ କୌଣସି ପ୍ରାଣୀକୁ ଖାଉଥିବାର ଦେଖିନଥିବା କହିଛନ୍ତି । ବବିୟା ଭଗବାନଙ୍କୁ ଆସି ଦର୍ଶନ ମଧ୍ୟ କରିଥାଏ, ଯାହାର ଭିଡ଼ିଓ ନିକଟରେ ଭାଇରାଲ ମଧ୍ୟ ହୋଇଥିଲା । ଲୋକକଥା ଅନୁସାରେ ଇଂରେଜ ଶାସନ ସମୟରେ ଏହି କୁମ୍ଭୀରକୁ ଇଂରେଜମାନେ ଗୁଳି କରି ହତ୍ୟା କରିଥିଲେ । ହ୍ରଦ ମଧ୍ୟରେ ହିଁ କୁମ୍ଭୀରର ମୃତ୍ୟୁ ଘଟିଥିଲା ।
ମାତ୍ର କିଛି ଦିନ ପରେ କୁମ୍ଭୀରଟି ଅଚାନକ ଭାବେ ହ୍ରଦ ମଧ୍ୟରେ ଦେଖିବାକୁ ମିଳିଥିଲା । ଗତ ୨୦୧୯ ମସିହାରେ ବବିୟାର ମୃତ୍ୟୁ ଘଟିଥିବା ଶୁଣିବାକୁ ମିଳିଥିଲା । ମାତ୍ର ମନ୍ଦିର ପ୍ରଶାସନ ଏହାକୁ ଗୁଜବ ବୋଲି କହିଥିଲେ । ହ୍ରଦ ମଝିରେ ଅନନ୍ତପୁରମ ସ୍ବାମୀ ମନ୍ଦିର ରହିଛି । ପ୍ରବଳ ବର୍ଷା ସତ୍ତ୍ବେ କେବେ ବି ଏହି ହ୍ରଦର ଜଳସ୍ତର ବୃଦ୍ଧି ପାଏ ନାହିଁ । ଏଠାରେ ହିଁ ରହୁଥିଲା ବବିୟା ।
ମନ୍ଦିରର ଇତିହାସ:-
ମନ୍ଦିରରେ ପ୍ରବେଶ ଦ୍ବାରରେ ଏକ ଗୁମ୍ଫା ରହିଛି । ଏହି ଗୁମ୍ଫା ଥିରୁଅନନ୍ତପୁରମ ପର୍ଯ୍ୟନ୍ତ ବ୍ୟାପିଛି । ଏହି ମନ୍ଦିରରକୁ ଥିରୁଅନନ୍ତପୁରମର ପ୍ରସିଦ୍ଧ ଅନନ୍ତ ପଦ୍ମନାଭ ସ୍ବାମୀ ମନ୍ଦିରର 'ମଦର ଟେମ୍ପଲ' ବୋଲି କୁହାଯାଏ । କିମ୍ବଦନ୍ତୀ ଅନୁସାରେ ଭଗବାନ ବିଷ୍ଣୁ ଏହି ଅନନ୍ତ ପଦ୍ମନାଭ ସ୍ବାମୀ ମନ୍ଦିରକୁ ଆସିଥିବା ବେଳେ ଥକି ଯାଇଥିଲେ । ନିଜ କ୍ଳାନ୍ତକୁ ଦୂର କରିବା ପାଇଁ ଏଠାରେ ସେ ବିଶ୍ରାମ ନେଇଥିଲେ । ଏଥିଲାଗି ମନ୍ଦିରରେ ଭଗବାନ ବିଷ୍ଣୁଙ୍କ ଶୟନ ଅବସ୍ଥାରେ ଏକ ମୂର୍ତ୍ତି ରହିଛି । ଅନନ୍ତପୁରମ ମନ୍ଦିରରେ ମୂର୍ତ୍ତି ଗୁଡ଼ିକ ପଞ୍ଚଲୋହା ପରିବର୍ତ୍ତେ ଏକ ସ୍ବତନ୍ତ୍ର ଧରଣର ଜୈବିକ ସାମଗ୍ରୀ (organic materials)ରେ ତିଆରି । ଯାହାକି ବହୁତ ମଜବୁତ । ମନ୍ଦିରଟି ୧୦୦୦ ବର୍ଷ ପୁରୁଣା ହୋଇଥିବା ବେଳେ ଏହା ଦମ୍ଭ ଭାବେ ଛିଡ଼ା ହୋଇ ରହିଛି ।
