ନୂଆଦିଲ୍ଲୀ: ବନ୍ଦେ ଭାରତ ଟ୍ରେନ ପାଇଁ ୟୁକ୍ରେନର ଏକ କମ୍ପାନୀରୁ ଭାରତ 36000 ସେଟ ଚକା ମଗାଇଥିଲା । ମାତ୍ର ଋଷ-ୟୁକ୍ରେନ ଯୁଦ୍ଧ ଯୋଗୁଁ ଆମଦାନୀରେ ସମସ୍ୟା ଦେଖାଦେଇଛି । ବର୍ତ୍ତମାନ ମଗାଯାଇଥିବା ଟ୍ରେନର 128 ଚକାକୁ ରୋମାନିଆ ଅଣାଯାଇଛି । ଏଠାରୁ ବିମାନ ସାହାଯ୍ୟରେ ଭାରତକୁ ପଠାଯିବା ନେଇ ସୂଚନା ମିଳିଛି ।
ଏହି ଚକାଗୁଡିକ ୟୁକ୍ରେନର ବ୍ଲାକ ସାଗର ଜାହାଜରୁ ମହାରାଷ୍ଟ୍ରର ଜବାହରଲାଲ ନେହେରୁ ପୋର୍ଟ ଟ୍ରଷ୍ଟ (JNPT)କୁ ପଠାଯିବାକୁ ଯୋଜନା କରାଯାଇଥିଲା । କିନ୍ତୁ ଋଷର ଆକ୍ରମଣ ପରେ ଏହା ସମ୍ଭବ ହୋଇପାରିଲା ନାହିଁ । ମିଳିଥିବା ସୂଚନା ଅନୁଯାୟୀ, ରେଳ ମନ୍ତ୍ରଣାଳୟ ଏବଂ ବୈଦେଶିକ ବ୍ୟାପାର ମନ୍ତ୍ରଣାଳୟର ଉଦ୍ୟମରେ ୟୁକ୍ରେନର ଏକ ଚକା କାରଖାନାରୁ ଟ୍ରକ ଯୋଗେ 128ଟି ଚକା ରୋମାନିୟାକୁ ପଠାଯାଇଛି । ଚଳିତ ବର୍ଷ ଶେଷ ସୁଦ୍ଧା ଦେଶର ପ୍ରମୁଖ ରୁଟରେ 75 ସେମି ହାଇ ସ୍ପିଡ୍ ଟ୍ରେନ୍ ଆରମ୍ଭ ହେବାର ଯୋଜନା ରହିଛି ।
ତେବେ ନିର୍ଦ୍ଧାରିତ ସମୟ ମଧ୍ୟରେ ଭାରତ ବର୍ତ୍ତମାନ ଚେକ ଗଣରାଜ୍ୟ, ପୋଲାଣ୍ଡ ଏବଂ ଆମେରିକା ଠାରୁ ଚକା ମଗାଇଛି । ବିଶ୍ବର ବୃହତ୍ତମ ଚକା ଉତ୍ପାଦନକାରୀ ଦେସ ମଧ୍ୟରୁ ୟୁକ୍ରେନ ଅନ୍ୟତମ । ମାତ୍ର ଋଷର ଆକ୍ରମଣ ପରେ ୟୁକ୍ରେନରେ ବୃହତ ଚକା କାରଖାନା ଗୁଡ଼ିକ ବନ୍ଦ ରହିଛି ।
