ଅମରାବତୀ: ଓଡିଶାରୁ ମାଛ ନେଇ ଆନ୍ଧ୍ର ଯାଉଥିବା ଏକ ମିନିଟ୍ରକ ଶ୍ରିକାକୁଲମରେ ଦୁର୍ଘଟଣାଗ୍ରସ୍ତ ହୋଇଛି । ଫଳରେ ଦୁଇ ଓଡିଆ ଯୁବକଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ମୃତ ଦୁଇ ଯୁବକ ଖୋର୍ଦ୍ଧା ଅଞ୍ଚଳର । ଡ୍ରାଇଭର 22 ବର୍ଷୀୟ ଆଜାରଉଦ୍ଦିନ ଖାନ ହୋଇଥିବା ବେଳେ ଅନ୍ୟ ଜଣେ ମୃତକ ହେଲପର 25 ବର୍ଷୀୟ ଅବଦ୍ଦୁଲ ଖାନ ବୋଲି ଜଣାପଡିଛି ।
କୂଅକୁ ଖସିଲା ମିନିଟ୍ରକ , 2 ଓଡିଆ ଯୁବକ ମୃତ
ମିଳିଥିବା ସୂଚନା ଅନୁସାରେ ଖୋର୍ଦ୍ଧାରୁ ମାଛ ନେଇ ମିନିଟ୍ରକଟି ବିଶାଖାପାଟନମ ଯାଉଥିବାବେଳେ ଶ୍ରିକାକୁଲମ ଜିଲ୍ଲାର କୋତାବମାମଲି ନିକଟରେ ରାସ୍ତା କଡରେ ଥିବା ଏକ କୂଅ ମଧ୍ୟରେ ଖସି ପଡିଥିଲା । ଫଳରେ ଉକ୍ତ ମିନି ଭ୍ୟାନରେ ଥିବା ଦୁଇ ଜଣ ଘଟଣାସ୍ଥଳରେ ପ୍ରାଣ ହରାଇଥିଲେ । ଖବର ପାଇ ସ୍ଥାନୀୟ ପୋଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଗାଡି ଭିତରୁ 2 ମୃତଦେହ ଉଦ୍ଧାର କରିଛି । ଦୁର୍ଘଟଣାର କାରଣ ଏଯାଏ ସ୍ପଷ୍ଟ ହୋଇନଥିବା ବେଳେ ଗାଡିଟି ଭାରସ୍ୟାମ ହରାଇ ରସ୍ତା କଡରେ ଥିବା କୂଅକୁ ଖସି ପଡିଥାଇପାରେ ବୋଲି ଅନୁମାନ କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
