ନୂଆଦିଲ୍ଲୀ: ଦେଶର ବରିଷ୍ଠ ନାଗରିକ ଏବଂ ଦିବ୍ୟାଙ୍ଗ, ଯେଉଁମାନେ କି ଟୀକାକରଣ କେନ୍ଦ୍ରକୁ ଆସିପାରିବେ ନାହିଁ ସେମାନଙ୍କ ଟୀକାକରଣ ପାଇଁ କେନ୍ଦ୍ର ସରକାର ଏକ ରଣନୀତି ପ୍ରସ୍ତୁତ କରିଛନ୍ତି । ଏନେଇ କେନ୍ଦ୍ର ସରକାର ଆଜି(ଶନିବାର) ସୁପ୍ରିମକୋର୍ଟଙ୍କୁ ସୂଚନା ଦେଇଛନ୍ତି ।
କେନ୍ଦ୍ର କହିଛି ଯେ ଟୀକାକରଣ କେନ୍ଦ୍ରକୁ ଦିବ୍ୟାଙ୍ଗ କିମ୍ବା ବରିଷ୍ଠ ନାଗରିକ କିପରି ସୁବିଧାରେ ଆସିପାରିବେ ସେନେଇ ଦୃଷ୍ଟି ଆକର୍ଷଣ କରାଯାଇଛି । ନିର୍ଦ୍ଦେଶାବଳୀ ଅନୁଯାୟୀ ସମସ୍ତ ସତର୍କତା ଏବଂ ନିରାପତ୍ତା ନିୟମ ମାନି ଏହି ଟୀକାକରଣ କେନ୍ଦ୍ରଗୁଡିକୁ ଘରର ପାଖାପାଖି ରଖିବାକୁ ନିଷ୍ପତ୍ତି ନିଆଯାଇଛି ।
ଏତତ୍ ବ୍ୟତୀତ କେନ୍ଦ୍ର କହିଛି ଯେ, ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଗଠିତ ଏକ କମିଟି, ଏ ବାବଦରେ ଜଣାଥିବା ବିଶେଷଜ୍ଞମାନଙ୍କୁ ନେଇ ଗଠିତ ହେବ । ଏକ କମିଟି ଏହାର ମୂଲ୍ୟାଙ୍କନ କରିବ ଏବଂ ଘର ନିକଟରେ ଥିବା କୋଭିଡ ଟୀକାକରଣ କେନ୍ଦ୍ରର ରଣନୀତି ଉପରେ ସୁପାରିଶ କରିବ, ଯାହାଦ୍ୱାରା ବିଶେଷ ଆବଶ୍ୟକତା ଥିବା ବୃଦ୍ଧ ଏବଂ ଭିନ୍ନକ୍ଷମମାନେ ସୁବିଧା ପାଇବେ ।
ସରକାର କହିଛନ୍ତି ଯେ, ସରକାରୀ ତଥା ବେସରକାରୀ ବିଶେଷଜ୍ଞଙ୍କୁ ନେଇ କୋଭିଡ -19 ଟୀକାକରଣ ଉପରେ ଜାତୀୟ ବିଶେଷଜ୍ଞ ଗୋଷ୍ଠୀ ମଧ୍ୟ ଏହି ରଣନୀତିକୁ ସମର୍ଥନ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
