ନୂଆଦିଲ୍ଲୀ: ତ୍ରିକୋଣୀୟ ପ୍ରେମରୁ ବୀଭତ୍ସ ହତ୍ୟା । ପ୍ରେମିକାର ଫଟୋ ଡିଲିଟ୍ ନ କରିବାରୁ ଯୁବକଙ୍କୁ ଗଳାଚିପି ହତ୍ୟା କରିବା ପରେ ନାଳରେ ଫିଙ୍ଗିଲା ଅନ୍ୟ ପ୍ରେମିକ । ରାଜଧାନୀ ଦିଲ୍ଲୀରୁ ତ୍ରିକୋଣୀୟ ପ୍ରେମର ଏଭଳି କରୁଣ ପରିଣତି ସାମ୍ନାକୁ ଆସିଛି । ପ୍ରେମିକାର ଅନ୍ୟ ଜଣେ ଯୁବକଙ୍କ ସହ ମିଳାମିଶାକୁ ସହି ନପାରି ପ୍ରେମିକ ତାଙ୍କୁ ହତ୍ୟା କରିଥିବା ଜଣାପଡିଛି । ବଡ କଥା ହେଉଛି, ଅଭିଯୁକ୍ତ ଯୁବକଙ୍କୁ ହତ୍ୟା କରିବା ପରେ କାର୍ରେ ମୃତଦେହ ରଖି ଦୁଇ ଘଣ୍ଟା କାଳ ଦିଲ୍ଲୀ ରାଜରାସ୍ତାରେ ବୁଲିଥିଲା । ହେଲେ ଏ ସମ୍ପର୍କରେ ପୋଲିସ ସାମାନ୍ୟତମ ସୁରାକ ନ ପାଇବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଶେଷରେ ନାଳରୁ ମୃତଦେହ ମିଳିବା ପରେ ପୁରା ଘଟଣା ସାମ୍ନାକୁ ଆସିଛି ।
ସୂଚନା ଅନୁଯାୟୀ, ଦିଲ୍ଲୀର ବିଷ୍ଣୁ ନାମକ ଯୁବକ ରାଜସ୍ଥାନ ଚୁରର ଜଣେ ଯୁବତୀଙ୍କୁ ଭଲ ପାଉଥିଲେ(Love Affair With Rajasthan Girl) । ସେହି ଯୁବତୀଙ୍କୁ ରାଜସ୍ଥାନର ସଞ୍ଜୟ ବୁଚା ମଧ୍ୟ ପ୍ରେମ କରୁଥିଲେ । ତେଣୁ ଯୁବତୀଙ୍କୁ ସହ ବିଷ୍ଣୁଙ୍କ ମିଳାମିଶାକୁ ସହ୍ୟ କରିପାରୁନଥିଲେ ସଞ୍ଜୟ । ଯୁବତୀ ଅନେକ ସମୟରେ ବିଷ୍ଣୁଙ୍କୁ ଦେଖା କରିବାକୁ ଦିଲ୍ଲୀ ଆସୁଥିଲେ । ସେପଟେ ତାଙ୍କ ପ୍ରେମିକା ସହ ସମ୍ପର୍କ ନ ରଖିବାକୁ ସଞ୍ଜୟ ବାରମ୍ବାର ଯୁବକଙ୍କୁ ମନା କରୁଥିଲେ । କିନ୍ତୁ ବିଷ୍ଣୁ ନ ଶୁଣିବାରୁ ତାଙ୍କୁ ରାସ୍ତାରୁ ହଟାଇବା ପାଇଁ ନିଜ ସାଙ୍ଗ ସହ ମିଶି ଷଡଯନ୍ତ୍ର ରଚିଥିଲା ସଞ୍ଜୟ ।
କିଛି ଦିନ ତଳେ ସଞ୍ଜୟ ନିଜ ସାଙ୍ଗ ସହ ଦିଲ୍ଲୀ ଆସିଥିଲା ଏବଂ ବିଷ୍ଣୁଙ୍କୁ ଦେଖା କରିବାକୁ ଡକାଇଥିଲା । ଏହାପରେ ସେମାନେ ଏକାଠି ବସି ମଦ ପିଇଥିଲେ । ଏହି ସମୟରେ ସଞ୍ଜୟ ବିଷ୍ଣୁଙ୍କୁ ତା' ପ୍ରେମିକାର ଫଟୋ ଫୋନ୍ରୁ ଡିଲିଟ୍ କରିବାକୁ କହିଥିଲା । ହେଲେ ସେ ଏଥିରେ ରାଜି ନ ହେବାରୁ ଦୁଇ ସାଙ୍ଗ ଏକ ରଶିରେ ତାଙ୍କର ଗଳା ଚିପି ହତ୍ୟା କରିଥିଲେ । ଏହାପରେ କାରରେ ମୃତଦେହ ନେଇ ଏକ ନାଳରେ ଫିଙ୍ଗି ଦେଇଥିଲେ ଓ ବସ୍ରେ ରାଜସ୍ଥାନ ପଳାଇଥିଲେ । ଆଶ୍ଚର୍ଯ୍ୟର କଥା ହେଲା, ଅଭିଯୁକ୍ତ ଦୁଇ ଘଣ୍ଟା ଯାଏଁ ଗାଡିର ପଛ ସିଟ୍ରେ ମୃତଦେହ ରଖି ଦିଲ୍ଲୀ ରାସ୍ତାରେ ବୁଲିଥିଲା । ହେଲେ ପୋଲିସ ଏ ବାବଦରେ କିଛି ବି ସୁରାକ ପାଇନଥିଲା ।
ଅନ୍ୟପଟେ ଯୁବକଙ୍କ ନିଖୋଜ ସମ୍ପର୍କରେ ପରିବାର ଲୋକେ ଥାନାରେ ଏତଲା ଦେଇଥିଲେ । ପୋଲିସର ତନାଘନା ପରେ ଦୀପାବଳିର ଦିନକ ପୂର୍ବରୁ ନାଳ ଭିତରୁ ବିଷ୍ଣୁଙ୍କ ମୃତଦେହ ମିଳିଥିଲା । ପରେ ଯୁବକଙ୍କ କଲ୍ ଡିଟେଲରୁ ମୃତ୍ୟୁ ପୂର୍ବରୁ ସେ ରାଜସ୍ଥାନର ଦୁଇଟି ନମ୍ବରରେ କଥା ହୋଇଥିବା ଜଣାପଡିଥିଲା । ଏହାପରେ ସଞ୍ଜୟ ଓ ତା'ର ସାଙ୍ଗକୁ ଧରି ପୋଲିସ ପଚରାଉଚରା କରିବା ପରେ ସେ ସବୁକଥା ମାନିଛନ୍ତି ।
