ନୂଆଦିଲ୍ଲୀ: ଦୋକାନ ଭଡ଼ାକୁ କେନ୍ଦ୍ର କରି ଜଘନ୍ୟ କାଣ୍ଡ । ଦୋକାନ ମାଲିକକୁ ହତ୍ୟା କଲା ଦୋକାନୀ । ବାରମ୍ବାର ଦୋକାନ ଭଡ଼ା ମାଗିବାରୁ ଏଥିରେ ଉତ୍କ୍ଷିପ୍ତ ହୋଇ ମାଲିକକୁ ହତ୍ୟା । ତେବେ 100ରୁ ଅଧିକ ସିସିଟିଭି ଫୁଟେଜ ଯାଞ୍ଚ କରିବା ପରେ ପୋଲିସକୁ ହତ୍ୟାକାଣ୍ଡର ସୁରାଗ ମିଳିଥିଲା । ସେପଟେ ହତ୍ୟା ମାମଲାରେ ଅଭିଯୁକ୍ତ ଦୋକାନୀ ଓ ତାର ସାଥିକୁ ଗିରଫ କରିଛି ପୋଲିସ । ଏଭଳି ଏକ ଘଟଣା ଦେଖିବାକୁ ମିଳିଛି ରାଜଧାନୀ ଦିଲ୍ଲୀରେ ।
ସୂଚନା ଅନୁସାରେ, ସେପ୍ଟେମ୍ବର 9 ତାରିଖରେ ଉତ୍ତର ଦିଲ୍ଲୀର ଅଲିପୁର ଅଞ୍ଚଳର ଏକ ନାଳରେ ଜଣେ ବ୍ୟକ୍ତିର ମୃତଦେହ ପଡ଼ିଥିବାର ଆଲିପୁର ପୋଲିସକୁ ସୂଚନା ମିଳିଥିଲା । ତେବେ ପୋଲିସ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଅଞ୍ଚଳର ଲୋକମାନଙ୍କୁ ପଚରାଉଚରା କରି ମୃତଦେହକୁ ଚିହ୍ନଟ କରିଥିଲା । ତେବେ ମୃତକ ଜଣକ ହରଦୋଇ ନିବାସୀ ଅଜୟ କୁମାର ବୋଲି ଜଣାପଡ଼ିଥିଲା । ସେପଟେ ଏନେଇ ଛାନଭିନ ଆରମ୍ଭ କରିଥିଲା ଅଲିପୁର ପୋଲିସ । ତେବେ ପୋଲିସର ଏକ ସ୍ପେଶାଲ ଟିମ ଆଖପାଖ ଅଞ୍ଚଳର ପ୍ରାୟ 100ରୁ ଅଧିକ ସିସିଟିଭି ଫୁଟେଜର ଯାଞ୍ଚ କରିଥିଲା । ଏହି ଯାଞ୍ଚ ବେଳେ ହତ୍ୟା କରିଥିବା ଅଭିଯୁକ୍ତମାନଙ୍କ ବିଷୟରେ ସୁରାଗ ପାଇଥିଲା ପୋଲିସ।
ଏହା ମଧ୍ୟ ପଢନ୍ତୁ...ସାମାନ୍ୟ ବଚସାରୁ ଗଡିଲା ମୁଣ୍ଡ, ଘର ମାଲିକକୁ ହତ୍ୟା କଲା ଭଡାଟିଆ
ସେପଟେ ସିସିଟିଭି ଫୁଟେଜ ଆଧାରରେ 2 ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ତେବେ ଅଭିଯୁକ୍ତ ଦୁଇଜଣ ହେଉଛନ୍ତି ବିହାରର ମୁଳ ବାସିନ୍ଦା ମହମ୍ମଦ ଇର୍ସାଦ (29) ଓ ତାର ସାଥି ଦିନେଶ କୁମାର (38) । ତେବେ ପୋଲିସ 2 ଅଭିଯୁକ୍ତଙ୍କୁ ଜେରା କରିବା ସମୟରେ ହତ୍ୟା ପଛର ପ୍ରକୃତ କାରଣ ସାମ୍ନାକୁ ଆସିଥିଲା । ଅଭିଯୁକ୍ତମାନେ ଅଜୟଙ୍କୁ ମାରିଥିବାନେଇ ପୋଲିସ ଆଗରେ ନିଜ ଦୋଷ ସ୍ବୀକାର କରିଥିଲେ ।
ଅଭିଯୁକ୍ତମାନେ ପୋଲିସକୁ କହିବା ଅନୁସାରେ, ମୃତ ଅଜୟଙ୍କର ନୂଆଦିଲ୍ଲୀ ରେଳ ଷ୍ଟେସନ ନିକଟରେ ଏକ ପାନ-ବିଡ଼ି ଦୋକାନ ଥିଲା। ଯାହାକୁ ମହମ୍ମଦ ଇର୍ସାଦ ପ୍ରତିଦିନ 300 ଟଙ୍କା ହିସାବରେ ଭଡ଼ାକୁ ନେଇଥିଲା । ତେବେ ଅଜୟ ପ୍ରତିଦିନ ଆସି ଦେକାନ ଭଡା଼ ମାଗୁଥିଲା । ଯାହାକୁ ନେଇ ମହମ୍ମଦ ମାଲିକ ଉପରେ ରାଗ ରଖିଥିଲା । ତେବେ ସେପ୍ଟେମ୍ବର 8 ତାରିଖ ରାତିରେ ଅଜୟ ଦୋକାନ ଭଡା଼ ମାଗିବାରୁ ଏଥିରେ ଉତ୍କ୍ଷିପ୍ତ ହୋଇ ମହମ୍ମଦ ଓ ତାର ସାଙ୍ଗ ଦିନେଶ ମିଶି ଅଜୟଙ୍କୁ ଏକ ଅଟୋରିକ୍ସା ଭିତରେ ଗଳାଚିପି ହତ୍ୟା କରିଥିଲେ । ଏହାସହ ମୃତଦେହକୁ ନେଇ ପାଖ ନାଳ ଭିତରକୁ ଫିଙ୍ଗି ଦେଇଥିଲେ।
ବ୍ୟୁରୋ ରିପୋର୍ଟ, ଇଟିଭି ଭାରତ
