ଜୟପୁର: ରାଜସ୍ଥାନ କୋଟାର ଗ୍ରାମାଞ୍ଚଳରେ ଗୁରୁବାର ବିଳମ୍ବିତ ରାତ୍ରିରେ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଏକ ବୋଲେରୋ ଟ୍ରକ୍ରେ ଧକ୍କା ହେବା ଫଳରେ 5 ଜଣଙ୍କର ମୃତ୍ୟୁ ଘଟିଥିବା ସହ 6 ଜଣ ଗଭୀର ଭାବେ ଆଘାତପ୍ରାପ୍ତ ହୋଇଛନ୍ତି ।
ମିଳିଥିବା ସୂଚନା ମୁତାବକ, ମଧ୍ୟପ୍ରଦେଶର ମଦିନାପୁର ଅଞ୍ଚଳରୁ 11 ଜଣ ଲୋକ କୋଟାର ମଣ୍ଡିରେ ଧାନ ବିକ୍ରି କରିବା ପାଇଁ ଯାଇଥିଲେ । ତେବେ ସେମାନେ ଗୁରୁବାର ବିଳମ୍ବିତ ରାତ୍ରିରେ ଧାନ ବିକ୍ରି କରି ଫେରିବା ସମୟରେ ସେମାନେ ଦୁର୍ଘଟଣାଗ୍ରସ୍ତ ହୋଇଥିଲେ । ଉମ୍ମେଦପୁରା ପେଟ୍ରୋଲ ପମ୍ପ ନିକଟରେ ରାତି ପ୍ରାୟ 1ଟା ସମୟରେ ଟ୍ରକ୍ ସହିତ ଧକ୍କା ହୋଇ ଦୁର୍ଘଟଣା ଘଟିଥିଲା । ଘଟଣାସ୍ଥଳରେ 4ଜଣଙ୍କର ମୃ୍ତ୍ୟୁ ହୋଇଥିବା ବେଳେ ମୋଟ 5ଜଣଙ୍କ ପ୍ରାଣହାନୀ ଘଟିଛି । ସେପଟେ 6 ଜଣ ଗୁରୁତର ଆହତ ହୋଇଛନ୍ତି ।
ତେବେ ପୋଲିସର କହିବା ଅନୁଯାୟୀ, ରାସ୍ତାରେ 2ଟି ଟ୍ରକ୍ ଯାଉଥିବା ସମୟରେ ଗୋଟିଏ ଟ୍ରକ୍ ଅନ୍ୟ ଏକ ଟ୍ରକ୍କୁ ଓଭରଟେକ୍ କରିବା ସମୟରେ ବୋଲେରୋଟିକୁ ଧକ୍କା ଦେଇଥିଲା । ବୋଲେରୋଟି ଦୁର୍ଘଟଣାଗ୍ରସ୍ତ ହେବା ପରେ ରାସ୍ତା ତଳକୁ ଖସିପଡିଥିଲା । ବୋଲେରୋରେ ଯାତ୍ରା କରୁଥିବା ଯାତ୍ରୀମାନଙ୍କୁ ଗଭୀର ଆଘାତ ଲାଗିଛି । ତେବେ ଗୁରୁତର ଆହତ ହୋଇଥିବା ଲୋକଙ୍କୁ କୋଟା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି । ତେବେ 6 ଜଣ ଗୁରୁତରଙ୍କ ମଧ୍ୟରୁ 3 ଜଣଙ୍କ ସ୍ବାସ୍ଥ୍ୟବସ୍ଥା ଗୁରୁତର ଥିବା ଜଣାପଡିଛି । ଧକ୍କା ଦେଇଥିବା ଟ୍ରକ୍ ଡ୍ରାଇଭରକୁ ଦିଗୋଦ ଥାନା ପୋଲିସ ଗିରଫ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
