ଲସ ଏଞ୍ଜେଲେସ୍: ଜଳୁଛି ଲସ ଏଞ୍ଜେଲେସ । ଗତ ସପ୍ତାହେ ହେଲା ଜଙ୍ଗଲ ନିଆଁ କବଳରେ କାର୍ଲିଫର୍ଣ୍ଣିଆର ଲସ ଏଞ୍ଜେଲେସ ସହର । ନିଆଁର ଆଁରେ ହଜାର ହଜାର ଘର ପୋଡି ପାଉଁଶ ହୋଇଯାଇଥିବା ବେଳେ ଏବେସୁଦ୍ଧା ୨୪ ଜଣଙ୍କ ମୃତ୍ୟୁ ହୋଇଛି । ଆଗକୁ ମୃତ୍ୟୁ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି । ଅନ୍ୟପଟେ ଚଳିତ ସପ୍ତାହରେ ପବନର ବେଗ ଅଧିକ ରହିବା ନେଇ ଅଲ ଏଞ୍ଜେଲେସ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି । ଯାହା ଜଙ୍ଗଲ ନିଆଁକୁ ଆହୁରି ବଢାଇବ ।
ଲସ ଏଞ୍ଜେଲେସରେ ରେଡ ଫ୍ଲାଗ ଆଲର୍ଟ
ଭୀଷଣ ବନାଗ୍ନିକୁ ନେଇ ଜାତୀୟ ପାଣିପାଗ ସେବା ଲସ ଏଞ୍ଜେଲେସରେ ବୁଧବାର ଠାରୁ ରେଡ ଫ୍ଲାଗ ଆଲର୍ଟ ଜାରି କରିଛି । ଏଥିସହ ପବନର ବେଗ ଅଧିକ ରହୁଥିବାର ନିଆଁର ପ୍ରକୋପ ବଢିଚାଲିଛି । ପବନର ବେଗ ଅଧିକ ରହୁଥିବା ବେଳେ ଶୁଷ୍କ ପାଗ, ଶୁଖିଲା ପାଗ ଯୋଗୁଁ ନିଆଁକୁ ଆୟତ୍ତ କରିବା କଷ୍ଟକର ହୋଇପଡୁଛି ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି । ଆସନ୍ତା ମଙ୍ଗଳବାର ସ୍ଥିତି ଆହୁରି ଭୟଙ୍କର ହେବ ବୋଲି ଆକଳନ କରିଛି ପାଣିପାଗ ବିଭାଗ ।
ଲସ ଏଞ୍ଜେଲେସ ସହରର ଅଗ୍ନିଶମ ମୁଖ୍ୟ କ୍ରିଷ୍ଟିନ କ୍ରୋଲି ନିଆଁ ଲାଗିଥିବାରୁ ଅଞ୍ଚଳରୁ ଦୂରକୁ ଯିବା ଲୋକମାନଙ୍କୁ ଅନୁରୋଧ କରିଛନ୍ତି । ସେ କହିଛନ୍ତି, "ନିଆଁ ଲାଗିଥିବା ଅଞ୍ଚଳରେ ବିଜୁଳି ନାହିଁ, ପାଣି ନାହିଁ, ସ୍ଥିତି ସୁଧାରିବାକୁ ବର୍ତ୍ତମାନ ଆମେ ଅସମର୍ଥ ହୋଇ ପଡୁଛୁ ।"
ବନାଗ୍ନିରେ କ୍ଷୟକ୍ଷତି
ପାଉଁଶରେ ସୀସା, ଆର୍ସେନିକ୍, ଆଜବେଷ୍ଟସ ଏବଂ ଅନ୍ୟାନ୍ୟ କ୍ଷତିକାରକ ସାମଗ୍ରୀ ରହିପାରେ ବୋଲି ଅଧିକାରୀମାନେ ଚେତାବନୀ ଦେଇଛନ୍ତି । ଲସ ଏଞ୍ଜେଲେସରେ ପାଖାପାଖି ୧ ଲକ୍ଷ ୫୦ ହଜାର ଲୋକଙ୍କୁ ଘର ଛାଡି ନିରାପଦ ସ୍ଥାନକୁ ଯିବା ପାଇଁ ନିର୍ଦ୍ଦେଶ ଦିଆଯାଇଥିବା ବେଳେ ୯ଟି ଆଶ୍ରୟସ୍ଥଳରେ ୭୦୦ରୁ ଅଧିକ ଆଶ୍ରୟ ନେଇଛନ୍ତି । ଭଗ୍ନଙ୍କର ଅଗ୍ନିକାଣ୍ଡ ମଧ୍ୟରେ ଲୁଟତରାଜ ମାମଲାରେ ଦିନକୁ ପାଖାପାଖି ୧୦ ଜଣଙ୍କୁ ଗିରଫ କରାଯାଉଥିବା ଲସ ଏଞ୍ଜେଲେସ ପୋଲିସ ବିଭାଗ ପକ୍ଷରୁ ସୂଚନା ଦିଆଯାଇଛି ।
ଲସ ଏଞ୍ଜେଲେସର ପ୍ରଶାସନିକ ଅଧିକାରୀ ସେରିଫ ରବର୍ଟ ଲୁନା କହିଛନ୍ତି," ଇଟନ ବନାଗ୍ନି ଜୋନରେ ୧୨ ଜଣ ନିଖୋଜ ରହିଥିବା ବେଳେ ପାଲିସେଡ୍ସ ବନାଗ୍ନି ଜୋନରେ ୪ ଜଣ ନିଖୋଜ ଅଛନ୍ତି । ଆହୁରି ଅନେକ ନିଖୋଜ ଥିବା ନେଇ ଆଗକୁ ରିପୋର୍ଟ ଆସିପାରେ । ତେବେ ନିଖୋଜମାନଙ୍କୁ ଖୋଜୋଖୋଜି ଜାରି ରହିଛି । ସେମାନଙ୍କ ମଧ୍ୟରେ ଅନେକଙ୍କ ମୃତ୍ୟୁ ହୋଇଥିବା ଅନୁମାନ କରାଯାଉଛି । ତେବେ କୌଣସି ଶିଶୁ ନିଖୋଜ ଥିବା ନେଇ ଏବେସୁଦ୍ଧା ରିପୋର୍ଟ ଆସିନାହିଁ । ପାଲିସେଡ୍ସ ବନାଗ୍ନି ଜୋନରେ ୮ ଜଣଙ୍କ ମୃତ୍ୟୁ ହୋଇଥିବା ବେଳେ ଇଟନ ବନାଗ୍ନି ଅଞ୍ଚଳରେ ୧୬ ଜଣଙ୍କ ଜୀବନ ଯାଇଛି ।"
ମୃତ୍ୟୁ ସଂଖ୍ୟା ଆଗକୁ ବୃଦ୍ଧି ପାଇପାରେ ବୋଲି ଆଶଙ୍କା କରାଯାଉଛି । ସନ୍ଧାନୀ କୁକୁର ସହାୟତାରେ ନିଖୋଜ ମାନଙ୍କୁ ଖୋଜାଖୋଜି ଜାରି ରହିଛି । ନିଖୋଜ ରିପୋର୍ଟ ଦାଖଲ ପାଇଁ ଅଧିକାରୀଙ୍କ ପକ୍ଷରୁ ଏକ କେନ୍ଦ୍ର ଖୋଲାଯାଇଛି । ଯେଉଁଠାରେ ସମ୍ପର୍କୀୟମାନେ ନିଖୋଜ ଥିବା ବ୍ୟକ୍ତିଙ୍କ ବିଷୟରେ ଜଣାଇପାରିବେ ।
ନିଆଁ ଲିଭା କାର୍ଯ୍ୟରେ ୮୪ ଏୟାରକ୍ରାଫ୍ଟ ନିୟୋଜିତ
ନିଆଁ ଲିଭା କାର୍ଯ୍ୟରେ କାର୍ଲିଫର୍ଣ୍ଣିଆ ସମେତ ୯ଟି ରାଜ୍ୟର ୧୪୦୦ ଅଗ୍ନିଶମ ଇଞ୍ଜିନ, ୮୪ ଏୟାରକ୍ରାଫ୍ଟ ଓ ୧୪ହଜାର ଅଧିକାରୀ ନିୟୋଜିତ ହୋଇଛନ୍ତି । ମେକ୍ସିକୋର ଫାୟାରଫାଇଟର୍ସ ମଧ୍ୟ ନିଆଁ ଲିଭା କାର୍ଯ୍ୟ ଜାରି ରଖିଛନ୍ତି । ରବିବାର ସୁଦ୍ଧା ପାଲେସିଡ୍ସ, ଇଟନ, କେନ୍ନେଥ ଓ ହର୍ଷ୍ଟ ବନାଗ୍ନି ୧୬୦ ବର୍ଗ କିଲୋମିଟରରୁ ଅଧିକ ଅଞ୍ଚଳ ପର୍ଯ୍ୟନ୍ତ ବ୍ୟାପିଥିବା ରିପୋର୍ଟରୁ ଜଣାପଡିଛି ।
ଜାରି ରହିଛି ଉଦ୍ୟମ:
ଲସ ଏଞ୍ଜେଲେସ୍ ଅଗ୍ନିଶମ ମୁଖ୍ୟ ଅନ୍ଥୋନି ସି ମାରୋନି କହିଛନ୍ତି, " ଆହୁରି ୭୦ ପାଣି ଟ୍ରକ ନିଆଁ ଲିଭାଇବା କାର୍ଯ୍ୟରେ ନିୟୋଜିତ ହୋଇଛି । ଆଗକୁ ଆସୁଥିବା ପବନ ଦିଗକୁ ଦେଖି ଆମେ ପ୍ରସ୍ତୁତି ଜାରି ରଖିଛୁ । ଆକାଶ ମାର୍ଗକୁ ଜଳ ସିଞ୍ଚନ କରାଯାଇ ନିଆଁକୁ ଆୟତ୍ତ କରିବାକୁ ଚେଷ୍ଟା କରାଯାଉଛି । ତେବେ ୮ମାସ ହେଲା ଲସ ଏଞ୍ଜେଲେସ ଓ ଏହାର ପଡୋଶୀ ସହରରେ ବର୍ଷା ହୋଇନଥିବାରୁ ଜଙ୍ଗଲ ଶୁଷ୍କ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
