ରାୟପୁର: ସାରା ଦେଶରେ କାୟା ବିସ୍ତାର କରୁଛି ମହାମାରୀ କୋରୋନା । ବଢୁଛି ସଂକ୍ରମଣ ସଂଖ୍ୟା । ସେପଟେ ମହାମାରୀର ମାୟାଜାଲରେ ମହାରାଷ୍ଟ୍ର ଛନ୍ଦି ହୋଇଥିବା ବେଳେ ଏପଟେ ଓଡିଶାର ପଡୋଶୀ ଛତିଶଗଡର ରାଜଧାନୀ ରାୟପୁରରେ ଲାଗୁ ହୋଇଛି ଲକଡାଉନ ।
ଛତିଶଗଡର ରାଜଧାନୀ ରାୟପୁରରେ ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ଲକଡାଉନ ଘୋଷଣା କରାଯାଇଛି । 9ରୁ 19 ଏପ୍ରିଲ ପର୍ଯ୍ୟନ୍ତ ଲାଗୁ ରହିବ ଏହି ଲକଡାଉନ । ତେବେ ଦେଶରେ ରାଜ୍ୟଗୁଡିକର ରାଜଧାନୀ ମଧ୍ୟରେ ରାୟପୁର ପ୍ରଥମ, ଯାହା ଦ୍ବିତୀୟ ଥର ପାଇଁ ଲକଡାଉନରେ ରହିବାକୁ ଯାଉଛି ।
ଲକଡାଉନ ସମୟ ମଧ୍ୟରେ ସହରର ସମସ୍ତ ଦୋକାନ ବନ୍ଦ ରହିବ । ପେଟ୍ରୋଲ ପମ୍ପ, ସରକାରୀ ଗାଡି, ଆମ୍ବୁଲାନ୍ସ ସେବା ଜାରି ରହିବ । ସେହିପରି ଉଦ୍ୟୋଗ କ୍ଷେତ୍ରରେ ଶ୍ରମିକମାନେ ନିଜ କାମ ଜାରି ରଖିପାରିବେ ।
ରାଜଧାନୀ ରାୟପୁରର ସ୍ଥିତି ଏବେ ଜଟିଳ ରହିଛି । ମଙ୍ଗଳବାର କେବଳ ରାୟପୁରେ ହିଁ 2821 ନୂଆ ମାମଲା ସାମ୍ନାକୁ ଆସିଛି । ରାୟପୁରରେ କୋରୋନା ରୋଗୀଙ୍କ ମୃତ୍ୟୁ ସଂଖ୍ୟାରେ ମଧ୍ୟ ବୃଦ୍ଧି ଘଟିଛି । 24 ଘଣ୍ଟା ମଧ୍ୟରେ 26 ଜଣ ପ୍ରାଣ ହରାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
