ମୁମ୍ବାଇ: ପୁଣି ଆମ୍ବାନୀ ପରିବାରକୁ ଧମକ । ବିଶିଷ୍ଟ ଉଦ୍ୟୋଗପତିଙ୍କ ମୁମ୍ବାଇରେ ଥିବା ଏଚଏନ ରିଲାଏନ୍ସ ଫାଉଣ୍ଡେସନ ହସ୍ପିଟାଲକୁ (HN Reliance Foundation Hospital ) ଏକ ଅଜ୍ଞାତ ନମ୍ବରରୁ ଧମକ ମିଳିଛି । ବୁଧବାର ଏକ ଅଜଣା ନମ୍ୱରରୁ ଏହି ଫୋନ କଲ ଆସିଥିବା ବେଳେ ହସ୍ପିଟାଲକୁ ବୋମାରେ ଉଡାଇ ଦେବା ପାଇଁ ଧମକ ଦିଆଯାଇଛି । ଏହାସହ ରିଲାଏନ୍ସ ଉଦ୍ୟୋଗର ମୁଖ୍ୟ ମୁକେଶ ଅମ୍ୱାନୀ, ତାଙ୍କ ପତ୍ନୀ ନୀତା ଅମ୍ୱାନୀ ଏବଂ ତାଙ୍କ ଦୁଇ ପୁଅ ଆକାଶ ଅମ୍ୱାନୀ ଏବଂ ଅନନ୍ତ ଅମ୍ୱାନୀଙ୍କୁ ଜୀବନରୁ ମାରିବାକୁ ଧମକ ଦିଆଯାଇଛି(Threat to Ambani family) ।
ଏନେଇ ମୁମ୍ବାଇ ପୋଲିସ କହିଛି, "ବୁଧବାର ଦିନ ୧୨ଟା ୫୭ରେ ଡାକ୍ତରଖାନାର ଲାଣ୍ଡଲାଇନ ନମ୍ବରକୁ ଅଜ୍ଞାତ ନମ୍ବରରୁ ଫୋନ ଆସିଥିଲା । ଫୋନ ଉଠାଇବା ମାତ୍ରେ ବ୍ୟକ୍ତିଜଣକ ହିସ୍ପାଟଲକୁ ବୋମାରେ ଉଡାଇବା ସହ ଅମ୍ୱାନୀ ପରିବାରକୁ ହତ୍ୟା ଧମକ ଦେଇଥିଲେ ।"
ଏହା ମଧ୍ୟ ପଢନ୍ତୁ: ପୁଣି ଅମ୍ବାନୀ ପରିବାରକୁ ଧମକ
ଏନେଇ ଡିବି ମାର୍ଗ ପୋଲିସ ଷ୍ଟେସନରେ (D B Marg police station) ଏକ ମାମଲା ରୁଜୁ ହୋଇଛି । ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି । ତେବେ ଏହା ପ୍ରଥମ ଘଟଣା ନୁହେଁ ଏହା ପୂର୍ବରୁ ମଧ୍ୟ ଅଗଷ୍ଟ ମାସରେ ଅମ୍ୱାନୀଙ୍କ ପରିବାରକୁ ହତ୍ୟା ଧମକ ମିଳିଥିଲା । କେହି ଜଣେ ବ୍ୟକ୍ତି ଏଚ.ଏନ ରିଲିୟାନ୍ସ ହସ୍ପିଟାଲ (HN Reliance Foundation Hospital ) ଲ୍ୟାଣ୍ଡ ଲାଇନ ନମ୍ବରରୁ ମୁକେଶ ଆମ୍ବାନୀଙ୍କ ପରିବାରକୁ ଧମକ କଲ କରିଥିଲା । ମୋଟ 8 ଥର କଲ କରିଥିବା ବେଳେ କିଛି ଘଣ୍ଟା ଭିତରେ ବଡ ଅଘଟଣ ଘଟାଇବା ନେଇ କଲରେ କହିଥିଲା ଅଜଣା ବ୍ୟକ୍ତି । ତେବେ ଏହି ଘଟଣାରେ ଜଣେ ସୁନା ବ୍ୟବସାୟୀଙ୍କୁ ଗିରଫ କରିଥିଲା ଡିବି ମାର୍ଗ ପୋଲିସ ।
ଏହା ମଧ୍ୟ ପଢନ୍ତୁ: ଅମ୍ବାନୀଙ୍କ ଆଣ୍ଟିଲିଆ ବାହାରୁ ମିଳିଥିବା ବିସ୍ଫୋରକ ଭର୍ତ୍ତି ଗାଡି ମାଲିକର ମୃତ୍ୟୁ
ସୂଚନାଯୋଗ୍ୟ ଯେ, ରିଲାଏନ୍ସ ଇଣ୍ଡଷ୍ଟ୍ରିଜର ମୁଖ୍ୟ ଅମ୍ବାନୀଙ୍କ ବହୁମହଲା ବାସଭବନ ଆଣ୍ଟିଲିଆ ନିକଟରୁ 25 ଫେବୃଆରୀ ସଂଧ୍ୟାରେ 2.5 କିଲୋର ଜିଲେଟିନ ବିସ୍ଫୋରକ ଜବତ କରାଯାଇଥିଲା । ଏକ ସନ୍ଦିଗ୍ଧ ଗାଡିରେ ରହିଥିଲା ଏହି ଜିଲେଟିନ । ଗାଡିରେ ଏକ ଚିଠି ମଧ୍ୟ ମିଳିଥିବା କୁହାଯାଇଥିଲା, ଯେଉଁଥିରେ ଅମ୍ବାନୀ ଓ ତାଙ୍କ ପରିବାରକୁ ଧମକ ଦିଆଯାଇଥିବା ବିଷୟରେ ଉଲ୍ଲେଖ ଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
