ନୂଆଦିଲ୍ଲୀ: ସୀମାରେ ପାକିସ୍ତାନର ଆତଙ୍କବାଦୀ କାର୍ଯ୍ୟକଳାପ ଓ ଚୀନ ସହ ଜାରି ତିକ୍ତତା ମଧ୍ୟରେ ଭାରତରେ ଆସି ପହଞ୍ଚିଛି ଆଉ 3 ରାଫେଲ ଯୁଦ୍ଧ ବିମାନ । ଦ୍ବିତୀୟ ପର୍ଯ୍ୟାୟ ରାଫେଲ ଫ୍ରାନ୍ସରୁ ନନ୍ଷ୍ଟପ୍ ଉଡାଣ ଭରି ରାତି 8ଟା 14ରେ ଜାମନଗରରେ ପହଞ୍ଚିଥିବା ନେଇ ଭାରତୀୟ ବାୟୁସେନା ଦେଇଛି ସୂଚନା ।
ତିନୋଟି ରାଫେଲ ଏୟାରକ୍ରାଫ୍ଟ ଫ୍ରାନ୍ସର ଇଷ୍ଟ୍ରେସରୁ ଜାମନଗରକୁ ସିଧାସଳଖ ଆଠ ଘଣ୍ଟା ନନ୍ ଷ୍ଟପ୍ ଉଡ଼ାଣ ଭାରି ଭାରତରେ ପହଞ୍ଚିଛି । ଏହି 3 ରାଫେଲ ଭାରତୀୟ ବାୟୁସେନାରେ ବିଧିବଦ୍ଧ ସାମିଲ ହେବା ପରେ ଏହାର ଶକ୍ତିରେ 8ଟି ରାଫେଲ ଯୋଡିହୋଇଯିବ ।
ସେପ୍ଟେମ୍ବର 10ରେ ଭାରତୀୟ ବାୟୁସେନାରେ ସାମିଲ ହୋଇଥିଲା ରାଫେଲ ଯୁଦ୍ଧ ବିମାନ । ଫ୍ରାନ୍ସରୁ ଆସିଥିବା 5 ରାଫେଲ ବିମାନକୁ ବିଧିବଦ୍ଧ ଭାବରେ ବାୟୁସେନାରେ ସାମିଲ କରାଇଥିଲେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ତେବେ ଫ୍ରାନ୍ସରୁ ଏହି 5 ରାଫେଲ ଆସିବା ସମୟରେ ୟୁଏଇରେ ଅବତରଣ କରିଥିଲା । ପରେ ପୁଣି ଏହା ଉଡାଣ ଭରି ଭାରତରେ ପହଞ୍ଚିଥିଲା ।
29 ଜୁଲାଇରେ ପାଞ୍ଚ ରାଫେଲ ଯୁଦ୍ଧ ବିମାନ ଫ୍ରାନ୍ସରୁ ଆସି ଭାରତରେ ପହଞ୍ଚିଥିଲା । ଯୁଦ୍ଧ ବିମାନ ଲଦାଖ ଅଞ୍ଚଳରେ ଉଡ଼ି ସାରିଛି। ଦେଶରେ ପହଞ୍ଚିଥିବା ପାଞ୍ଚଟି ରାଫେଲ ମଧ୍ୟରୁ ତିନୋଟି ଯୁଦ୍ଧ ବିମାନ ହୋଇଥିବା ବେଳେ 2ଟି ପ୍ରଶିକ୍ଷଣ ବିମାନ ।
