ନୂଆଦିଲ୍ଲୀ: ଜନ୍ମଦିନ ପାର୍ଟିରେ ଅଘଟଣ । ଡିଜେ ତାଳେ ତାଳେ ନାଚୁଥିବା ସମୟରେ ଭୁଶୁଡି ପଡିଲା ଛାତ । ୨ ମୃତ , ୧୫ରୁ ଉର୍ଦ୍ଧ୍ବ ଲୋକ ଆହତ । ଗତକାଲି ( ମୋମବାର) ରାତିରେ ଦିଲ୍ଲୀର ତାଜନାଗରୀର ଚାନ୍ଦପୁରାରେ ଜଣେ ବ୍ୟବସାୟୀ ସୋନୁ ବର୍ମାଙ୍କ ଘରେ ଜନ୍ମଦିନ ପାର୍ଟିର ଆୟୋଜନ କରାଯାଇଥିଲା । ଏହି ପାର୍ଟିରେ ୫୦ରୁ ୬୦ ଜଣ ଲୋକ ଯୋଗ ଦେଇଥିଲେ । ଘର ମରାମତି ଚାଲିଥିବା ସମୟରେ ଦ୍ବିତୀୟ ମହଲାରେ ପାର୍ଟିର ଆୟୋଜନ କରାଯାଇଥିଲା । ତେବେ ରାତି ବଢିବା ସହ ଡିଜେର ତାଳେ ତାଳେ ମତୁଆଲା ହୋଇ ଉଠିଥିଲେ ସମସ୍ତେ । ଏହି ସମୟରେ ହଠାତ ଘରର ଚଟାଣ ଭୁଶୁଡି ପଡିଥିଲା । ଫଳରେ ସମସ୍ତେ ପ୍ରଥମ ମହାଲାରେ ଚାପି ହୋଇଯାଇଥିଲେ ।
ଏନେଇ ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ଏଥିରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ୧୫ରୁ ଉର୍ଦ୍ଧ୍ବ ଆହତ ହୋଇଛନ୍ତି । ସମସ୍ତ ଆହତଙ୍କୁ ପୋଲିସ ହସ୍ପିଟାଲରେ ଭର୍ତ୍ତି କରିଥିବା ଆଗ୍ରା ଡିଏମ ସୂଚନା ଦେଇଥିଲେ । ରାତି ୯ଟା ୩୦ ମିନିଟ ସମୟରେ ଏହି ଦୁର୍ଘଟଣା ଘଟିଥିଲା । ଦୁଇ ମୃତକ ହେଉଛନ୍ତି ବାଦନ ସିଂ ଓ ସୁରେନ୍ଦ୍ର ସିଂ ।
ବ୍ୟୁରୋ ରିପୋର୍ଟ, ଇଟିଭି ଭାରତ
