ହାଇଦ୍ରାବାଦ: ତେଲେଙ୍ଗାନାର ସାଇଦାବାଦରେ ୬ ବର୍ଷର ନାବାଳିକାକୁ ଦୁଷ୍କର୍ମ ଓ ହତ୍ୟା ଘଟଣା । ଏହି ଘଟଣାର ମୁଖ୍ୟ ଅଭିଯୁକ୍ତ ବିଷୟରେ ଖବର ଦେଲେ ମିଳିବ ୧୦ ଲକ୍ଷ ଟଙ୍କା । ଅଭିଯୁକ୍ତ ଜଣକ ହେଉଛି ପୋଲାକୁଣ୍ତା ରାଜୁ । ଏନେଇ ତେଲେଙ୍ଗାନା ପୋଲିସ ପକ୍ଷରୁ ଜାରି ହୋଇଛି ବିଜ୍ଞପ୍ତି । ଅଭିଯୁକ୍ତ ବିଷୟରେ କୈଣସି ଖବର ପାଇଲେ 94906 16366 ଓ 94906 16627 ଏହି ନମ୍ବରରେ ପୋଲିସକୁ ଯୋଗାଯୋଗ କରିବାକୁ କୁହାଯାଇଛି । ତେବେ ଅଭିଯୁକ୍ତ ଫେରାର ହେବା ପଛରେ ସ୍ଥାନୀୟ ଲୋକଙ୍କ ହାତ ଥିବା ଅଭିଯୋଗ ହୋଇଛି ।
ସେପଟେ ଏ ଘଟଣା ନେଇ ପ୍ରତିକ୍ରିୟା ରଖିଛନ୍ତି ମନ୍ତ୍ରୀ ମାଲା ରେଡ୍ଡି । ସେ କହିଛନ୍ତି ପୋଲିସ ଖୁବଶୀଘ୍ର ଅଭିଯୁକ୍ତକୁ ଗିରଫ କରିବ । ପୀଡିତାଙ୍କ ପରିବାର ସହ ଆମେ ଅଛୁ । ପରିବାରକୁ ସମସ୍ତ ପ୍ରକାର ସାହାଯ୍ୟ ସହଯୋଗ ଯୋଗାଇ ଦିଆଯିବ । ଏପରିକି ଅଭିଯୁକ୍ତଙ୍କୁ ଏନକାଉଣ୍ଟର କରାଯିବା ନେଇ ସେ ପୂର୍ବରୁ କହିଥିଲେ । ପରେ ନିଜର ବୟାନ ବଦଳାଇ ଦେଇଥିଲେ ମନ୍ତ୍ରୀ । ଆଇନରେ ପରିବର୍ତ୍ତନ ସହ ଅଭିଯୁକ୍ତକୁ କଠୋର ଦଣ୍ତ ଦିଆଯିବା ଉଚିତ ବୋଲି ସେ କହିଥିଲେ । ଗତ ଶୁକ୍ରବାର ଦିନ ସାଇଦାବାଦରେ ୬ ବର୍ଷର ନାବାଳିକାକୁ ଦୁଷ୍କର୍ମ ପରେ ହତ୍ୟା କରିଥିଲା ଅଭିଯୁକ୍ତ ।
ବ୍ୟୁରୋ ରିପୋର୍ଟ, ଇଟିଭି ଭାରତ
