ଭୁବନେଶ୍ବର: ଦେଶରେ ମହାମାରୀ କୋରୋନାର ଭୟାବହତା ମଧ୍ୟରେ ଅକ୍ସିଜେନ ଅଭାବ ପାଲଟିଛି ଚନ୍ତାର କାରଣ । ଗୋଟିଏ ପକ୍ଷେ କୋରୋନାର କରାଳରୂପ ଆଉ ଅନ୍ୟପକ୍ଷେ ଅକ୍ସିଜେନର ଅଭାବ ଭିତରେ ଏବେ ବ୍ୟବସ୍ଥା ବି ଦୋହଲିବାରେ ଲାଗିଛି । ଅନେକ ରାଜ୍ୟରୁ ଅକ୍ସିଜେନ ଅଭାବ ନେଇ ଅଭିଯୋଗ ସାମ୍ନାକୁ ଆସିଛି । ଏହି ସମୟରେ ଦେଶର ନିଶ୍ବାସ ପାଲଟିଛି ଓଡିଶା । ଆଉ ଓଡିଶାର ଅକ୍ସିଜେନ ନେବାକୁ ଏବେ ଅନ୍ୟ ରାଜ୍ୟର ଲାଗିଛି ଲାଇନ ।
ପଡୋଶୀ ତେଲେଙ୍ଗାନାରେ ଅକ୍ସିଜେନର ବ୍ୟାପକ ଅଭାବ ଥିବା ଖବର ସାମ୍ନାକୁ ଆସିଛି । ଆଉ ଏଥିପାଇଁ ଅକ୍ସିଜେନ ନେବାକୁ ଓଡିଶାକୁ ଖାଲି ଟାଙ୍କି ପଠାଇଛି ତେଲେଙ୍ଗାନା ।
ପ୍ରତିରକ୍ଷା ଏୟାରକ୍ରାଫ୍ଟ ଜରିଆରେ ଏୟାରଲିଫ୍ଟ କରି 8ଟି ଖାଲି ଅକ୍ସିଜେନ ଟାଙ୍କି ହାଇଦ୍ରାବାଦରୁ ଓଡିଶା ପହଞ୍ଚିଛି । ଏହି ଟାଙ୍କିରେ ଅକ୍ସିଜେନ ଭର୍ତ୍ତି ହୋଇ ତେଲେଙ୍ଗାନା ନିଆଯିବ ।
ମହାମାରୀ କୋରୋନା ଯୋଗୁଁ ତେଲେଙ୍ଗାନାର ସ୍ଥିତି ମଧ୍ୟ ସଙ୍ଗୀନ ରହିଛି । ହାଇଦ୍ରାବାଦର ଅନେକ ହସ୍ପିଟାଲରେ ଅକ୍ସିଜେନ ଅଭାବ ଥିବା ଖବର ଆସୁଛି ।
