ହାଇଦ୍ରାବାଦ: ତେଲେଙ୍ଗାନା ବିଧାନସଭା ନିର୍ବାଚନରେ ମ୍ୟାଜିକ ନମ୍ବର ଟପିଛି କଂଗ୍ରେସ ପାର୍ଟି । ଚୂଡ଼ାନ୍ତ ଫଳାଫଳ ଘୋଷଣା ପୂର୍ବରୁ କିଏ ହେବେ ମୁଖ୍ୟମନ୍ତ୍ରୀ, ତାକୁ ନେଇ ଆରମ୍ଭ ହୋଇ ଯାଇଛି ଅଙ୍କକଷା । ରାଜ୍ୟରେ ବିଆରଏସ୍ ସରକାରର ପତନରେ ମୁଖ୍ୟ ଭୂମିକା ନେଇଥିବା, କଂଗ୍ରେସ ପାର୍ଟିର କିଛି ହେବିୱେଟ ନେତାମାନଙ୍କ ନାଁ ଚର୍ଚ୍ଚାକୁ ଆସିଛି । ସେମାନଙ୍କ ମଧ୍ୟରେ ଅଛନ୍ତି ପିସିସି ସଭାପତି ରେଭାନ୍ଥ ରେଡ୍ଡି, ସାଂସଦ ଉତ୍ତମକୁମାର ରେଡ୍ଡି, ସାଂସଦ କୋମାତିରେଡ୍ଡି ଭେଙ୍କଟ ରେଡ୍ଡି ଏବଂ ମାଲ୍ଲୁ ଭଟ୍ଟି ବିକ୍ରମାର୍କ ।
ରେଭାନ୍ତ ରେଡ୍ଡି: ତେଲେଙ୍ଗାନା କଂଗ୍ରେସରେ ଗେମ୍ ଚେଞ୍ଜର୍ ତଥା ପ୍ରଦେଶ କଂଗ୍ରେସ କମିଟି ସଭାପତି ରେଭାନ୍ତ ରେଡ୍ଡି । ତେଲେଙ୍ଗାନାରେ କଂଗ୍ରେସ ପାର୍ଟିକୁ ଜିରୋରେ ହିରୋ କରିବାରେ ମୁଖ୍ୟ ପୁରୋଧା । ମୁଖ୍ୟମନ୍ତ୍ରୀ କେସିଆରଙ୍କୁ ଗାଦିଚ୍ୟୁତ କରିବାରେ ପ୍ରମୁଖ ଭୂମିକା । ତେଲେଙ୍ଗାନାରେ କଂଗ୍ରେସରୁ କିଏ ହେବ ପରବର୍ତ୍ତୀ ମୁଖ୍ୟମନ୍ତ୍ରୀ ତାକୁ ନେଇ ଚର୍ଚ୍ଚା ଆରମ୍ଭ ହୋଇଥିବା ବେଳେ, ଏହି ଦୌଡ଼ରେ ଆଗରେ ଅଛନ୍ତି ରେଭାନ୍ତ । ତିନି ତିନି ଥରର ବିଧାୟକ ତଥା ବର୍ତ୍ତମାନର ମାଲକାଜଗିରି ସାଂସଦ ରେଭାନ୍ତ, ମୁଖ୍ୟମନ୍ତ୍ରୀ ହେବା ସମ୍ଭାବନା ଅଧିକ । ତେଲେଙ୍ଗାନା ରାଜନୀତିରେ ତାଙ୍କର ଅଭିଜ୍ଞତା ଅଧିକ । ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ABVP)ରୁ ଛାତ୍ର ରାଜନୀତି ଆରମ୍ଭ କରିଥିବା ରେଭାନ୍ତ, ପରେ ଟିଡିପି ଏବଂ ତାପରେ କଂଗ୍ରେସରେ ସାମିଲ ହୋଇଥିଲେ । 2009, 2014 ଏବଂ 2018ରେ କୋଣ୍ଡାଙ୍ଗଲ ବିଧାନସଭା ଆସନରୁ ବିଧାୟକ ନିର୍ବାଚିତ ହୋଇଥିଲେ । 2019 ଲୋକସଭା ନିର୍ବାଚନରେ ମାଲକାଜଗିରିରୁ ବିଜୟୀ ହୋଇଥିଲେ । ରେଭାନ୍ତଙ୍କ ନେତୃତ୍ବରେ 2023 ବିଧାନସଭା ନିର୍ବାଚନ ଲଢ଼ିଛି କଂଗ୍ରେସ । ରେଭାନ୍ତ ଏଥର ଦୁଇଟି ଆସନ କୋଡଙ୍ଗଲ ଏବଂ କାମାରେଡ୍ଡିରୁ ଛିଡ଼ା ହୋଇଛନ୍ତି । ସବୁଠୁ ଗୁରୁତ୍ବପୂର୍ଣ୍ଣ ହେଲା, ଗାନ୍ଧି ପରିବାର ଏବଂ କଂଗ୍ରେସ ହାଇକମାଣ୍ଡଙ୍କ ଗୁଡ୍ ବୁକ୍ ରେ ଅଛନ୍ତି ରେଭାନ୍ତ ।
ଏହା ମଧ୍ୟ ପଢ଼ନ୍ତୁ: ତେଲେଙ୍ଗାନାରେ କେସିଆର କ୍ଲିନ୍ ବୋଲ୍ଡ, କାର୍ ପଙ୍କଚର୍ କଲା ହାତ
କୋମାତିରେଡ୍ଡି ଭେଙ୍କଟ ରେଡ୍ଡି: ତେଲେଙ୍ଗାନା କଂଗ୍ରେସରେ ଟାଣୁଆ ନେତା କୋମାତିରେଡ୍ଡି ଭେଙ୍କଟ ରେଡ୍ଡି । ସେ ଭୁବନଗିରି ଲୋକସଭା ଆସନରୁ 2019ରୁ ସାଂସଦ ଅଛନ୍ତି । କୋମାତିରେଡ୍ଡି ଚଳିତ ବିଧାନସଭା ନିର୍ବାଚନରେ କଂଗ୍ରେସରୁ ଷ୍ଟାର କ୍ୟାମ୍ପେନର ଥିଲେ । ପୂର୍ବତନ ବିଧାୟକ କୋମାତିରେଡ୍ଡି ପୂର୍ବରୁ ତେଲେଙ୍ଗାନା ବିଧାନସଭାରେ କଂଗ୍ରେସ ପାର୍ଟିରୁ ଉପ ବାଚସ୍ପତି ମଧ୍ୟ ଥିଲେ । ମୁଖ୍ୟମନ୍ତ୍ରୀ ଦୌଡ଼ରେ ତାଙ୍କ ନାଁ ଚର୍ଚ୍ଚା ହେଉଛି।
ଏହା ମଧ୍ୟ ପଢ଼ନ୍ତୁ: କର୍ଣ୍ଣାଟକ ପରେ ତେଲେଙ୍ଗାନା: କାମ ଦେଲା କି କଂଗ୍ରେସର '6 ଗ୍ୟାରେଣ୍ଟି' !
ଉତ୍ତମ କୁମାର ରେଡ୍ଡି: ପୂର୍ବତନ ଏୟାରଫୋର୍ସ ପାଇଲଟ ତଥା ବରିଷ୍ଠ କଂଗ୍ରେସ ନେତା ଏନ୍. ଉତ୍ତମ କୁମାର ରେଡ୍ଡି । 2019ରୁ ନାଲଗୋଣ୍ଡା ଲୋକସଭା ଆସନରୁ ସାଂସଦ ଅଛନ୍ତି ଉତ୍ତମ । ପୂର୍ବରୁ ସେ କୋଦାଦ ଏବଂ ହଜୁର ନଗର ବିଧାନସଭା ଆସନରୁ ବିଧାୟକ ରହି ଆସିଛନ୍ତି । 2015ରୁ 2021 ଯାଏଁ ପିସିସି ସଭାପତି ଥିଲେ ଉତ୍ତମ ରେଡ୍ଡି । ସେହିପରି ପୂର୍ବତନ ତେଲେଙ୍ଗାନା ମୁଖ୍ୟମନ୍ତ୍ରୀ କିରଣ ରେଡ୍ଡିଙ୍କ ମନ୍ତ୍ରିମଣ୍ଡଳରେ ମନ୍ତ୍ରୀ ଭାବେ କାର୍ଯ୍ୟ କରିଛନ୍ତି ଉତ୍ତମ । ଚଳିତ ବିଧାନସଭା ନିର୍ବାଚନରେ କଂଗ୍ରେସରୁ ଷ୍ଟାର ପ୍ରଚାରକ ଥିଲେ ଉତ୍ତମ।
ଏହା ମଧ୍ୟ ପଢ଼ନ୍ତୁ: ତେଲେଙ୍ଗାନା ଫାଇଟ୍ରେ କଂଗ୍ରେସ ହିରୋ ରେଭାନ୍ତ ରେଡ୍ଡି, ସରକାର ଗଠନରେ ନେବେ ମୁଖ୍ୟ ଭୂମିକା
ମାଲୁ ଭଟ୍ଟି ବିକ୍ରମାର୍କ: ତେଲେଙ୍ଗାନା କଂଗ୍ରେସରେ ଜଣା ଶୁଣା ନେତା ବିକ୍ରମାର୍କ । ମାଧିରା ବିଧାନସଭା ଆସନରୁ 2009 ଏବଂ 2014ରେ କଂଗ୍ରେସ ଟିକେଟରେ ବିଧାୟକ ନିର୍ବାଚିତ । 2009 ରୁ 2011 ମଧ୍ୟରେ ଆନ୍ଧ୍ରପ୍ରଦେଶ ବିଧାନସଭାରେ ମୁଖ୍ୟ ସଚେତକ ଥିଲେ । 2011ରୁ 2014 ମଧ୍ୟରେ ଆନ୍ଧ୍ରପ୍ରଦେଶ ବିଧାନସଭାର ଉପ ବାଚସ୍ପତି ଭାବରେ କାର୍ଯ୍ୟ କରିଥିଲେ । ବିକ୍ରମାର୍କ ତେଲେଙ୍ଗାନା କଂଗ୍ରେସରେ ଅନ୍ୟତମ ଦକ୍ଷ ନେତା ହୋଇଥିବା ବେଳେ, ମୁଖ୍ୟମନ୍ତ୍ରୀ ପଦ ପାଇଁ ଆଶାୟୀ ଥିବା ଚର୍ଚ୍ଚା ହେଉଛି ।
ତେଲେଙ୍ଗାନା ବିଜୟକୁ ନେଇ କଂଗ୍ରେସ ମହଲରେ ଆରମ୍ଭ ହୋଇଯାଇଛି ସେଲିବ୍ରେନ । ହାଇଦ୍ରାବାଦର ରାଜ୍ୟ କଂଗ୍ରେସ ମୁଖ୍ୟାଳୟ ଗାନ୍ଧି ଭବନରେ ଦଳୀୟ ନେତା ଏବଂ କର୍ମୀଙ୍କ ସହ ଉତ୍ସବ ମନାଇଛନ୍ତି ରେଭାନ୍ତ ରେଡ୍ଡି । ଏପଟେ ରାଜ୍ୟ ପୋଲିସ ମହାନିର୍ଦ୍ଦେଶକ ଅଞ୍ଜନି କୁମାର, ପିସିସି ସଭାପତି ରେଭାନ୍ତ ରେଡ୍ଡିଙ୍କୁ ତାଙ୍କ ବାସ ଭବନରେ ଭେଟିବା ପରେ, ରେଭାନ୍ତ ପରବର୍ତ୍ତୀ ମୁଖ୍ୟମନ୍ତ୍ରୀ ହେବା ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
