ଚଣ୍ଡିଗଡ: ଶିବସେନା ନେତା ସୁଧୀର ସୁରୀଙ୍କୁ ଗୁଳି କରି ହତ୍ୟା ପରେ ପଞ୍ଜାବର ଅମୃତସରରେ ପ୍ରତିବାଦ ଦେଖିବାକୁ ମିଳିଛି । ଦଳୀୟ ଶିବସେନା (ତକଶାଳୀ) ନେତା ଓ କର୍ମୀ ଆଜି ଅମୃତସରରେ ପ୍ରତିବାଦ କରିବା ସହ ରେଳରୋକ କରିଛନ୍ତି । ସହରରେ ରେଳ ସେବା ସାମୟିକ ପ୍ରଭାବିତ ହୋଇଛି । ସହରର ବିଭିନ୍ନ ସ୍ଥାନରେ ପୋଲିସ ଫୋର୍ସ ମୁତୟନ ହୋଇଛନ୍ତି । ଗତକାଲି (ଶୁକ୍ରବାର) ସୁଧୀର ସୁରୀ ଏକ ମନ୍ଦିର ବାହାରେ ଧାରଣାରେ ବସିଥିବା ବେଳେ ତାଙ୍କୁ ଗୁଳି କରି ହତ୍ୟା କରାଯାଇଥିଲା (shiv sena leader Sudhir Suri murder case) ।
ଏହା ମଧ୍ୟ ପଢନ୍ତୁ:- ପଞ୍ଜାବରେ ଶିବସେନା ନେତାଙ୍କୁ ଗୁଳିକରି ହତ୍ୟା, ସୋସିଆଲ ମିଡ଼ିଆରେ ହତ୍ୟା ନେଇ ଗ୍ୟାଙ୍ଗଷ୍ଟାର ପକ୍ଷରୁ ପୋଷ୍ଟ
ସୂଚନା ଅନୁଯାୟୀ, ପଞ୍ଜାବ ଅମୃତସରର ଗୋପାଳ ମନ୍ଦିର ସମ୍ମୁଖରେ ସୁଧୀର ସୁରୀ ଧାରଣାରେ ବସିଥିବା ବେଳେ ତାଙ୍କ ଉପରେ ଗୁଳି ଚଳାଇଥିଲା ଅଭିଯୁକ୍ତ । ଦୁଇଟି ଗୁଳି ସୁଧୀରଙ୍କ ଛାତିରେ ବାଜିଥିଲା । ତାଙ୍କୁ ତୁରନ୍ତ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ସୁଦ୍ଧା ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ପୋଲିସ ତୁରନ୍ତ ଗୁଳି ଚଳାଇଥିବା ଅଭିଯୁକ୍ତକୁ ଗିରଫ କରିବା ସହ ହତ୍ୟାରେ ବ୍ୟବହୃତ ବନ୍ଧୁକକୁ ମଧ୍ୟ ଜବତ କରିଥିଲା ।
ସୁଧୀର ସୁରୀଙ୍କୁ ଗ୍ୟାଙ୍ଗଷ୍ଟାର ଲାଣ୍ଡାର ସାଥି ହତ୍ୟା କରିଥିବା ନେଇ ସେ ନିଜେ ସୋସିଆଲ ମିଡ଼ିଆରେ ପୋଷ୍ଟ କରିଥିଲା । ତେବେ ପୋଲିସର କଡ଼ା ସୁରକ୍ଷା ସତ୍ତ୍ବେ କିଭଳି ହତ୍ୟାକାରୀ ସୁଧୀରଙ୍କ ଉପରେ ଗୁଳି ଚଳାଇବାରେ ସକ୍ଷମ ହେଲା ସେ ନେଇ ବଡ ପ୍ରଶ୍ନବାଚୀ ସୃଷ୍ଟି ହୋଇଛି । ଅନ୍ୟପଟେ ଗ୍ୟାଙ୍ଗଷ୍ଟାର ଲଣ୍ଡା ହରିକେ ନିଜ ଗୋଷ୍ଠୀ ଦ୍ବାରା ହତ୍ୟାକାଣ୍ଡ ହୋଇଥିବା ଦାବି କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
