ଅମରାବତୀ: ପରୀକ୍ଷା ଦେବା ପାଇଁ ପ୍ରବଳ ସ୍ରୋତ ପ୍ରବାହିତ ହେଉଥିବା ନଦୀ ପହଁରିଲେ ଛାତ୍ରୀ (student swam in the river to give exam)। ନା ଥିଲା ପୋଲ, ନା ନଦୀ ପାର ହେବା ପାଇଁ ଥିଲା ଡଙ୍ଗାର ବ୍ୟବସ୍ଥା । ଫଳରେ ପରୀକ୍ଷା ଦେବା ପାଇଁ ଭରା ନଦୀକୁ ପହଁରି ପାର ହେବା ପାଇଁ ବାଧ୍ୟ ହେଲେ ଛାତ୍ରୀ । ଛାତ୍ରୀଙ୍କ ସାଙ୍ଗରେ ତାଙ୍କର କିଛି ସମ୍ପର୍କୀୟ ମଧ୍ୟ ନଦୀ ପହଁରି ଛାତ୍ରୀଙ୍କୁ ନଦୀ ଆରପଖ ପର୍ଯ୍ୟନ୍ତ ଆଣିଥିଲେ । ସ୍ବାଧୀତନାର ୭୫ ବର୍ଷ ପରେ ଏପରି କିଛି ବିଚଳିତ କରିବା ପରି ଘଟଣା ଦେଖିବାକୁ ମିଳିଛି ଆନ୍ଧ୍ର ପ୍ରଦେଶରେ ବିଜୟନଗରମ ଜିଲ୍ଲାରେ ।
ସୂଚନା ଅନୁସାରେ ଛାତ୍ରୀଜଣଙ୍କ ବିଜୟନଗରମର ବାସିନ୍ଦା ହୋଇଥିବା ବେଳେ ପରୀକ୍ଷା ଦେବା ପାଇଁ ସେ ବିଶାଖାପାଟନମର କୌଣସି ଏକ କଲେଜକୁ ଆସିବାର ଥିଲା । ତେବେ ରାସ୍ତାରେ ପଡୁଥିବା ଚମ୍ପାବତୀ ନଦୀରେ ଜଳସ୍ତର ବୃଦ୍ଧି ପାଇଥିବା କାରଣରୁ ପୂର୍ବରୁ ଥିବା ଡଙ୍ଗା ବ୍ୟବସ୍ଥା ମଧ୍ୟ ବନ୍ଦ କରି ଦିଆଯାଇଥିଲା । ଫଳରେ ଉକ୍ତ ଦିନ ନଦୀ ପାର ହେବା ପାଇଁ କୌଣସି ବ୍ୟବସ୍ତା ନଥିଲା ।
ପରୀକ୍ଷା ଥିବା କାରଣରୁ ପ୍ରଖର ସ୍ରୋତ ପ୍ରବାହିତ ହେଉଥିବା ନଦୀରେ ଉକ୍ତ ଛାତ୍ରୀ ଓ ତାଙ୍କ ସମ୍ପର୍କୀୟ ବିପଦପୂର୍ଣ୍ଣ ଭାବେ ପହଁରି ପହଁରି ପାର ହେବା ପାଇଁ ବାଧ୍ୟ ହୋଇଥିଲେ । ଯାହାର ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି । ଏପରି ଭିଡିଓ ଭାଇରାଲ ହେବା ପରେ ଗମନାଗନରେ ଥିବା ଅବ୍ୟବସ୍ଥା ଓ ଜଣେ ଛାତ୍ରୀଙ୍କୁ ଏପରି କରିବାକୁ ବାଧ୍ୟ ହେବା ଘଟଣାରେ ପ୍ରଶାସନକୁ ଦାୟୀ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
