କଲମ୍ବୋ: ଶ୍ରୀଲଙ୍କାରେ ଲାଗି ରହିଥିବା ଆର୍ଥିକ ସଙ୍କଟ ମଧ୍ୟରେ ଦେଶର ବୈଦେଶିକ ସେବା ମଧ୍ୟ ପ୍ରଭାବିତ ହେବାକୁ ଯାଉଛି । ଏପ୍ରିଲ 30ରୁ ବିଭିନ୍ନ ଦେଶରେ ଶ୍ରଲଙ୍କାର ଦୂତାବାସ ଓ କୂଟନୈତିକ ସେବା ବନ୍ଦ କରିବାକୁ ଶ୍ରୀଲଙ୍କା ଘୋଷଣା କରିଛି । ନରଓ୍ବେ ଓ ଇରାକରେ ଅବସ୍ଥାପିତ ଶ୍ରୀଲଙ୍କା ଦୂତାବାସ ବନ୍ଦ ହେବା ସହ ଅଷ୍ଟ୍ରେଲିଆର ରାଜଧାନୀ ସିଡିନିରେ ମଧ୍ୟ ବିଦେଶ ସେବା ପ୍ରଭାବିତ ହେବାକୁ ଯାଉଥିବା ଶ୍ରୀଲଙ୍କା ବୈଦେଶିକ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି ।
ଦ୍ବୀପ ରାଷ୍ଟ୍ର ଶ୍ରୀଲଙ୍କା 1948ରେ ସ୍ବାଧୀନ ଦେଶ ଭାବେ ଆତ୍ମପ୍ରକାଶ କରିବା ପରଠାରୁ ବର୍ତ୍ତମାନ ଇତିହାସର ସବୁଠୁ ଉତ୍କଟ ଆର୍ଥିକ ସଙ୍କଟ ମଧ୍ୟରେ ଗତି କରୁଛି । ଜନ ଅସନ୍ତୋଷ ପାଇଁ ରାଜନୈତିକ ଅସ୍ଥିରତା ମଧ୍ୟ ଲାଗି ରହିଛି । କିଛି ସଦସ୍ୟଙ୍କ ଇସ୍ତଫା ପରେ ଗୋତବାୟା ସରକାର ବହୁମତ ହରାଇ ସାରିଥିବା ମଧ୍ୟ ଚର୍ଚ୍ଚା ହେଉଛି ।
ଗୋତବାୟା ରାଜପାକ୍ସେ ନେତୃତ୍ବାଧୀନ ମେଣ୍ଟରୁ ବର୍ତ୍ତମାନ ସୁଦ୍ଧା 41 ନିର୍ବାଚିତ ସଦସ୍ୟ ସମର୍ଥନ ପ୍ରତ୍ୟାହାର କରି ସାରିଲେଣି । ଏପରି ସ୍ଥଳେ ଗୋତବାୟା ସରକାର ଅଳ୍ପମତକୁ ଆସି ସାରିଥିବା ମଧ୍ୟ ଚର୍ଚ୍ଚା ହେଉଛି । ଅସ୍ଥିତ୍ବ ବଜାୟ ରଖିବା ପାଇଁ ମିଳିତ ସରକାର ପାଇଁ ରାଷ୍ଟ୍ରପତି ବିରୋଧୀଙ୍କୁ ନିମନ୍ତ୍ରଣ କରିସାରିଥିଲେ ସୁଦ୍ଧା ତାହା ବିରୋଧୀଙ୍କ ଦ୍ବାରା ଗ୍ରହଣୀୟ ହୋଇନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
