ନୂଆଦିଲ୍ଲୀ: ଭାରତୀୟ ଘରୋଇ ଏୟାର ଲାଇନ୍ସ ସ୍ପାଇସଜେଟ ପରିଚାଳନା ନିର୍ଦ୍ଦେଶକ ଅଜୟ ସିଂଙ୍କ ବିରୋଧରେ ବ୍ୟବସାୟିକ ଚଞ୍ଚକତା ଅଭିଯୋଗ । କମ୍ପାନୀର ସେୟାର ଆବଣ୍ଟନରେ ଅଜୟ ଚଞ୍ଚକତା କରିଥିବା ଅଭିଯୋଗ କରିଛନ୍ତି ଅମିତ ଅରୋରା ନାମକ ଜଣେ ବ୍ୟକ୍ତି ।
ଅମିତ ଅଭିଯୋଗରେ ଦର୍ଶାଇଛନ୍ତି ଯେ ଅଜୟ ସିଂ ତାଙ୍କୁ 10 ଲକ୍ଷ ସେୟାରର ନକଲି ଡିପୋଜିଟୋରୀ ନିର୍ଦ୍ଦେଶନାମା ସ୍ଲିପ (DIS) ଦେଇଛନ୍ତି । କମ୍ପାନୀ ପକ୍ଷରୁ ଏହାକୁ ଖଣ୍ଡନ କରିଯିବା ସହ କମ୍ପାନୀ ମୁଖ୍ୟ ଅଜୟ ସିଂଙ୍କ ବିରୋଧରେ ଏହା ଏକ ମିଥ୍ୟା ଓ ଭିତ୍ତିହୀନ ଅଭିଯୋଗ ବୋଲି କୁହାଯାଇଛି ।
ଅଭିଯୋଗ ଆସିବା ପରେ ଗୁରୁଗ୍ରାମ ପୋଲିସ ଅଜୟଙ୍କ ବିରୋଧରେ ମାମଲା ରୁଜୁ କରିଛି । ଅନ୍ୟପଟ ବିମାନ କମ୍ପାନୀର ପ୍ରବକ୍ତା ଏନେଇ ପ୍ରତିକ୍ରିୟା ରଖିଛନ୍ତି । ମଦ ବ୍ୟବସାୟୀ ଅମିତ ଆରୋରାଙ୍କ ସହିତ କମ୍ପାନୀର କୌଣସି ବ୍ୟବସାୟିକ ଚୁକ୍ତି ନାହିଁ । ଉଦ୍ଦେଶ୍ୟମୂଳକ ଭାବେ ଅଜୟଙ୍କ ଛବି ଓ ତାଙ୍କ ବ୍ୟବସାୟକୁ ପ୍ରଭାବିତ କରିବା ପାଇଁ ଅଭିଯୋଗକାରୀ ଏପରି ଅଭିଯୋଗ କରିଥିବା ସଂସ୍ଥାର ମୁଖପାତ୍ର କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
