ନୂଆଦିଲ୍ଲୀ: ସ୍ପାଇସଜେଟର ଏକ ମାଲବାହୀ ବିମାନ ମଙ୍ଗଳବାର କୋଲକାତାରୁ ଚୀନ ଅଭିମୁଖେ ଯାଉଥିଲା । କିନ୍ତୁ ବିମାନର ୱେଦର ରାଡାର (weather radar) କାମ ନ କରିବାରୁ ବିମାନଟି ପୁଣି ଥରେ କୋଲକାତା ଫେରି ଆସିଛି । ମାଲବାହୀ ବିମାନଟି ଚୀନର ଚୋକ୍ବିଂଙ୍ଗ (Chongqing) ସହରକୁ ଯାଉଥିଲା । କିନ୍ତୁ ଉଡାଣ ଭରିବାର କିଛି ସମୟ ପରେ ବିମାନର ୱେଦର ରାଡାର ଅଚଳ ହୋଇଯାଇଥିବା ପାଇଲଟ ଜାଣିବାକୁ ପାଇଥିଲେ । ଏହାପରେ ସେ କୋଲକାତା ଫେରି ଆସିବାକୁ ନିଷ୍ପତ୍ତି ନେଇଥିଲେ । ମଙ୍ଗଳବାର ଗୋଟିଏ ଦିନରେ ସ୍ପାଇସଜେଟର ତିନୋଟି ବିମାନରେ ଯାନ୍ତ୍ରିତ ତ୍ରୁଟିର ଖବର ସାମ୍ନାକୁ ଆସିଛି ।
ଗତ ୧୮ ଦିନ ଭିତରେ ଏହା ସ୍ପାଇସଜେଟର ଅଷ୍ଟମ ଯାନ୍ତ୍ରିକ ତ୍ରୁଟି ମାମଲା ଅଟେ । ଏନେଇ ଡିଜିସିଏ(DGCA) ସ୍ପାଇସଜେଟକୁ କାରଣ ଦର୍ଶାଅ ନୋଟିସ (show-cause notice) ଜାରି କରିଛି । ଏୟାରଲାଇନ୍ସର ଜଣେ ମୁଖପାତ୍ର କହିଛନ୍ତି, ''ଜୁଲାଇ ୫ରେ ସ୍ପାଇସଜେଟର ବୋଇଙ୍ଗ ୭୩୭ ମାଲବାହୀ ବିମାନ କୋଲକାତାରୁ ଚୋକ୍ବିଂଙ୍ଗ ଯିବାର ଥିଲା । ହେଲେ ଉଡାଣ ଭରିବା ପରେ ଏହାର ୱେଦର ରାଡାର କୌଣସି ସୂଚନା ଦେଇନଥିଲା । ତେଣୁ ପାଇଲଟ-ଇନ-କମାଣ୍ଡ କୋଲକାତା ଫେରିବାକୁ ନିଷ୍ପତ୍ତି ନେଇଥିଲେ । ଏହି ବିମାନଟି କୋଲକାତାରେ ସୁରକ୍ଷିତ ଅବତରଣ କରିଛି ।''
