ମହିଳା ସଂରକ୍ଷଣ ବିଲକୁ ବିଜେଡିର ସମର୍ଥନ, ବିତର୍କରେ ସାମିଲ ହେଲେ ସାଂସଦ ରାଜଶ୍ରୀ ମଲ୍ଲିକ

ମହିଳା ସଂରକ୍ଷଣ ବିଲକୁ ନେଇ ହୋଇଥିବା ବିତର୍କ ଉପରେ ଲୋକସଭାରେ ବିଜେଡି ପକ୍ଷରୁ ସମର୍ଥନ କରିଛନ୍ତି ସାଂସଦ ରାଜଶ୍ରୀ ମଲ୍ଲିକ । ଅଧିକ ପଢନ୍ତୁ

ନୂଆଦିଲ୍ଲୀ: ସଂସଦ ସ୍ବତନ୍ତ୍ର ଅଧିବେଶନର ଆଜି ତୃତୀୟ ଦିନ । ଲୋକସଭାରେ ଆଜି ମହିଳା ସଂରକ୍ଷଣ ବିଲ ଉପରେ ବିତର୍କ ହୋଇଛି । ମହିଳା ସଂରକ୍ଷଣ ବିଲକୁ ବିଜେଡି ପକ୍ଷରୁ ସମର୍ଥନ କରିଛନ୍ତି ସାଂସଦ ରାଜଶ୍ରୀ ମଲ୍ଲିକ । ମୁଖ୍ୟମନ୍ତ୍ରୀଙ୍କ ଚେଷ୍ଟା ସଫଳ ହୋଇଛି । ସେ ତ୍ରିସ୍ତରୀୟ ନିର୍ବାଚନରେ 50 ପ୍ରତିଶତ ସଂରକ୍ଷଣ ଆଣିଥିଲେ । ଆଜି ସଂସଦରେ 5ଜଣ ମହିଳା ସାଂସଦ ପହଞ୍ଚିଛନ୍ତି । ଏହି ବିଲକୁ ସମର୍ଥନ କରି ଜାତି ଓ ସମାଜକୁ ଆଗକୁ ନେବାକୁ ଆଗେଇ ଆସିବାକୁ କହିଛନ୍ତି ସାଂସଦ ରାଜଶ୍ରୀ ମଲ୍ଲିକ ।

ଲୋକସଭାରେ ମହିଳା ସଂରକ୍ଷଣ ବିଲକୁ ନେଇ ହୋଇଥିବା ବିତର୍କରେ ରାଜଶ୍ରୀ ମଲ୍ଲିକ କହିଛନ୍ତି, "ଆମ ଦଳ ତରଫରୁ ମୁଁ ବିଲକୁ ସମର୍ଥନ କରୁଛି । ପ୍ରବାଦ ପୁରୁଷ ବିଜୁ ପଟ୍ଟନାୟକ 1990 ମସିହାରେ ମୁଖ୍ୟମନ୍ତ୍ରୀ ଥିବା ସମୟରେ ତ୍ରିସ୍ତରୀୟ ନିର୍ବାଚନରେ 33 ପ୍ରତିଶତ ସଂରକ୍ଷଣ ବ୍ୟବସ୍ଥା ଆଣିଥିଲେ । ବହୁ ବିରୋଧର ଶିକାର ହୋଇଥିଲେ । ଆଜି ସବୁ ଆକଳନ ଭୁଲ ହୋଇଛି । ନାରୀମାନେ ପ୍ରଗତି କ୍ଷେତ୍ରରେ ଆଗେଇଛନ୍ତି । ନାରୀ ଆଗକୁ ବଢ଼ିଛନ୍ତି । ତ୍ରିସ୍ତରୀୟ ନିର୍ବାଚନରେ ଜଣେ ନାରୀ ସରପଞ୍ଚ, ଜଣେ ମାଆ ଜିଲ୍ଲା ପରିଷଦ ହୋଇଛନ୍ତି । ନବୀନ ପଟ୍ଟନାୟକ ଯେବେ ମୁଖ୍ୟମନ୍ତ୍ରୀ ହେଲେ ସେ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ 50 ପ୍ରତିଶତ ସଂରକ୍ଷଣ ବ୍ୟବସ୍ଥା କରିଥିଲେ । 2019ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ 33 ପ୍ରତିଶତ ସଂରକ୍ଷଣ ବ୍ୟବସ୍ଥା ଲୋକସଭାରେ ଆଣିଥିଲେ । ସେ ସବୁ ରାଜ୍ୟକୁ ଓ କେନ୍ଦ୍ର ସରକାରଙ୍କୁ ମଧ୍ୟ 33ପ୍ରତିଶତ ସଂରକ୍ଷଣ ବିଲ ପାର୍ଲାମେଣ୍ଟରେ ଆଣିବାକୁ ଅନୁରୋଧ କରିଥିଲେ । ଆମେ 7ଜଣ ମହିଳାଙ୍କ ମଧ୍ୟରୁ 5ଜଣ ପାର୍ଲାମେଣ୍ଟରେ ପହଞ୍ଚି ପାରିଛୁ । ଏହା ଆମ ଦଳ ପ୍ରତି ଇତିହାସ ରଚିବା ପରି କହିଲେ ଭୁଲ ହେବ ନାହିଁ ।"

ବିଲକୁ ନେଇ ସାଂସଦ ରାଜଶ୍ରୀ ମଲ୍ଲିକ ଆହୁରି କହିଛନ୍ତି,"ନାରୀ ଆଜି ବହୁତ ଆଗକୁ ବଢିଛି । ନାରୀ କୌଣସି ଗୁଣରେ କମ ନୁହେଁ । ଆବିଷ୍କାର ଉଦ୍ଭାବନ କଥା କୁହନ୍ତୁ, ନ୍ୟାୟଳୟ ବିଦ୍ୟାଳୟ ମନ୍ତ୍ରଣାଳୟ କଥା କୁହନ୍ତୁ ନାରୀ ଆଜି ସବୁ କ୍ଷେତ୍ରରେ ଆଗରେ । ମୁଖ୍ୟମନ୍ତ୍ରୀଙ୍କ ଚିନ୍ତାଧାରା ନାରୀ ଆଗକୁ ବଢ଼ିଲେ ଦେଶ ଆଗକୁ ବଢ଼ିବ ତାହା ପୂରଣ ହୋଇଛି । 2019 ମସିହାରେ ଯେଉଁ ନିଷ୍ପତି ନିଆଯାଇଥିଲା ଆଜି ତାହା ପ୍ରତିପାଦନ ହୋଇଛି । ଆମେ 5ଜଣ ମହିଳା ପାର୍ଲାମେଣ୍ଟରେ ପହଞ୍ଚିଛୁ । ଆଗାମୀ ଦିନରେ ଏହା ଆହୁରି ଫଳପ୍ରଦ ହେବ । ପାରିତ ହେବାକୁ ଥିବା ବିଲର ସଫଳ ରୂପାୟନ ହେବାକୁ ଯାଉଛି ଏବଂ ଏହି ବିଲ୍‌କୁ ପୂର୍ଣ୍ଣମାତ୍ରାରେ ସମର୍ଥନ କରୁଛି । ଏହି ବିଲକୁ ସମର୍ଥନ କରନ୍ତୁ ଦେଶ ଜାତି ଓ ସମାଜକୁ ଆଗକୁ ନିଅନ୍ତୁ ।"

ସଂସଦ ସ୍ବତନ୍ତ୍ର ଅଧିବେଶନର ଦ୍ବିତୀୟ ଦିନରେ ନୂଆ ସଂସଦ ଭବନ ଲୋକସଭାରେ ଆଗତ ହୋଇଥିଲା ମହିଳା ସଂରକ୍ଷଣ ବିଲ୍‌ । ଏହି ବିଲର ନାମ ରଖାଯାଇଛି 'ନାରୀ ଶକ୍ତି ବନ୍ଦନ ଅଧିନିୟମ' । 128ତମ ସମ୍ବିଧାନ ସଂଶୋଧନ ବିଲ୍‌ ଭାବେ ଆଗତ ହୋଇଥିବା ଏହି ସଂରକ୍ଷଣ ବିଲ ଅନୁସାରେ ସଂସଦର ନିର୍ବାଚିତ ସଦନ (ଲୋକସଭା) ଓ ରାଜ୍ୟ ବିଧାନସଭାରେେ ମୋଟ ଆସନର ଏକ ତୃତୀୟାଂଶ ବା 33 ପ୍ରତିଶତ ଆସନ ମହିଳାମାନଙ୍କ ପାଇଁ ସଂରକ୍ଷିତ ରହିବ । ବିଲ ପାସ୍‌ ହେଲେ ଲୋକସଭାରେ ମହିଳା ସଦସ୍ୟଙ୍କ ସଂଖ୍ୟା 181 ହେବ ।