ଭୋପାଲ: ମଧ୍ୟ ପ୍ରଦେଶର ଉଜ୍ଜୈନରେ ଥିବା ପ୍ରସିଦ୍ଧ ମହାକାଳ ମନ୍ଦିର ନିକଟରେ ନିର୍ମାଣ ହେବାକୁ ଥିବା ମହାକାଳ ଭକ୍ତ ନିବାସ ପାଇଁ ଚଳଚ୍ଚିତ୍ର ତାରକା ସୋନୁ ସୁଦ ଦାନ କରିବେ ଅର୍ଥରାଶି । ପ୍ରାୟ 200 କୋଟି ଟଙ୍କା ବ୍ୟୟରେ 32 ଏକର ଜମିରେ ଏହି ଅତ୍ୟାଧୁନିକ ଭକ୍ତ ନିବାସ ନିର୍ମାଣ କାର୍ଯ୍ୟ ଆରମ୍ଭ ହେବାକୁ ଯାଉଛି । ଇମ୍ପେରିଆଲ ହୋଟେଲ ନିକଟରେ ନିର୍ମାଣ ହେବାକୁ ଥିବା ଭକ୍ତ ନିବାସରେ 15 ଟି ବଡ ବ୍ଲକ, ପ୍ରଶାସନ କାର୍ଯ୍ୟାଳୟ ସହିତ 100 ଫୁଟ ପରିମିତ ଏକ ବଗିଚା ମଧ୍ୟ ରହିବ । ଏହି ଭକ୍ତ ନିବାସରେ ପ୍ରାୟ 2,200 ରୁମ୍ ସହ ସମସ୍ତ ଆନୁସଙ୍ଗୀକ ସୁବିଧା ସୁଯୋଗ ମଧ୍ୟ ରହିବା ନେଇ ବ୍ୟବସ୍ଥା କରାଯାଉଛି । ସେହିପରି ଗାଡି ପାର୍କିଂ, ସ୍ବଚ୍ଛତା ଓ ଭକ୍ତଙ୍କ ପାଇଁ ଅନ୍ୟ ବ୍ୟବସ୍ଥା ମଧ୍ୟ ଏହା ପରିସରରେ ଉପଲବ୍ଧ ହେବାକୁ ଯାଉଛି । ଏହି ପ୍ରକଳ୍ପରେ ଦାନ କରିବା ପାଇଁ ନିଜେ ସୋନୁ ପୂର୍ବରୁ ଘୋଷଣା କରିଥିଲେ । ମନ୍ଦିର ପ୍ରଶାସନ ତାଙ୍କ ପ୍ରସ୍ତାବକୁ ଗ୍ରହଣ ମଧ୍ୟ କରିଥିଲା ।
ଭକ୍ତ ନିବାସ ସଲଗ୍ନ ଏରିଆରେ 100 ବସ୍ ପାର୍କିଂ ହେବା ପରି ଷ୍ଟାଣ୍ଡ, ଇ-ବସ୍ ଚାର୍ଜିଂ ଷ୍ଟେସନ, ପ୍ରଶାସନ ଅଫିସ୍, ଅପେକ୍ଷା କକ୍ଷ, ଖାଦ୍ୟ ବିତରଣ କେନ୍ଦ୍ର ମଧ୍ୟ ରହିବ । ସମଗ୍ର ପରିବେଶକୁ ସବୁଜ କରାଯିବା ଉପରେ ମଧ୍ୟ ଧ୍ୟାନ ରଖାଯିବ । ଟ୍ରାଫିକ ସମସ୍ୟା ଏଡାଇବା ପାଇଁ ଏକ ଅଣ୍ଡରପାସ ମଧ୍ୟ ନିର୍ମାଣ ହେବ । ଭକ୍ତ ନିବାସ ପାର୍କିଂଷ୍ଟାଣ୍ଡରେ ପ୍ରାୟ 2,00 ଚାରି ଚକିଆ ଯାନ ପାର୍କିଂ କରାଯାଇ ପାରିବ । ଖୁବଶୀଘ୍ର ଏହି ପ୍ରସ୍ତାବିତ ଭକ୍ତ ନିବାସ ପ୍ରକଳ୍ପ କାର୍ଯ୍ୟ ଆରମ୍ଭ ହୋଇଯିବ । ଜିଲ୍ଲା ପ୍ରଶାସନ ଓ ମନ୍ଦିର ପ୍ରଶାସନ ଏନେଇ ପ୍ରକ୍ରିୟା ଜାରି ରଖିଛନ୍ତି ।
ସୂଚନା ଅନୁସାରେ, ଗତବର୍ଷ (2022) ଡିସେମ୍ବର 22 ତାରିଖରେ ସୋନୁ ସୁଦ ତାଙ୍କ ପତ୍ନୀଙ୍କ ସହ ଉଜ୍ଜୈନ ଆସି ବାବା ମହାକାଳଙ୍କ ଦର୍ଶନ କରିଥିଲେ । ଏହି ସମୟରେ ସୋନୁ ସୁଦଙ୍କୁ ତତ୍କାଳୀନ ଜିଲ୍ଲାଧିକାରୀ ଆଶିଷ ସିଂଙ୍କ ଦ୍ବାରା ଇମ୍ପେରିଆଲ୍ ହୋଟେଲ ନିକଟରେ ନିର୍ମାଣ ହେବାକୁ ଥିବା ଭକ୍ତ ନିବାସ ସମ୍ପର୍କରେ ସୂଚନା ଦିଆଯାଇଥିଲା । ସେହି ସମୟରେ ସୋନୁ ସୁଦ ଏହି ଭବ୍ୟ ନିର୍ମାଣ ପାଇଁ ଦାନ କରିବାକୁ ଆଗ୍ରହ ପ୍ରକାଶ କରିଥିଲେ । ପ୍ରସ୍ତାବ ଚୂଡାନ୍ତ ହୋଇ ପ୍ରକଳ୍ପ କାର୍ଯ୍ଯ ଆରମ୍ଭ ହେଲେ ସେ ଅର୍ଥରାଶି ଦାନ କରିବା ପାଇଁ କହିଥିଲେ । ତେବେ ତାଙ୍କ ପ୍ରସ୍ତାବକୁ ମନ୍ଦିର ପ୍ରଶାସନ ମଧ୍ୟ ନିର୍ଦ୍ବନ୍ଦରେ ଗ୍ରହଣ କରିଥିଲା । ଏବେ ନିକଟରେ ସେ ନିଜ ସ୍ବଇଚ୍ଛାରେ ଦାନ କରିପାରନ୍ତି ବୋଲି ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
