ନୂଆଦିଲ୍ଲୀ: ଆଧାରକାର୍ଡ ସହିତ ଯୋଡି ହୋଇ ନପାରିବାରୁ ରଦ୍ଦ 3 କୋଟି ରାସନ କାର୍ଡ ଉପରେ କେନ୍ଦ୍ର ସରକାରଙ୍କୁ ଜବାବ ମାଗିଛନ୍ତି ସୁପ୍ରିମକୋର୍ଟ । ବୁଧବାର ଶୁଣାଣି ସମୟରେ ଏହାକୁ ଅତ୍ୟନ୍ତ ଗମ୍ଭୀର ମାମଲା ବୋଲି କହି କେନ୍ଦ୍ର ସରକାର ଓ ସମସ୍ତ ରାଜ୍ୟକୁ କୋର୍ଟ ଉତ୍ତର ମାଗିଛନ୍ତି ।
ସୁପ୍ରିମକୋର୍ଟର ମୁଖ୍ୟ ବିଚାରପତି ଏସଏ ବୋବଡେ, ବିଚାରପତି ଏସି ବୋପନ୍ନା ଓ ବିଚାରପତି ଭି ରାମ ସୁବ୍ରମଣ୍ୟମଙ୍କ ତିନି ଜଣିଆ ଖଣ୍ଡପୀଠ କହିଛନ୍ତି, ଏହାକୁ ବିରୋଧାତ୍ମକ ମାମଲା ଭାବେ ଦେଖିବା ଉଚିତ ନୁହେଁ । କାରଣ ଏହା ଅତ୍ୟନ୍ତ ଗମ୍ଭୀର ମାମଲା । ମାମଲାର ଅନ୍ତିମ ଶୁଣାଣି ହେବ ବୋଲି କହିଛନ୍ତି ସୁପ୍ରିମକୋର୍ଟ ।
ସିଜେଆଇ କହିଛନ୍ତି, ବମ୍ବେ ହାଇକୋର୍ଟରୁ ମଧ୍ୟ ମୋ ପାଖକୁ ଏଭଳି ମାମଲା ଆସିଥିଲା । ମୋତେ ଲାଗୁଛି କି ଏହି ମାମଲା ସମ୍ବନ୍ଧିତ ହାଇକୋର୍ଟରେ ଦାଏର କରାଯିବା ଦରକାର । ଯାଚିକାକର୍ତ୍ତା ନିଜ ଦସ୍ତାବିଜରେ କେନ୍ଦ୍ର ସରକାର ପାଖାପାଖି 3 କୋଟି ରାସନ କାର୍ଡ ରଦ୍ଦ କରିଥିବା ଦାବି କରିଛନ୍ତି ।