ଯାଜପୁର: ଆରମ୍ଭ ହେଲାଣି ଶାରଦୀୟ ଦୁର୍ଗାପୂଜା । ଏଥିପାଇଁ ମା' ବିରଜାଙ୍କ ପୀଠ ହୋଇଉଠିଛି ଚଳଚଞ୍ଚଳ । ଯାଜପୁର ମା' ବିରଜାଙ୍କ ଷୋଡଶ ଉପଚାର ମୂଳାଷ୍ଟମୀ ଠାରୁ ନବମୀ ଯାଏଁ ଚାଲିବ । ପ୍ରତିଦିନ ନୂଆ ନୂଆ ବେଶ ଧାରଣ କରି ଭକ୍ତଙ୍କୁ ଦର୍ଶନ ଦେଉଛନ୍ତି ମା' । ଏହି ବେଶ ଦର୍ଶନ ପାଇଁ ଦୂରଦୂରାନ୍ତରୁ ଭକ୍ତଙ୍କ ସମାଗମ ହେଉଛି ।
ଭକ୍ତଙ୍କୁ ପାଦସ୍ପର୍ଶ କରିବାର ସୁଯୋଗ:
ଏଥିପାଇଁ ଭଜନ କୀର୍ତ୍ତନର ତାଳେ ତାଳେ କଳସ ଯାତ୍ରା କରାଯାଇ ମନ୍ଦିରରେ ୧୦ କଳସ ସ୍ଥାପନ କରାଯାଇଛି । ଏହାପରେ ରୀତିନୀତି ଅନୁଯାୟୀ ଅନ୍ୟ ସ୍ବତନ୍ତ୍ର ଦିନମାନଙ୍କରେ ଆଉ ୬ଟି କଳସ ସ୍ଥାପନ ହେବ । ପଞ୍ଚମୀ ଠାରୁ ମା'ଙ୍କ ନିକଟରେ ଯଜ୍ଞ ଆରମ୍ଭ ହୋଇ ନବମୀ ପର୍ଯ୍ୟନ୍ତ ଚାଲିବ । ଏହି ସମୟରେ ଶ୍ରଦ୍ଧାଳୁମାନେ ମନ୍ଦିର ମଧ୍ୟରେ ପ୍ରବେଶ କରି ମୁଖ ଦର୍ଶନ ସହ ପାଦସ୍ପର୍ଶ କରିବାର ସୁଯୋଗ ପାଇଥାନ୍ତି । ଭାରତର ୫୧ଟି ଶକ୍ତିପୀଠ ମଧ୍ୟରୁ ମା' ବିରଜାଙ୍କ ପୀଠ ଅନନ୍ୟ । ବିଶେଷ ଭାବରେ ଏହି ସମୟରେ ମା'ଙ୍କ ଦର୍ଶନ କଲେ କୋଟିଜନ୍ମର ପୂଣ୍ୟ ରହିଥାଏ ବୋଲି ବିଶ୍ୱାସ ରହିଛି ।
ନବଦିନାତ୍ମକ ରଥଯାତ୍ରା:
ମା' ବିରଜା ହେଉଛନ୍ତି ଦ୍ବିଭୂଜା । ମା' ବିରଜାଙ୍କର ସାତ୍ତ୍ବିକ, ବୈଦିକ ଓ ତାନ୍ତ୍ରିକ ମତରେ ପୂଜା କରାଯାଇଥାଏ । ଶାରଦୀୟ ଦୁର୍ଗୋତ୍ସବ ସମୟରେ ମା' ବିରଜାଙ୍କ ମନ୍ଦିରର 3 ଟି ପ୍ରମୁଖ ବୈଶିଷ୍ଟ୍ୟ ଦେଖିବାକୁ ମିଳେ । ପ୍ରଥମଟି ହେଲା ମହାଳୟା ଦିନ ନାଭିଗୟାରେ ପିତୃପୁରୁଷଙ୍କୁ ପିଣ୍ଡଦାନ କରାଯାଏ । ଦ୍ଵିତୀୟଟି ହେଲା ପଞ୍ଚମୀଠାରୁ ମହାନବମୀ ପର୍ଯ୍ୟନ୍ତ ମା'ଙ୍କ ମୁଖ ଦର୍ଶନ ଓ ପାଦସ୍ପର୍ଶର ସୁଯୋଗ ପାଇବେ ଶ୍ରଦ୍ଧାଳୁ । ତୃତୀୟଟି ହେଲା ମା' ବିରଜାଙ୍କ ନବଦିନାତ୍ମକ ରଥଯାତ୍ରା ।
ମା' ଦୁର୍ଗାଙ୍କ ବେଢା ପରିକ୍ରମା:
ସେବାୟତ ରାମଚନ୍ଦ୍ର ପାଣି କହିଛନ୍ତି, "ପ୍ରତିପଦା ଠାରୁ ନବମୀ ଯାଏ ମା'ଙ୍କ ଚଳନ୍ତି ପ୍ରତିମା ମା' ଦୁର୍ଗାଙ୍କ ରୂପରେ ସିଂହଧ୍ବଜ ରଥରେ ଆସିନ୍ନ ହୋଇ ମନ୍ଦିର ବେଢା ପରିକ୍ରମା କରନ୍ତି । ମା'ଙ୍କୁ ରଥରେ ଦର୍ଶନ କଲେ କୋଟିଜନ୍ମର ପୂଣ୍ୟ ମିଳେ ବୋଲି ବିଶ୍ବାସ ରହିଛି । ଏଭଳି ନିଆରା ପରମ୍ପରା ଅନ୍ୟ କୌଣସି ଦେବୀ ପୀଠରେ ଦେଖିବାକୁ ମିଳେନାହିଁ । ମହାନବମୀ ପରେ ମା' ମହିଷାମର୍ଦ୍ଦିନୀ ସମସ୍ତ ଦୁଷ୍ଟ ଶକ୍ତିର ବିନାଶ କରନ୍ତି ।" ବହୁ ଭକ୍ତ ମା' ବିରଜାଙ୍କ ମା'ଙ୍କ ଦର୍ଶନ କରି ଆତ୍ମବିଭୋର ହେଇଛନ୍ତି ସୁଦୂର ହାଇଦ୍ରାବାଦରୁ ଆସିଥିବା ଏକ ପରିବାର । ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ଅଧିକ ଭିଡ ହେବାର ସମ୍ଭାବନାକୁ ଦୃଷ୍ଟିରେ ରଖି ମନ୍ଦିର ପ୍ରଶାସନ ପକ୍ଷରୁ ସମସ୍ତ ପ୍ରକାର ବନ୍ଦବୋସ୍ତ ଗ୍ରହଣ କରାଯାଇଥିବା ସୂଚନା ମିଳିଛି ।
ଇଟିଭି ଭାରତ, ଯାଜପୁର
