ମୁମ୍ବାଇ: କ୍ରୁଜ ଡ୍ରଗ୍ସ ପାର୍ଟି ମାମଲାର ତଦନ୍ତ ଦାୟିତ୍ବରୁ ହଟିଛନ୍ତି ସମୀର ୱାଙ୍ଖଡେ । ତାଙ୍କ ବିରୁଦ୍ଧରେ ସାଙ୍ଘାତିକ ଅଭିଯୋଗ ଆସିବା ପରେ ଏପରି କରିଛି ଏନସିବି । ବର୍ତ୍ତମାନ NCB ଆର୍ଯ୍ୟନ ଖାନ କେସ ସହ ୬ଟି କେସର ତଦନ୍ତ ଭାର SITକୁ ହସ୍ତାନ୍ତର କରିଛି । ଯାହାର ନେତୃତ୍ବ ନେବେ IPS ସଞ୍ଜୟ କୁମାର ସିଂ । ବର୍ତ୍ତମାନ SIT ମାମଲାର ଯାଞ୍ଚ କରିବାକୁ ଥିବାବେଳେ ସେପଟେ ତଦନ୍ତରୁ ବାହାରିବା ପରେ ସମୀର ପ୍ରତିକ୍ରିୟା ରଖିଛନ୍ତି ।
ସେ କହିଛନ୍ତି, ମୁଁ NCB ମୁମ୍ବାଇ ୟୁନିଟର ଜୋନାଲ ଡାଇରେକ୍ଟର ଏବଂ ରହିବି ମଧ୍ୟ । ମୋତ ମୋ ପୋଷ୍ଟରୁ ବାହାର କରାଯାଇନାହିଁ । ମୁଁ ଅନୁରୋଧ କରୁଛି କି କେନ୍ଦ୍ରୀୟ ଏଜେନ୍ସି ଦ୍ବାରା ଆର୍ଯ୍ୟନ ଖାନ ଡ୍ରଗ୍ସ କେସର ଯାଞ୍ଚ ହେଉ । ଡ୍ରଗ୍ସ କେସ ସଙ୍ଗେ ସଙ୍ଗେ ମନ୍ତ୍ରୀ ନୱାବ ମଲ୍ଲିକ ଆଣିଥିବା ତମାମ୍ ଅଭିଯୋଗ ମଧ୍ୟ କେନ୍ଦ୍ରୀୟ ଏଜେନ୍ସି ତଦନ୍ତ କରୁ ।
ସେହିପରି ବର୍ତ୍ତମାନ ଦିଲ୍ଲୀ SIT ମୁମ୍ବାଇ କ୍ରୁଜ ଡ୍ରଗ୍ସ ମାମଲାର ତଦନ୍ତ କରିବାକୁ ନେଇ ସମୀର କହିଛନ୍ତି, ଏହା ଭଲ ଯେ ସ୍ବତନ୍ତ୍ର ଅନୁସନ୍ଧାନକାରୀ ଦଳ(SIT ) ଏବେ ଏହି ମାମଲାରେ ଯାଞ୍ଚ କରିବ । ଏଥିସହ କେନ୍ଦ୍ରୀୟ ଏଜେନ୍ସି ଦ୍ବାରା ମାମଲାର ଯାଞ୍ଚ ନେଇ ସେ କୋର୍ଟରେ ରିଟ୍ ପିଟିସନ ଦାୟର କରିଥିବା କଥା ମଧ୍ୟ କହିଛନ୍ତି ଏବଂ ଆଗକୁ ମଧ୍ୟ ତାଙ୍କର 'ଡ୍ରଗ୍ସ ବିରୋଧି ଅପରେସନ' ଉପରେ କାର୍ଯ୍ୟ ଜାରି ରଖିବେ ବୋଲି ପ୍ରକାଶ କରିଛନ୍ତି ସମୀର ।
ଉଲ୍ଲେଖଯୋଗ୍ୟ, ଡ୍ରଗ୍ସ ପାର୍ଟି ମାମଲାର ଯାଞ୍ଚ କରିବାକୁ ଥିବା ସଞ୍ଜୟ କୁମାର ସିଂ ୧୯୯୬ ବ୍ୟାଚ୍ ଓଡିଶା IPS କ୍ୟାଡର ଅଧିକାରୀ ଅଟନ୍ତି । ସେ ଓଡିଶା ପୋଲିସ ଏବଂ CBI ସହ ବିଭିନ୍ନ କାର୍ଯ୍ୟ ତୁଲାଇଛନ୍ତି ।
