ହାଇଦ୍ରାବାଦ: ପଡିବ ଅଭିନେତା ରଣଦୀପ ହୁଡା ଏବଂ ଲିନ ଲୈଶ୍ରମଙ୍କ ହାତଗଣ୍ଠି । ଆଉ ମାତ୍ର ୪ ଦିନ ପରେ ଅର୍ଥାତ୍ ୨୯ ତାରିଖରେ ଉଭୟ ବିବାହ ବନ୍ଧନରେ ବାନ୍ଧି ହେବେ । ମଣିପୁରର ଇମ୍ଫାଲରେ ସେମାନଙ୍କ ବିବାହ ଆୟୋଜନ ହେବା ନେଇ ସ୍ଥିର କରାଯାଇଛି । ଲିନଙ୍କ ଘର ଇମ୍ଫାଲରେ ହୋଇଥିବାବେଳେ ସେହିଠାରେ ବିବାହ ପରେ ମୁମ୍ବାଇରେ ବନ୍ଧୁ ଏବଂ ସହକର୍ମୀଙ୍କ ପାଇଁ ସ୍ବତନ୍ତ୍ର ପାର୍ଟିର ଆୟୋଜନ କରାଯିବ । ଏହି ଶୁଭ କାର୍ଯ୍ୟ ପାଇଁ ସମସ୍ତଙ୍କ ଆଶୀର୍ବାଦ ଲୋଡିଥିବା କହିଛନ୍ତି ପ୍ରେମୀ ଯୁଗଳ । ତେବେ ହୁଡା ଓ ଲିନଙ୍କ ବିବାହ ପାଖେଇ ଆସୁଥିବାବେଳେ ଫ୍ୟାନ୍ସ ମାନେ ମଧ୍ୟ ଉଭୟଙ୍କୁ ଶୁଭେଚ୍ଛା ଜଣାଇଛନ୍ତି ।
ତେବେ ଲିନଙ୍କ ବୟସ ୩୭ବର୍ଷ ହୋଇଥିବାବେଳେ ସେ ଜଣେ ପ୍ରତିଭାବାନ ମଡେଲ ଓ ଅଭିନେତ୍ରୀ । ୨୦୦୭ ମସିହାରେ ଲିନ ପ୍ରଥମେ ଓମ ଶାନ୍ତି ଓମ ଚଳଚ୍ଚିତ୍ରରେ ନଜର ଆସିଥିଲେ । ଏହାପରେ ସେ ମ୍ୟାରିକମ୍, ଉମ୍ରିକା, ରଙ୍ଗୁନ ଏବଂ ଜାନେ ଜାନ ଭଳି ଚଳଚ୍ଚିତ୍ରରେ ଅଭିନୟ କରିଛନ୍ତି । ସେହିପରି ରଣଦୀପଙ୍କ ବୟସ ୪୭ବର୍ଷ ହୋଇଥିବାବେଳେ ସେ ମଧ୍ୟ ଜଣେ ପ୍ରତିଭା ସମ୍ପନ୍ନ ଅଭିନେତା । ସରବଜିତ, ହାଇୱେ, ସୁଲ୍ତାନ ଏବଂ ସାହିବ ବିବି ଔର ଗ୍ୟାଙ୍ଗ୍ଷ୍ଟର ଭଳି ଅନେକ ଚଳଚ୍ଚିତ୍ର ଅଭିନୟ କରି ସେ ଦର୍ଶକଙ୍କ ମନ ଜିଣିଛନ୍ତି ।
ଗତ ଅଗଷ୍ଟ ମାସରେ ହୁଡାଙ୍କ ଜନ୍ମଦିନ ଅବସରରେ ଇନଷ୍ଟାଗ୍ରାମରରେ ଲିନ ଶୁଭେଚ୍ଛା ଜଣାଇ ପୋଷ୍ଟ କରିଥିଲେ । ସେ ଲେଖିଥିଲେ 'My hot fudge' । ଯାହା ପରେ ଲିନ ଏବଂ ରଣଦୀପଙ୍କ ରିଲେସନସିପକୁ ନେଇ ଆରମ୍ଭ ହୋଇଥିଲା ଚର୍ଚ୍ଚା । ଆଉ ଏବେ ସବୁ କଳ୍ପନାଜଳ୍ପନାର ଅନ୍ତ ଘଟାଇ ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି ଏହି ପ୍ରେମୀ ଯୁଗଳ । ଏହି ଶୁଭ କାର୍ଯ୍ୟ ପାଇଁ ସେମାନେ ସମସ୍ତଙ୍କ ଆଶୀର୍ବାଦ ଲୋଡିଥିବା ନେଇ ସୋସିଆଲ ମିଡିଆରେ ଏକ ପୋଷ୍ଟରେ ଉଲ୍ଲେଖ କରିଛନ୍ତି ।
ଏହା ବି ପଢନ୍ତୁ...ବିକିଙ୍କ ଏହି କାମ ପାଇଁ ରାଗି ଯାଇଥିଲେ କ୍ୟାଟ୍ରିନା, ବିବାହ ବାତିଲ କରିବାକୁ ଦେଇଥିଲେ ଧମକ
ତେବେ ରଣଦୀପ ତାଙ୍କର ଆଗାମୀ ଚଳଚ୍ଚିତ୍ର 'ସ୍ବତନ୍ତ୍ର ବୀର ସାବରକର' ପାଇଁ ବର୍ତ୍ତମାନ ବ୍ୟସ୍ତ ଅଛନ୍ତି । ଯାହା ସ୍ବାଧୀନତା ସଂଗ୍ରାମୀ ବିନାୟକ ଦାମୋଦର ସାବରକରଙ୍କ ଜୀବନୀ ଉପରେ ଆଧାରିତ । ତେବେ ଏହି ଫିଲ୍ମରେ ରଣଦୀପଙ୍କ ବିପକ୍ଷରେ ଅଙ୍କିତା ଲୋଖଣ୍ଡେ ନଜର ଆସିବେ । ଏହା ଆନନ୍ଦ ପଣ୍ଡିତ ମୋସନ ପିକ୍ଚର୍ସ, ରଣଦୀପ ହୁଡା ଫିଲ୍ମ, ଲିଜେଣ୍ଡ ଷ୍ଟୁଡିଓ ଏବଂ ଆଭାକ ଫିଲ୍ମସ ଦ୍ବାରା ନିର୍ମାଣ କରାଯାଉଛି ।
