ବେଙ୍ଗାଲୁରୁ: କର୍ଣ୍ଣାଟକ ରାଜଧାନୀ ବେଙ୍ଗାଲୁରୁ ବସଷ୍ଟାଣ୍ଡରେ ଦକ୍ଷିଣ ସିନେ ଜଗତର ସୁପରଷ୍ଟାର ରଜନୀକାନ୍ତ । ଦିନେ ଏଇଠି କଣ୍ଡକ୍ଟର ଭାବେ କାମ କରୁଥିଲେ ରଜନୀକାନ୍ତ । ତେବେ ହଠାତ୍ BMTC ଡିପୋ ନଂ-୪ରେ ସୁପରଷ୍ଟାରଙ୍କୁ ଦେଖି ସମସ୍ତେ ନିଜ ଆଖିକୁ ବିଶ୍ବାସ କରିପାରିନଥିଲେ । ଏହାପରେ ଜମିଥିଲା ପ୍ରବଳ ଲୋକଙ୍କ ପ୍ରବଳ ଭିଡ଼ । ରଜନୀକାନ୍ତଙ୍କ ଟିକିଏ ଝଲକ ପାଇବା ଲାଗି ଲୋକେ ନିଜ ଗନ୍ତବ୍ୟ ସ୍ଥଳକୁ ଯିବା ପରିବର୍ତ୍ତେ ଅଭିନେତାଙ୍କ ଆଡ଼କୁ ଧାଇଁଥିବା ଦେଖିବାକୁ ମିଳିଥିଲା ।
ରଜନୀକାନ୍ତ ଏବେ ନିଜ ଗସ୍ତକୁ ନେଇ ବେଶ ଚର୍ଚ୍ଚାରେ ରହୁଛନ୍ତି । ତେବେ ମଙ୍ଗଳବାର ବେଙ୍ଗାଲୁରୁ ମେଟ୍ରୋପଲିଟାନ ଟ୍ରାନ୍ସପୋର୍ଟ କର୍ପୋରେସନ ଡିପୋ ନଂ-୪ରେ ପହଞ୍ଚିଥିଲେ । ଏକ ଧଳା ରଙ୍ଗର କୁର୍ତ୍ତା ସହିତ ଏହି ଡିପୋରେ ପହଞ୍ଚି ପୁରୁଣା ସ୍ମୃତିକୁ ତାଜା କରିଥିଲେ ସୁପରଷ୍ଟାର । କିଛି ସୁରକ୍ଷାକର୍ମୀଙ୍କ ସହିତ ବସ୍ ଡିପୋରେ ରଜନୀକାନ୍ତ ପହଞ୍ଚି ନିଜ ଫ୍ୟାନ୍ସଙ୍କ ଗହଣରେ ସମୟ ବିତାଇଥିଲେ । ଏହାସହିତ BMTC ଷ୍ଟାଫଙ୍କ ସହିତ ରଜନୀକାନ୍ତ ଫଟୋ ଉଠାଉଥିବା ମଧ୍ୟ ଦେଖିବାକୁ ମିଳିଥିଲା ।
୧୯୭୫ ମସିହାରେ କେ ବାଲାଚନ୍ଦ୍ରରଙ୍କ ନିର୍ଦ୍ଦେଶିତ ଫିଲ୍ମ ଅପୂର୍ବ ରାଗଙ୍ଗଲରେ ଅଭିନୟ କରିବା ପୂର୍ବରୁ ଏହି ଡିପୋରେ ରଜନୀକାନ୍ତ ବସ୍ କଣ୍ଡକ୍ଟର ଭାବେ କାମ କରୁଥିଲେ । ଏହାସହିତ ସେ ଥିଏଟରରେ ମଧ୍ୟ ଅଭିନୟ କରୁଥିଲେ । ହେଲେ ତାଙ୍କ ବନ୍ଧୁ ରାଜ ବାହାଦୂରଙ୍କଠାରୁ ପ୍ରେରିତ ହୋଇ ଅଭିନୟ ଜଗତରେ ପାଦ ଥାପିଥିଲେ । ଏହାପରେ ସେ ଅପୂର୍ବ ରାଗଙ୍ଗଲରେ ଅଭିନେତା ଭାବେ ବର୍ଷିୟାନ ଅଭିନେତା କମଲ ହାସନଙ୍କ ସହିତ ସ୍କ୍ରିନ ସେୟାର କରିଥିଲେ ।
ସୂଚନା ଥାଉ କି ସୁପରଷ୍ଟାର ରଜନୀକାନ୍ତଙ୍କ ପ୍ରକୃତ ନାମ ହେଉଛି ଶିବାଜୀ ରାଓ ଗାଇକୱାଡ । ସେ ବେଙ୍ଗାଲୁରୁରେ ଏକ ମରାଠୀ ପରିବାରରେ ଜନ୍ମଗ୍ରହଣ କରିଥିଲେ । ରଜନୀକାନ୍ତ ପ୍ରଥମେ ଜଣେ ଶ୍ରମିକ ଭାବେ କାର୍ଯ୍ୟ କରିଥିଲେ । ଏହାପରେ ସେ ବସ୍ କଣ୍ଡକ୍ଟର ଭାବେ ଏହି ଡିପୋରେ କାମ କୁରଥିଲେ । ଖାଲି ସମୟରେ ସେ ଥିଏଟରରେ ଅଭିନୟ କୁରଥିଲେ । ଅପୂର୍ବ ରାଗଙ୍ଗଲ ଫିଲ୍ମରେ ଅଭିନୟ କରିବା ପରେ ସେ ରାତାରାତି ସୁପରଷ୍ଟାର ପାଲଟିଥିଲେ । ତାଙ୍କ ଅଭିନୟ ଯାଦୁରେ ଦର୍ଶକ ମହଲରେ ଲୋକପ୍ରିୟତା ବଢିଥିଲା । ଏପରିକି ଅପୂର୍ବ ରାଗଙ୍ଗଲ ଫିଲ୍ମକୁ ଜାତୀୟ ପୁରସ୍କାର ମଧ୍ୟ ମିଳିଥିଲା ।
