ମୁମ୍ବାଇ: ମହାମାରୀ କୋରୋନା ପାଇଁ ଦେଶରେ ଲାଗି ରହିଥିଲା ଲକଡାଉନ ସଟଡାଉନ କଟକଣା । କଟକଣା କାହାର ଜୀବନକୁ ବିପର୍ଯ୍ୟସ୍ତ କରିଦେଇଥିବା ବେଳେ କାହାର ଜୀବନର ମୋଡ ବଦଳାଇ ଦେଇଥିଲା । କାହାର ବୃତ୍ତି ବଦଳିଥିବା ବେଳେ କାହାର ଜୀବନଚର୍ଯ୍ୟା ବଦଳି ଯାଇଛି ।
ଏହି ସବୁ ଭିତରେ ମହାରାଷ୍ଟ୍ର ପୁନେରୁ ଆସିଛି ଏକ ଭଲ ଖବର... ଲକଡାଉନ କଟକଣାର ସୁଦୁପଯୋଗ କରି ୨୭ ବର୍ଷିୟା ରାଧିକା ସୋନୱାନେ ୩୦ ରୁ ଅଧିକ ଶୁଆଙ୍କୁ କରିଛନ୍ତି ସାଥୀ । ପୁଣେ ସ୍ଥିତ ଭଡାଘର ବାଲକୋନିରେ ସେ ଶୁଆଙ୍କ ପାଇଁ ଖାଦ୍ୟ ଓ ପାନୀୟର ବ୍ୟବସ୍ଥା କରିଛନ୍ତି । ପ୍ରଥମେ ପ୍ରଥମେ ଶୁଆ ଆସୁନଥିଲେ । ଧୀରେ ଧୀରେ ରାଧିକାଙ୍କ ବ୍ୟବହାରରେ ଆକର୍ଷିତ ହେଲେ ଶୁଆ ।
ଏବେ ପ୍ରତିଦିନ ଘରର ସଦସ୍ୟ ଭଳି ରାଧିକାଙ୍କ ବାଲକୋନୀରେ ଆଜି ହାଜିରା ପକାଇ ଯାଆନ୍ତି ଶୁଆ ଦଳ । ବାଲକୋନୀରେ ବ୍ୟବସ୍ଥା କରିଥିବା ପାତ୍ରରୁ ବି ଖାଦ୍ୟ ଖାଇବା ସହ ପାଣି ପିଇ ଉଡି ଯାଆନ୍ତି ଏହି ଶୁଆ ପଲ । ରାଧିକାଙ୍କ ପଡୋଶୀ ମଧ୍ୟ ଏବେ ଶୁଆଙ୍କୁ ଖାଦ୍ୟ ଦେଉଛନ୍ତି । ଆଉ ରାଧିକା ଲକଡାଉନ ବେଳେ ଏକାଧିକ ଶୁଆଙ୍କୁ ସାଙ୍ଗ କରି ଏବେ ବେଶ ଖୁସି ।
ଏହାବାଦ ସମସ୍ତ ଶୂଆ ଯେମିତି ବିନା ଭୟରେ ଆସି ଖାଦ୍ୟ ଖାଇ ପାରିବେ ତାହାର ସମସ୍ତ ବନ୍ଦୋବସ୍ତ କରିଛନ୍ତି ରାଧିକା । ସେମାନଙ୍କ ପାଇଁ ଖାଦ୍ୟ କୁଣ୍ଡ, ବସିବା ପାଇଁ ବ୍ୟବସ୍ଥା, ତାଙ୍କୁ ସୁହାଇବା ଭଳି ଘରେ ପରିବେଶ ଟିଏ ମଧ୍ୟ ସୃଷ୍ଟି କରିଛନ୍ତି । ଆଉ ଦେଶୀ ବିଦେଶୀ ଶୁଆଙ୍କ କିଚିରି ମିଚିରି ରାବରେ ରାଧିକାଙ୍କ ଘରେ ଏକ ଭିନ୍ନ ପରିବେଶ ଲାଗି ରହୁଛି ।
ମହାମାରୀରେ ସର୍ବାଧିକ ପ୍ରଭାବିତ ହୋଇଥିବା ମହାରାଷ୍ଟ୍ରରେ ଦୀର୍ଘଦିନ ଧରି ଲକଡାଉନ ସଟଡାଉନ ଲାଗି ରହିଥିଲା । ଫଳରେ ବୃତ୍ତିରେ ଜଣେ ଫାଇନାନ୍ସ କର୍ମଚାରୀ ରାଧିକା କୋଭିଡ କଟକଣା ପାଇଁ ଘରେ ରହି ଅଫିସ କାମ କରୁଛନ୍ତି । ଏହି ସମୟରେ ବଳକା ସମୟ ବାହାର କରି ଏବେ ୩୦ ରୁ ଅଧିକ ଦେଶୀ ବିଦେଶୀ ଶୁଆଙ୍କ ପାଲଟିଛନ୍ତି ଅନ୍ତରଙ୍ଗ ବନ୍ଧୁ । ଶୁଆ ମାନେ ମଧ୍ୟ ରାଧିକାଙ୍କ ସ୍ନେହ ଶ୍ରଦ୍ଧା ଭଲ ପାଇବା ପାଇ ବେଶ ଖୁସି ।
ବ୍ୟୁରୋ ରିପୋର୍ଟ, ଇଟିଭି ଭାରତ
