ଡେରାଡୁନ: ପ୍ରାକୃତିକ ବିପର୍ଯ୍ୟୟ ପାଇଁ ସବୁବେଳେ ଚର୍ଚ୍ଚାରେ ଥାଏ ଉତ୍ତରାଖଣ୍ତ । କେତେବେଳେ ଭୂସ୍ଖଳନ ତ ଆଉ କେବେ ବାଦଲଫଟା ବର୍ଷାରେ ଧନଜୀବନ ହାନି ଘଟିଥାଏ । ସେହିପରି ଗୁରୁବାର ବିଳମ୍ବିତ ରାତିରେ ଉତ୍ତରକାଶୀର ପୁରୋଲା (Purola of Uttarkashi district)ରେ ପ୍ରବଳ ବର୍ଷା ହୋଇଥିଲା । ଏଥିରେ (PNB ATM Swept Away in Purola) ଏକ ଘରୋଇ ବ୍ୟାଙ୍କର ଏଟିଏମ ମେସିନ୍ ବର୍ଷା ପାଣିରେ ଭାସି ଯାଇଛି । ଏହାସହ ୮ ଟି ଦୋକାନ ଘର ଭାସି ଯାଇ କୁମାଲୋ ନଦୀ ଗର୍ଭରେ ମିଶିଯାଇଛି । ତେବେ ଏଥିରେ କେହି ମୃତାହତ ହୋଇ ନଥିବା ସୂଚନା ମିଳିଛି ।
PNB ଶାଖା ମ୍ୟାନେଜର ଚଞ୍ଚଳ ଯୋଶୀଙ୍କ ସୂଚନା ଅନୁସାରେ, ''ବୁଧବାର ସନ୍ଧ୍ୟାରେ ପୁରୋଲା ନିକଟରେ ଥିବା ସେହି ଏଟିଏମରେ ୨୪ ଲକ୍ଷ ଟଙ୍କା ଭର୍ତ୍ତି କରାଯାଇଥିଲା । ତେବେ ଏଟିଏମରେ କେତେ ନଗଦ ଟଙ୍କା ରହିଥିଲା, ଏନେଇ ତଦନ୍ତ ପରେ ସ୍ପଷ୍ଟ ହେବ ।" ପୁରୋଲାରେ ବର୍ଷା ଯୋଗୁଁ ସ୍ଥିତି ସଙ୍ଗୀନ ରହିଛି । ଏକାଧିକ ଘର, ଦୋକାନ ଘର ଗୁଡିକ ଭାଙ୍ଗି ଯାଇଛି । ଘଟଣାସ୍ଥଳରେ ପୁରୋଲା ପ୍ରଶାସନିକ ଅଧିକାରୀମାନେ ପହଞ୍ଚି କ୍ଷୟକ୍ଷତିର ଆକଳନ କରୁଛନ୍ତି ।
ଏହାସହ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ଜିଲ୍ଲାର ଏକାଧିକ ସ୍ଥାନରେ ଭୂସ୍ଖଳନ ଯୋଗୁଁ ରାସ୍ତା ଗୁଡିକ ବନ୍ଦ ହୋଇଯାଇଛି । ଫଳରେ ବିଭିନ୍ନ ସ୍ଥାନରେ ଗାଡି ଗୁଡିକ ଅଟକି ରହିଛି । ସେପଟେ,ଡେରାଡୁନ ଜିଲ୍ଲାର ଛାର୍ଭା (Chharba village) ଗାଁରେ ପ୍ରବଳ ବର୍ଷା ଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଘଟଣାସ୍ଥଳରେ ଏସଡିଆରଏଫ ପହଞ୍ଚି ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ନେଇଛନ୍ତି ।
