ରାୟପୁର: ଚଳିତ ୫ ରାଜ୍ୟରେ ବିଧାନସଭା ନିର୍ବାଚନ ଓ ସାଧାରଣ ନିର୍ବାଚନ ପୂର୍ବରୁ ବିହାର ସରକାରଙ୍କ ଜାତିଭିତ୍ତିକ ଜନଗଣନା ଏକ ନୂଆ ନିର୍ବାଚନୀ ପ୍ରସଙ୍ଗ ସୃଷ୍ଟି କରିଛି । ନୀତିଶ ସରକାରଙ୍କ ଏହି ଜନଗଣନାକୁ କଂଗ୍ରେସ ସମର୍ଥନ କରିଛି । ରାହୁଲ ଗାନ୍ଧୀ କହିଛନ୍ତି, ଯେଉଁ ଜାତିର ଜନସଂଖ୍ୟା (ଆବାଦି) ଯେତେ, ସେମାନଙ୍କର ଅଧିକାର ମଧ୍ୟ ସେତେ ହେବା ଉଚିତ । ତେବେ ଏହାକୁ ନେଇ ଭାରତୀୟ ଜନତା ପାର୍ଟିର ବରିଷ୍ଠ ନେତାମାନେ ରାହୁଲଙ୍କୁ ସମାଲୋଚନା କରିସାରିଥିବା ବେଳେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ନିର୍ବାଚନୀ ସଭାମଞ୍ଚରୁ ଏହି ପ୍ରସଙ୍ଗ ଉଟାଇ କଂଗ୍ରେସକୁ ଟାର୍ଗେଟ୍ କରିଛନ୍ତି । କଂଗ୍ରେସ କ’ଣ ମୁସଲମାନଙ୍କ ଅଧିକାର ଛଡ଼େଇ ନେବାକୁ ଚାହୁଁଛି ବୋଲି ପ୍ରଧାନମନ୍ତ୍ରୀ ପ୍ରଶ୍ନ କରିଛନ୍ତି ।
ନିର୍ବାଚନ ହେବାକୁ ଯାଉଥିବା ଛତିଶଗଡର ଜଗଦଲପୁରରେ ଏକ ସାଧାରଣ ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଏହି ଜାତି ପ୍ରସଙ୍ଗକୁ ଉଠାଇଛନ୍ତି । କହିଛନ୍ତି, "କଂଗ୍ରେସ କହୁଛି, ଯାହାରା ଯେତେ ଲୋକସଂଖ୍ୟା ତାର ସେତେ ଅଧିକାର । ଦେଶରେ ସବୁଠାରୁ ଅଧିକ ଲୋକସଂଖ୍ୟା ବର୍ଗରେ ଗରିବ ରହିଛନ୍ତି । ମୋ ନଜରରେ ସବୁଠାରୁ ଅଧିକ ଲୋକସଂଖ୍ୟା ହେଉଛନ୍ତି ଗରିବ । ସେମାନଙ୍କର ଅଧିକାର ପାଇଁ ଲଢେଇ କରିବାକୁ ପଡିବ ।"
ସେହିପରି ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ମନ୍ତବ୍ୟକୁ ମଧ୍ୟ ଦୋହରାଇଛନ୍ତି ମୋଦି । ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ କହିଥିଲେ, ଦେଶର ସମ୍ବଳ ଉପରେ ପ୍ରଥମ ଅଧିକାର ସଂଖ୍ୟାଲଘୁଙ୍କର ରହିଛି । ହେଲେ କଂଗ୍ରେସ କହୁଛି, ଯାହାର ସଂଖ୍ୟା ଅଧିକ ତାର ସେତେ ଅଧିକାର । ଭାରତରେ ହିନ୍ଦୁ ସଂଖ୍ୟା ଗରିଷ୍ଠ ସମ୍ପ୍ରଦାୟ । କ’ଣ ସେମାନେ ସବୁ ଅଧିକାର ପାଇବେ । ଏପରି ମନ୍ତବ୍ୟ କ’ଣ କଂଗ୍ରେସ ସଂଖ୍ୟାଲଘୁଙ୍କ ଅଧିକାର ଛଡାଇ ନେବାକୁ ଚାହୁଁଛି ବୋଲି ପ୍ରଧାନମନ୍ତ୍ରୀ କହିଛନ୍ତି ।
ଗତକାଲି ନୀତିଶ କୁମାର ନେତୃତ୍ବାଧୀନ ବିହାର ସରକାର ଦେଶର ପ୍ରଥମ ରାଜ୍ୟ ଭାବେ ଜାତିଭିତ୍ତିକ ଜନଗଣନା ରିପୋର୍ଟ ପ୍ରକାଶ କରିଛି । ରାଜ୍ୟ ଲୋକସଂଖ୍ୟାରେ ଓବିସି ଓ ଇବିସି (OBC-EBC) 63 ପ୍ରତିଶତ ରହିଥିବା ଜଣାପଡିଛି । କଂଗ୍ରେସ ଏହାକୁ ସମର୍ଥନ କରିଥିଲା । କଂଗ୍ରେସ ନେତା ରାହୁଲ ଗାନ୍ଧୀ କହିଥିଲେ, ଯେଉଁ ସମ୍ପ୍ରଦାୟର ଯେତେ ଆବାଦି (ଲୋକସଂଖ୍ୟା), ଅଧିକାର ମଧ୍ୟ ସେତେ ହେବ ଉଚିତ । କେନ୍ଦ୍ର କ୍ୟାବିନେଟରେ ମାତ୍ର ୩ ଜଣ ଓବିସି ବର୍ଗର ପ୍ରଶାସନିକ ଅଧିକାରୀ କାହିଁକି ଅଛନ୍ତି ବୋଲି ମଧ୍ୟ ପ୍ରଶ୍ନ କରିଥିଲେ ।
ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଜୟରାମ ରମେଶ ମଧ୍ୟ ଏହି ଜାତିଭିତ୍ତିକ ଜନଗଣନା ଜାତୀୟ ସ୍ତରରେ କେନ୍ଦ୍ର ସରକାର ଆରମ୍ଭ କରନ୍ତୁ ବୋଲି କହିଥିଲେ । ତେବେ ରାହୁଲଙ୍କ ଆବାଦି ମନ୍ତବ୍ୟ ଆସିବା ପରେ ଏହାକୁ ଭଜପା ନେତାଏଁ ସମାଲୋଚନା କରିଥିଲେ । ଆଜି ପ୍ରଧାନମନ୍ତ୍ରୀ ମୋଦି ମଧ୍ୟ ନିର୍ବାଚନୀ ସଭାମଞ୍ଚରୁ ରାହୁଲଙ୍କ ମନ୍ତବ୍ୟକୁ ନାଁ ନେଇ ସଂଖ୍ୟାଲଘୁଙ୍କ ଅଧିକାର ପ୍ରସଙ୍ଗ କଥା କହି ସମାଲୋଚନା କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
